Juges 6
6
Madiyan yab wɔ́b́ Isirayeel yab
1Isirayeel yab tí ŋá tin kaa kítì ti-Dindaan ceeyee. An pu ní ti-Dindaan dū-bi ki ŋá Madiyan yab ŋaan abin aluli#6.1 Kpèè Disa 2.15.. 2Madiyan yab nìn wɔ́b́ Isirayeel yab tikpil. Madiyan yab puee, Isirayeel yab nìn bɔ́ntì itaŋkpalɔkɔ nì titaŋkpanaakɔti nì ipaan in an pɔ̄ɔ̄ unil ń còom̀ kí bà sɔkɔmiiyee ajoon pu. 3Ama Isirayeel yab yaa nìn búĺ bi-kpaajintee, Madiyan yab nì Amaleeki yab nì ŋwìiń nyalaŋki pú timmu yab nìn jɔ́ḿ ki jáà nì bi. 4Bi nìn ŋàtī bi-naapaaŋi Isirayeel yab caŋin, ní ki bíiĺ bi-kpaajinti kí tin cáa sāā Gaasaa tiŋki caŋin. Baa nìn kīntí Isirayeel yab báà tiba bí ká kí jī kí ŋmátí. Baa nìn kīntí-bi upiiyaaa, unaayaaa, kimaŋ. 5Di sá yii binibee nìn yíkiń ní kí kpáaǹní bi-waŋkuti nì bi-tantib ní kí dāá bìin̄ Isirayeel yab tiŋki pu bɔ̀mmm kii inaakitoonee, kí bīil̀ tin bí kitiŋee puee kɔkɔ. Bi nì bi-gutaamui nìn wīikí an kaa cáá ŋkaan. 6Madiyan yab puee, Isirayeel yab nìn dūu kpántì biwɔfib ní. Niinee ní Isirayeel yab kúuǹ ki yíiń ti-Dindaan ú jòoń-bi.
7Ŋyunti ŋun Isirayeel yab nìn kúuǹ ki yíiń ti-Dindaan ú fīī-bi Madiyan yab ŋaanee, 8ní ti-Dindaan dū u-bɔnaatiliu ubɔ ki tú bi-cee úǹ tùkū-bi yii: «Ti-Dindaan Isirayeel Nimbɔtiu nín lī puee sèé: <Man di nyántìń-ni Eejipiti tiŋkin, laakin ni nìn bí kuyuŋunee. 9Man di fīī-ni Eejipiti yab nì bin kɔkɔ nìn bí ki wɔ́b̀-nee ŋaan, ní ki jìn̄-bi ni-nimbiin ki dū bi-tiŋki ki tīī-ni. 10M nìn tùkū-ni yii man di sá ni-Dindaan ni-Nimbɔtiu. Ní taa jāam̀ Amɔɔr yab bin tiŋkin ni kóòyee nimbɔtii!> Ama ní naa pílifì m-nyɔkɔ!»
Unimbɔti lēē Geedeeyɔn ú fīī Isirayeel yab
11Ti-Dindaan tuuŋŋu nìn dɔ́miń ki kāl̀ teereebinti subu bubɔ taapu, Oofiraa tiŋkin. Joowaasi un sá Abiyeeseer maaliŋunee di nìn yì busubu gbanti. U-jipɔɔn Geedeeyɔn nìn bí ki gbáà bilee dibɔbil din poon bi tà fiinyi biliŋ ki lèekī ndamamee, Madiyan yab ń taa ká-u. 12Ti-Dindaan tuuŋŋu nìn lēē ŋu-ba ki dàkā-u ní ki bí-u yii: «Ti-Dindaan bí a-cee, ubaatandaan!» 13Ní Geedeeyɔn bí-u yii: «M gbāam̀-si, m-kpiliu. An yaa sá yii ti-Dindaan lafun bí ti-ceeyee, ba pu ní tin bí nee kɔkɔ bāań-ti? Atuŋkpaan ŋin ti-baabi nìn máafì-ti yii ti-Dindaan nìn ŋáaǹ ki tīī-bi u nín nìn nyántìń-bi Eejipiti tiŋkinee bí la sɔ̀? Too, kɔŋkɔnnee ti-Dindaan fātì u-boon ki tīī-ti, ní ki dū-ti ki ŋá Madiyan yab ŋaan.» 14Niinee ní ti-Dindaan fātì u-watil pú ní ki bí-u yii: «Nì mpɔn ŋun a cáá nee, cùú já kí fīī Isirayeel yab Madiyan yab ŋaan! Man di kaa tú-saaa?» 15Ní Geedeeyɔn bí-u yii: «M gbāam̀-si, m-kpiliu, mana ní m làá ŋmā kí fīī Isirayeel yab? Manasee naakookun ti nín pēē pēē mmaal puee, man maaliŋun yab di pátì. Kí kūtèe, man di pée sá kiwaŋwaai m-baa dicaŋkun.» 16Ní ti-Dindaan kíí-u yii: «M làá nīn bí a-cee ní á já kí pɔ̄ɔkiǹ Madiyan yab kɔkɔ dicilpu kii bi sá unibambaantee.» 17Ní Geedeeyɔn bí-u yii: «M yaa lafun ká diyimɔɔl a-ceeyee, á dàkà-mi kudaaŋŋu kubɔ ḿ béé yii tilafuŋman sii di bíi sòoǹ nì mi. 18M gbāam̀-si, taa búntí. Á cīití-mi doo ḿ cù kí bɔ́ntiń m-saraau kí cáań kí yóoń a-nimbiin.» Ní ti-Dindaan kíí-u yii: «M làá cīití-si á cùú gítiń.»
