Juges 18
18
Daani naakookun yab bíi nyàab̀ kitimpɔŋ kí kàl̄
1Ŋyunti gbantee bibɔtiibi kaa nìn dá láá bí Isirayeel tiŋkin. An yuntiŋuee Daani naakookun yab nìn bí ki nyàab̀ kitiŋ kin bi làá kàl̄ee dee, kun puee kí cáá sāā ŋyunti gbantee, baa nìn cáá ditinjandi Isirayeel naakɔti tin kíǹee kansikin#18.1 Kii 1.34 nín lī puee, Daani naakookun yab kaa nìn ŋúń ki fōō ditinjandi din bi nìn tīī-bee (kpèè Joos 19.40-46), an pu ní bi nìn kpántì ditinjandi (Joos 19.47). 2Daani naakookun yab nìn lēē bi-maaliŋu poon bibaatandambi biŋmoo ki tú, bí yīkì Sooreeya nì Eesitawool timmun kí yìiǹ kí cɔ̄ŋkì kí béé kitiŋ tiŋan. Binib biŋmoo gbanti nìn yìin̄ ki bàn̄ Eefiraayiim jooŋŋi timmunee, kunyeeu mɔ́ ní bi kɔ́ Miika dumpu. 3Bi nìn bí Miika dumpu niin ní ki gbìl̄ unaacimpɔɔn un sá Leefii naakookunee neen, ní ki béè dinicil din u sée. Bi nìn cūtì u-cee ki bālifì-u yii: «Ŋma di cáań-si doo nee ní? Ba tundi ní a bí doo ki tūǹ? Ba di ŋúb́-si ní a kā doo nee?» 4Ní u kíí-bi yii: «An sá Miika di fōō-mi ditundi. U yāntì m sá u-saraaŋaliu ní u pà-mi.» 5Ní bi fātìi bí-u yii: «Bàlifì Unimbɔti kí kpèè yii nsan ŋun ti bíi còom̄ nee làá nīn sá nsammɔntaaa, ŋuaa làá nīn sá.» 6Ní usaraaŋalee kíí-bi yii: «Ní taa pée fàŋkìmaan báà tiba! Ti-Dindaan làá céeǹ-ni nsan ŋun ni bíi còom̄ nee poon!»
7Ní binib biŋmooyee nìkī bi-saŋŋu, ki cōom̀ ki tin bàn̄ Layiisi tiŋkin. Bi bàn̄ kitiŋ gbantinee ní ki ká yii binib bin nìn kóò niinee nì ubɔ kaa nìn cáá tɔb kujaau. Bi kā nì ŋgbansɔŋfi nì dipɔɔsɔŋkil kii Siidɔn yab nín nìn bí puee. Ubɔ kaa nìn bí ki páb́-baaa, ditimbundi diba mun nib kaa nìn bí ki cáá mpɔn bi-pu. Layiisi yab nìn kóò ki dátiǹ Siidɔn yab, ní kaa nìn bí báà ubɔ taapu. 8Niinee ní binib biŋmooyee fātìi nín gítí bi-dumpu Sooreeya nì Eesitawool timmun, ní bi-nabiyaamu tin bālifì-bi yii: «Ni kánní yii ba?» 9Ní bi kíí bi-nabiyaamu yii: «Yīkìmaan tí cù kí táká Layiisi tiŋki yab! Timbi nín cūtèe, ti dáań ki ká yii kitiŋ gbanti ŋān̄ tikpilku. Ní taa nín̄ kāmaan ki jòon̄ iŋal, ní yīkì tí cùú já kí fōō kitiŋ gbanti! 10Ni yaa bàn̄ niinee, ni làá ká yii binib bin kóò kitiŋ gbantee kā nì ŋgbansɔŋfi ní kaa dàkafī yii tiba ŋūǹ kí ŋá-bi. Bi-tiŋkee wāā tiŋan ní tikɔkɔ nì tikɔkɔ bí ki-poon. Ti nyí yii Unimbɔti làá dū kitiŋ gbanti kí tīī-ni!»
