Esther (grec) A
A
Maardoosee damintiiku
1Ubɔtikpaan Asuweerusi nín kāl̀ dibeel Peersi tiŋki puee, dibinliliitiil poon uŋmal un bi yíì Niisaŋyee wimpeepeekaaŋu dal ní Maardoosee dámintì kudamintiiu kubɔ. Maardoosee nìn sá ujuudaja ní ki sá Beenjameen naakookun. U-baa di sá Yaayiir ní ki sá Simeeyii naantiiu, Kiisi naantitɔntɔkɔl. 2U nìn kóò Suusi tiŋkin ní ki nìn sá unimɔnti, di sá u nìn bí dibeecindin ní ki tūǹ ubɔti tundi. 3U nìn ŋmàl̄ bin Babiloon yab bɔtiu Neebukadineesaar nìn cúuń kuyuŋu Jeerusaleemee kansikin, ki kpáaǹ Juuda yab bɔtiu Yeekooniyee#1.3a Kpèè Eest 2.6..
4Maardoosee nín nìn dámintì puee sɔ̀.
Bi gbìl̄ ibiil nì kuwoou pu,
utaa gbáń adun ní kitiŋ cīŋkì
ní binib fāŋkì tikpil.
5Niinee ní tipeebilindi tili nyáń ki bɔ́ntì kí jáǹ tɔb. Ti nìn bí ki kūuntí tikpil. 6Binib nín gbìl̄ ikuŋkuunti gbanti puee ní atimbun kamaa bíi bɔ́ntí kí jáǹ ditimbundi din fàŋkí Unimbɔtee.
7Ŋwiin gbanti nìn sá dibɔmbɔndi wiiŋŋu ní,
mbusu nì dinimbinaamandi wiiŋŋu,
falaa wiiŋŋu ŋun ní kitiŋ pu nib kɔkɔ fàŋkí yɔ́kɔ́ yɔkɔee#1.7a Kpèè Joow 2.2, Seefa 1.14-15..
8Samaa un fàŋkí Unimbɔtee, tifaandi kɔ́-bi bi bíi jìkì mbusub bin dɔ̄ bi-nyɔkɔpuee pu. Bi bíi bɔ́ntí kí kpú. 9Bi bí ki gbáà ibiil Unimbɔti watil pú, ní ibiilee nìn bí kii nnyim di gbí mbuŋkpaan poon ní ki nyēeń kinyimbulwaai poonee. 10Boonee ŋwìiń nyáń ní kutaa wúntì. Niinee ŋwɔsɔfimu yíkì ki kúntì bilambidambi.
11Maardoosee nín ká u-damintiiku poon Unimbɔti nín lēē kí ŋá miŋyee, u nín fīntèe, u dākafì an pu. U nìn dūu kpáafì u-pɔbilin ki dàkafī ti-pu áli kunyeeu ki dī nsàmbiyaamu kɔkɔ pu ki nyàab̄ kí béé taapu.
Maardoosee tùkū ubɔti bi nín sòon̄ kí ŋá-u puee
(Dūú ŋmàntī nì Eest 2.21-23 nì Eest grek 2.21-23)
12Dalbee Maardoosee nìn cūtìi kā dibeecindin ki ŋùŋfī. Ŋyunti gbantee, ubɔti faabi bili Gaabata nì Teera di nìn cí ubɔti cindi. 13Niinee ní u gbìl̄ binibee bíi sòoǹ bi-ŋmaniŋma ní u pílifì dímmm ní ki gbìl̄ bi nín bíi bɔ́ntí pu kí kpɔ̀ ubɔti Asuweerusee. Ní u bīitì bi-pu ubɔti cee. 14Ubɔti nìn yíiń bifaabi bilee ki bālifì-bi tibɔti gbanti pu ní bi kíí yii an sá ibaamɔn, ní bi cúú-bi ki kūū. 15Ubɔti nìn yāntì bi dū an bɔtee ki ŋmàn̄ ki ŋá kugbɔŋu poon ú nīn téetí. Maardoosee mun nìn ŋmàn̄-tì ki yóoǹ. 16Ubɔti nìn yóoǹ Maardoosee mara yii ú nīn pée bí úǹ cindin ki tūǹ ditundi. U nìn pú-u tiwampɔkaal kí jāam̀-u u nín cúú binikpitibee pu.
17Ama Aaman un sá Bugayoosi tiŋkin Ameedata jipɔɔnee di nìn sá ubɔti ŋaŋgiil. Tin nìn jítì ubɔti faabi bilee puee, u nìn lēē yii u làá kɔ́ǹ Maardoosee nì u-nibul digìńdi.
Currently Selected:
Esther (grec) A: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.