19Ní Geedeeyɔn nín kóò u-dumpu ki cūtìi cúú diŋɔbil ki kūū ki tɔ́kɔǹ, ki lēē ŋyim kiiloobi mmuŋku nì saalaa ki púĺ kpɔnɔb bin kaa cáá ŋkpɔnɔnyɔkɔee. U nìn bāaǹ tinan ki tākaǹ kukabikun, ki kpáatì tikun ki sītì dikumboolin ní ki yōoǹ kɔkɔ ki cáa nyántì teereebinti subu taapu ki yóoǹ ti-Dindaan nimbiin. 20Ní ti-Dindaan tuuŋŋu bí Geedeeyɔn yii: «Dū tinan nì kpɔnɔb bin kaa cáá ŋkpɔnɔnyɔkɔee kí páań ditaŋkpal nee pu, kí kpáatí tikun kí pɔ̀l̄ an pu.» Ní Geedeeyɔn ŋá míǹ. 21Ní ti-Dindaan tuuŋŋuee tāntì ŋkpandɔ ŋun ŋu ŋúb́ee nyɔkɔpu ki gbēē tinan nì kpɔnɔb bin kaa cáá ŋkpɔnɔnyɔkɔee, ní ŋŋmi nyáń ditaŋkpal din pu an pée ki wùn̄ tinan nì kpɔnɔbee kɔkɔ múb. Niinee ní ti-Dindaan tuuŋŋuee wáŋkì Geedeeyɔn nimbiin. 22Niin ní Geedeeyɔn béè yii an sá ti-Dindaan tuuŋŋu, ní u téeń yii: «Óo, m-bɔlii na, m-Dindaan Unimbɔti. Ti-Dindaan tuuŋŋu ní m lafun wál̀ nì m-nimbiliŋ kpìrrr naa!» 23Ní ti-Dindaan bí-u yii: «Ŋgbansɔŋfi ń nīn bí a-cee! Taa fàŋkì báà tiba, aa làá kpú.»
24Ní Geedeeyɔn máń nsaraafan ŋubɔ mpaan gbanti pu ki tīī ti-Dindaan ní ki pú-ŋu diyindi yii <Ti-Dindaan sá ŋgbansɔŋfi>. Nì díǹ pu nee, nsaraafan gbanti dáá gbíntìi yú Oofiraa, Abiyeeseer tiŋki kiba poon.
