Nombres 34
34
Kanaan tiŋki kpaanyɔmmu
1Ti-Dindaan bí Mooyiisi 2ń tīī Isirayeel yab mara nee yii: «Ni yaa láa kɔ́ Kanaan tiŋkinee, kitiŋ kin m yóoǹ kí tīī-ni ní nīn kíǹ ki yèe kpaanyɔmmu sɔ̀.
3Ni-tiŋki kpaanyɔkɔ kífí Siini teekun ŋgiil pú kí tin cáá gbèen̄ Eedoom tiŋki, ní kí fàtīí yòon̄ ŋwìiń nyalaŋki pú kí cáá sāā Ŋyaam mɔɔl ŋgiil pú. 4Ni-kpaanyɔkɔ làá fàtīí fíiǹ kí dī ŋgiil pú kí nīn jɔ́ḿ Akrabiim gbantaŋki watil, kí dūú dī Siini teeku kí cáá sāā Kadeesi Barneeya tiŋki ŋgiil pú, ní kí dūú dī Asaar-Adaar tiŋki watil, kí tin jītí Asimɔn tiŋkin, 5ní kí yòon̄ Asimɔn tiŋki kikpaanyɔkɔ kí fàtīí dūú dī Eejipiti kpiŋŋu kí tin cáá sāā Meediiteeranee tiŋkuu.
6Ŋwìiń jeetilaŋki púee, ni-tiŋki kpaanyɔkɔ di sá Meediiteeranee tiŋkuu.
7Ŋgan púee, ni-tiŋki kpaanyɔkɔ ń kíĺ Meediiteeranee tiŋkuu kí nīn pée nóó míǹ kí nīn cáa cá áli Ɔɔr jool. 8Kí yòon̄ní Ɔɔr jool pú kí dūú dīń Yamati ní kikpaanyɔkɔ ń tin sāā Seedaad. 9Ni-tiŋki kpaanyɔkɔ làá nìkī kí yòon̄ Siifirɔn tiŋki kí tin cáá sāā Yatisaar-Eenan. Ni-tiŋki kpaanyɔkɔ nín sá pu ŋgan púee dee.
10Ŋwìiń nyalaŋki púee, ni-tiŋki kpaanyɔkɔ ń kíĺ Yatisaar-Eenan kí tin cáá sāā Seefam tiŋki, 11ní kí yòon̄ Seefam tiŋki kí nīn sìntī Riibila watil, Aayin tiŋki ŋwìiń nyalaŋki pú, ní kí yòon̄ niin kí nīn sìntī kí tin cáá sāā Geeneesareeti mɔɔgbandi ŋwìiń nyalaŋki pú, 12ní kí yòon̄ niin kí nīn sìntī Jɔɔdan buŋŋu kí tin cáá sāā Ŋyaam mɔɔl.
Ni-tiŋki nín làá nīn cáá ŋkpaanyɔmu nì ntimu mun māntìi tú-nee puee dee.»
13Ní Mooyiisi dū maree ki nāatì Isirayeel yab yii: «Kitiŋ nee ní ni làá tɔ̄ kasi ní án lēē báà ŋma tinjandi kí tīī-u. Ti-Dindaan di lēē ki síiǹ yii u làá dū-kì ki tīī tinaakɔti tiwa nì dijandee#34.13 Kpèè 26.52-56, Joos 14.1-2.. 14Di sá Rubeen naakooku dicaŋŋi yab, nì Gaadi naakooku dicaŋŋi yab, nì Manasee naakooku dijandi dicaŋŋi yab fōō bi-tinjaŋŋi. 15Tinaakɔti tili nì dijandee yab fōō bi-fakal Jɔɔdan buŋgbandi lapu pu ki túĺ Jeeriikoo tiŋki ŋwìiń nyalaŋki pú#34.15 Kpèè 32.33..»
Bikpilib bin làá yàkatī kitiŋee yiŋŋi
16Ti-Dindaan sòon̄ nì Mooyiisi ki bí-u yii: 17«Usaraaŋakpil Eeleeyasaar nì Nuuni jipɔɔn Joosuwa di làá yàkatī kitiŋ kí tīī-ni. 18Ní lēē kunaakoou kamaa poon ukpil ubɔ kí kūtì bi-pu bí yàkatī kitiŋ. 19Bininjab gbanti yiŋŋi sɔ̀.
Juuda naakookun niliu di sá Yeefunee jipɔɔn Kaaleeb.
20Simeeyɔn naakookun niliu di sá Amiiyuudi jipɔɔn Seemuweel.
21Beenjameen naakookun niliu di sá Kiisilɔn jipɔɔn Eeliyaadi.
22Daani naakookun niliu di sá Yoogilii jipɔɔn Buukii.
23Jooseefi jipɔɔn Manasee naakookun niliu di sá Eefoodi jipɔɔn Yaniyeel.
24Jooseefi jipɔɔn Eefiraayiim naakookun niliu di sá Siifitan jipɔɔn Keemuyeel.
25Sabulɔn naakookun niliu di sá Paarnaki jipɔɔn Eeliisafan.
26Isakaar naakookun niliu di sá Asaan jipɔɔn Paltiyeel.
27Aseer naakookun niliu di sá Seeloomii jipɔɔn Ayiiwuudi.
28Neefitalii naakookun niliu di sá Amiiyuudi jipɔɔn Peedayeel.»
29Binib bin ti-Dindaan nìn lēē bí yàkatī Kanaan tiŋki kí tīī Isirayeel yabee dee.
Currently Selected:
Nombres 34: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
