Judith 16
16
1Judiiti nìn bí yii:
«Ní bɔ̀ɔ̀maan ŋgaŋgamu kí gāā nlan kí tīī m-Nimbɔtiu,
cākafìmaan cancakantib kí gāā nlan kí tīī ti-Dindaan,
ní náań-u inyɔŋki laŋŋu,
yòom̄maan-u yilpu kí yíiń u-yindi.
2Di sá yii ti-Dindaan sá Unimbɔti
un di yàntī tijáti gbèentée ní.
Úǹ un ŋàtī u-naapaaŋi u-nibul kansikinee.
U fīī-mi ki nyántì bin nìn jì-mee ŋaan.
3Asuur yab nyánní ŋgan pú jooŋŋi ki dɔ́miń,
bi nìn dɔ́miń nì bi-janjaliibi cutimaanyi.
Bi-wíiŋŋu nìn pìintí ibun nsan
ní bi-taamui nì bi-tanjakaliibi nìn bìintí ŋgbantamu kɔkɔ pu.
4Bi nìn bíi sòoǹ yii bi làá tūū m-tiŋki ŋŋmi,
kí dū kitàataajiki kí pɔ̀fì m-nipɔmbi,
kí dū m-bipɔmmu kí lúkú kitiŋ,
kí dū m-biyaamu kí kpántí iyumbu,
ní kí tɔ̀kɔ̄ m-sapɔmbi bin kaa nyí uninjee.
5Ti-Dindaan Mpɔŋkɔdaan dūu dī unimpusaaleen pu
ki pīiǹ-bi nsan.
6Binipɔmbi di kaa jáń ki pɔ́ɔkiǹ bi-kpiliu,
kaa sá bininjab bin pɔ̄ɔ̄yee di fáá-u,
kaa tí sá tijawɔkɔl mun di jáń nì u,
ama Meerarii bisal Judiiti
di dū u-nimbiin nyaaŋku ki líì-u.
7U nìn cúú dikpiipool bɔkutil ki pēetì
kí ŋmā kí tīī Isirayeel yab bin wunti nìn yɔ̄tèe kunyannyaau.
U nìn dū ŋkpam min sɔ́fèe ki ŋmītì u-nimbiin,
8ki dū kiŋaabiki ki cúú u-yikpiti
ní ki dū dibɔkutil din bi dū gulfa un bí fálfalee
ki lùn̄ee ki pēeǹ kí ŋmàtiǹ-u.
9U-naatakaŋ nìn dáaĺ u-nimbikpeeŋu
ní u-nyaaŋku kɔ́ u-naŋki.
Kitàataajiki nìn gūutì u-sil ki lēē diyil.
10Dipɔbil din u nìn cááyee nìn kɔ́ǹ Peersi yab tifaandi
ní u-ninjati nìn kɔ́ǹ Meedeesi yab dinyoondi.
11Niinee m-yab bin bi nìn kpēē ki sīŋkiǹee fáá ijanjakuŋkuunti
ní bíǹ fāŋkì yɔ́kɔ́ yɔkɔ.
M-nibul din nìn pɔ̄fiǹee nìn fáá ibiil ní bíǹ kɔ́ dinyoondin.
Bi nìn kúuǹ mpɔn ní bíǹ kaa ti nyí tin poon bi bée.
12Bin sá kii inimpuyumbu jipɔmbee sāā ki pūtì-bi
ní bin sá kii iyumbu in sáǹee biyaamu tīī-bi tiweendi.
Man Dindaan jaaku kubɔn ní bi kpíì.
13M làá gāā nlampɔɔn kí tīī m-Nimbɔtiu#16.13 Ilan 33.3, 144.9, Dilee 5.9, 14.3.,
ti-Dindaan, a sá ukpaan ní ki cáá tinyool,
a-pɔŋŋu sá maamaaci pɔŋŋu
ní ubɔ kaa ŋūǹ kí já kí pɔ̄ɔkiǹ-si.
14A-wannaaŋkaati kɔkɔ ń jāam̀-si,
di sá yii a sòon̄ ní tì dɔ́miń ki kíǹ ki bí,
a túnní a-Fam ní ŋu náań-tì.