Geedeeyɔn wīī diwaal Baal saraafaŋŋu
25Kunyeeu gbanti ní ti-Dindaan tùkū Geedeeyɔn yii: «Cúú a-baa najau dimaaliliitiil yau un cáá abin alulee. Míǹ boonee, á cùú gbá kí wīī a-baa waal Baal saraafaŋŋu, kí gāā ŋwindɔ ŋun bi cóoǹ nsaraafanee caŋinee. 26Boonee á mā man a-Dindaan a-Nimbɔtiu nsaraafan ŋun sá mmɔntee kigbantaŋ nee pu. Á látí ŋwindɔ ŋun a gāāyee kí dūú kpāā ŋŋmi nsaraafan ŋun a máń-mi mpɔminee pu, ní kí dū dimaaliliitiil najauee kí ŋá saraawɔkaa kí tīī-mi.» 27Geedeeyɔn nìn lēē u-tɔntɔnliibi kansikin binib saalaa ní bi cūtìi ŋá ti-Dindaan nín nìn tùkū-u yii ú ŋá puee. Ama u nín nìn fàŋkí u-baa dicaŋkun yab nì binib bin kíǹ kitiŋinee puee, waa nìn ŋá min ní ti-Dindaan bí yii ú ŋée ŋwiimpu, kunyeeu ní u ŋá. 28Kutaa wúntì kutaafaau pɔ̀lpɔl kitiŋin nib yíkèe ní ki dáań ki ká yii bi gbáń ki wīī diwaal Baal saraafaŋŋu, ki gāā ŋwindɔ ŋun nìn cɔ́ ŋu-caŋinee ní ki dū dimaaliliitiil najauee ki ŋá saraawɔkaa nsaraafan ŋun bi máń mpɔminee pu. 29Ní bi kíǹ ki bí ki bàlifī tɔb yii: «Ŋma di kalin nín ŋá mimmee?» Bi bālifì bālifì, ki nyàab̄ nyàab̄ee ní an dāa nyáń yii Joowaasi jipɔɔn Geedeeyɔn di ŋá míǹ. 30Ní kitiŋin nib bí Joowaasi yii: «Nyāntiń a-jipɔɔn doo tí kpɔ̀-u, kun puee u gbáń ki wīī diwaal Baal saraafaŋŋu ní ki gāā ŋwindɔ ŋun bi cóoǹ ŋu-caŋinee.» 31Ní Joowaasi kíí bin nìn yú u-cee niinee kɔkɔ yii: «Nimbi di làá sòoǹ diwaal Baal bɔti kí tīī-daaa? Nimbi di máaǹ kí jòoń-dàaa? Un kamaa di yaa mɔ́tì diwaal Baal puee máaǹ bí kpɔ̀-u ní kutaa ń nín wúntí. Diwaal Baal yaa lafun nyí yii di sá unimbɔtee, bi nín gbáń ki wīī di-saraafaŋŋuee, dí mɔ̄tì di-ba pu.» 32Ŋwiin gbanti ní bi nìn páaǹ Geedeeyɔn diyimpaaŋkaal yii <Yeerubaal> ki lī yii: «Diwaal Baal ń mɔ̄tì di-ba pu», kun puee u gbáń ki wīī di-saraafaŋŋu.
Isirayeel yab bíi bɔ́ntí kí jáǹ Madiyan yab
33Madiyan yab nì Amaleeki yab nì ŋwìiń nyalaŋki pú timmu yab sòon̄ ki ŋá kinyɔɔbaantii, ki kóoǹní ki kpáfì, ki dūtì Jɔɔdan buŋŋu ní ki dɔ́miń ki ŋātì dijanjanaapaal Jisirayeel tantakalin ki kāl̀. 34Ti-Dindaan Fam nìn gbí Geedeeyɔn ní u búń ŋyin ki yíiń Abiyeeseer maaliŋun yab ní bi-kɔkɔ yíkì ki páaǹ u-boon. 35U nìn lēē binib ki tú bi yíiń Manasee naakookun yab kɔkɔ ní bi mun yíkìń ki páaǹ u-boon. Boonee ní u tú ituun Aseer nì Sabulɔn nì Neefitalii naakɔtin yab cee ní bi mun jɔ́m̀ ki túŋkì-bi nsanni.
36Ní Geedeeyɔn bí Unimbɔti yii: «An yaa lafun sá man pu ní a là kí dī kí fīī Isirayeel yab kii a nín lī puee, 37m làá kpátí ipii kuti ŋaabuŋu ki bíĺ mmɔŋki dijanjanaapaal pu. Kutaa yaa wúntì ní dimalindi yaa sɔ̄ŋkì ipii kuti ŋaabuŋu ama ní kaa sɔ̄ŋkì dijanjanaapaal laakin kíǹeeyee, mimmee m béè yii a lafun là kí dī man pu kí fīī Isirayeel yab, kii a nín lī puee dee.» 38Ní an ŋá min Geedeeyɔn lēe. Di sá kutaa wúntì u fīntì kutaafaau ki yōoǹ ipii kuti ŋaabuŋuee ki ŋmáaḿee ní nnyim nyáń ki gbí kisambinyɔkaai kimɔŋ. 39Ní Geedeeyɔn bí Unimbɔti yii: «Á taa fōō m-pu diŋuul, m láa gíti sòoǹ nì si diba. Pɔ̄-mi nsan ḿ gíti màkan̄ ipii kuti ŋaabuŋu makandee kí kpèè. Yàntī ipii kuti ŋaabuŋu ń nīn kūń ama ní dimalindi ń tɔ̄ kí sɔ̀ŋkì kitiŋ kɔkɔ dijanjanaapaal pu.» 40Kunyeeu gbantee Unimbɔti tí ŋá Geedeeyɔn nín lī puee. U nìn yāntì ipii kuti ŋaabuŋuee kūń ama ní dimalindi tɔ́ ki sɔ̄ŋkì kitiŋ kɔkɔ dijanjanaapaal pu.
Currently Selected:
Juges 6: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