Ubɔ kpá ki ŋūǹ kí jáǹ a-nyɔɔbundi.
15Ajoon làá cìŋkì kí tin bà ŋi-nyeeŋŋi
ní kí cùú jēetí kí ŋmàlim̀ inyiŋfin.
Ataŋkpee làá dùntī kii aŋɔee ní a-nimbiin.
Ama a dàkà bin fàŋkí-see kulaŋŋaŋfitiiu ní.
16Di sá yii saraabi kɔkɔ kaa náaǹ kí nīn sɔ́fì ki fáatiǹ-si,
ní bi-kpam kɔkɔ pátì bí dūú ŋá-si saraawɔkaa.
Ama un di fàŋkí ti-Dindaanee sá ukpaan ní ki cá jaanjaan#16.16 Dūú ŋmàntī nì Yees 1.11, Oosee 6.6, Ilan 40.7, 51.18..
17Mbusu dɔ̄ ki cí atimbun ŋin yíkíi jáà nì m-nibulee.
Ibɔsoon dalee, ti-Dindaan Mpɔŋkɔdaan làá dāá dáaĺ bi-tafal,
kí dū bi-wunti kí tīī ŋŋmi nì akoosibil#16.17 ŋŋmi nì akoosibil: dūú ŋmàntī nì Yees 66.24, Siira 7.17, Maar 9.48.,
ní bí nīn sūǹ ki yáliŋkí ki cá jaanjaan.»
18Ŋyunti ŋun bi bàn̄ Jeerusaleemee ní bi jáam̀ Unimbɔti. Samaa nín ŋá bi-ba circir ki dóòyee ní bi ŋá bisaraawɔkaabi nì nlammɔntiim saraabi nì saraabi biba mun. 19Judiiti nìn dū Ooloofeerni wanti tin samaa nìn dūu tīī-uee ki sú Unimbɔti. Sabɔrɔ un u nìn yōoǹ u-didooŋkaakunee, u nìn dūu sú ti-Dindaan an nīn sá dijandi din bi fōō kujaaun ki dū sú ti-Dindaanee#16.19 ki dūu sú ti-Dindaanee: dūú ŋmàntī nì Dikà 31.50, Miika 4.13.. 20Samaa nìn dū iŋmal ita ki fàal̄ Jeerusaleem circir laŋki nyɔkɔpu, ní Judiiti nìn gbíntì bi-cee.
Judiiti maŋfal wiiŋyi nín kúntì puee
21Iwiin gbanti boonee, báà ŋma nìn gítì u-dumpu. Judiiti nìn nín gítí Beetulii ki gbíntì niin ki kāl̀ u-kpaatantin. U nìn nyáń diyindi Isirayeel tiŋki kɔkɔ poon u-maŋfal wiiŋyi kɔkɔn. 22Bininjab tikpil nìn là-u, ama báà uninja kaa béè-u u-maŋfal wiiŋyi kɔkɔ poon kí yòon̄ ŋwiin ŋun ní u-cal Manasee kpíì ki cūtìi ŋàl̄ u-naanjabee. 23U nìn bíi púl̀ ki cá ní u-nyooti mɔ̀tīi wīintí. U-cal dicaŋkun ní u nìn kāl̀ ki púĺ ki dāa cáa sāā abin dilaataal nì abin aŋmoo. U nìn tīī u-yumbusapɔɔŋwu dibatɔl ní ki kpíì Beetulii tiŋkin. Bi nìn síb́-u u-cal Manasee kaakulin ní. 24Isirayeel yab nìn dū iwiin iluli ní ki kāl̀ u-kpool. Kí wàatī ú kpúee, u nìn dū u-gaajawanti ki yākatì ki tīī u-cal Manasee nabiyaamu kɔkɔ nì úǹ u-ba dicaŋkun yab.
25Báà ubɔ kaa nìn gíti mākaǹ kí fàaǹ Isirayeel yab ŋyunti ŋun Judiiti bí dimaŋfalinee nì ŋyunti ŋun u kpíì iwiin kupaau boonee.
Currently Selected:
Judith 16: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.