11Niinee ní Daani naakookun yab binib alaataa aluu bóob́ dikɔ̀ndi ní ki yíkì Sooreeya nì Eesitawool timmun ki nín cá. 12Bi yíkì mimmee ní ki jɔ́m̀ ki cūtìi ŋātì dijanjanaapaal Kiiriyati-Yeeyariim tiŋki kin sá Juuda naakookun timmu kibee poon. An pu ní bi pú mpaan gbanti diyindi yii Maanee-Daani ki dāa sāā díǹ pu nee#18.12 Maanee-Daani: taapu di sá yii <Daani naakookun yab kaaŋu>.. Mpaan gbanti bí Kiiriyati-Yeeyariim tiŋkin, ŋwìiń jeetilaŋki pú. 13Bi yíkì niinee ní ki pūntì Eefiraayiim jooŋŋi, ki cōom̀ ki bàn̄ Miika dumpu. 14Niinee ní binib biŋmoo bin bi nìn lēē bi yìin̄ ki cɔ́ŋkì ki béè Layiisi tiŋkee fōō dinyɔɔbundi ki bí yii: «Ni nyí yii diwaal diba, nì kudicaŋu waaŋi, nì diwaal din bi mɔ́ɔ́ ki dūntì tikúti ki nyūntèe bí adican nee kubɔ poonaaa? Too, kɔŋkɔnnee ní dàkafìmaan kí kpèè ni nín làá ŋá puee!» 15Binib biŋmooyee lī mimmee ní ki dūu túĺ Miika cindi, laakin ní unaacimpɔɔn un sá Leefii naakookunee nìn kóòyee, ki bàn̄ ki kɔ́ ní ki jáam̀-u ki bālifì u-gbampɔŋŋu pu. 16Ŋyunti ŋun binib biŋmooyee nìn bí dicindinee, Daani naakookun yab binib alaataa aluu bin kíǹee bíǹ nìn gbíntì ki yú kipunyɔkɔpu ki ŋúb́ bi-janjawanti. 17Ní binib biŋmooyee nín jɔ́ḿ yilpu cindin ki cūtìi kɔ́ kudiin ki yōoǹní diwaalee, nì kudicaŋu waaŋi, nì diwaal din bi dūntì tikúti ki nyūntèe. Ŋyunti gbantee usaraaŋal nìn bí kipunyɔkɔpu, u nì Daani naakookun yab binib alaataa aluu bin kíǹee, bíǹ yú ki ŋúb́ bi-janjawanti. 18Bin nìn kɔ́ kudiinee nín nìn yōoǹní diwaalee, nì kudicaŋu waaŋi, nì diwaal din bi dūntì tikúti ki nyūntèe ki nyántìńee, ní usaraaŋalee bālifì-bi yii: «Ba ní ni ŋáańee?» 19Ní bi kíí-u yii: «Ŋmīĺ niin! Taa ti pée wàan̄ a-nyɔkɔ kí lì báà tiba! Dāan̄ kí nóó-ti kí nīn sá usaraaŋal ki tīī-ti. Dàkafì kí kpèè yii á nīn sá usaraaŋal ki tīī unibaanti dicaŋku nì á nīn sá usaraaŋal ki tīī Isirayeel naakooku kumɔŋu kɔkɔee, la di ŋān̄?» 20Tibɔti gbanti nìn mɔ́ɔkiǹ usaraaŋalee tikpil, di sá ní u nìn fōō diwaalee, nì kudicaŋu waaŋi, nì diwaal din bi dūntì tikúti ki nyūntèe ki nóó-bi bi nín cá.
21Míǹ ní Daani naakookun yab nìn nìkī bi-saŋŋu, ki nìn dū mbiyaamu nì tiwaŋkuti nì awaŋgul ki līntì bi-nyɔkɔpu. 22Daani naakookun yab nìn cōom̀ ki kɔ́ ndan kaa ti pìlīǹ Miika dumpu ní Miika nì u-kɔŋkɔnnaatɔb kóoǹ ki kpáfì ki bóob́ butɔbu ní ki yíkìi kùl̄ ki páaǹ bi-boon. 23Daani naakookun yab nín gbìl̄ Miika nì u-kɔŋkɔnnaatɔb pánní bi-boon ki tátí ki yíì-bee ní bi fātì ki bālifì Miika yii: «Ba cáá-si ní? Ba yì-tì ní a kóoǹní dinikitil nee ki páaǹní a-boon mimmee?» 24Ní Miika kíí-bi yii: «Ni yōoǹ awaa ŋin m yāntì bi mɔ́ɔ́-mee, ki yōoǹ ki kpáaǹ m-saraaŋaliu, báà tiba nì tiba kaa ti kíǹ-mi ní ni gíti bàlifī-mi yii ba di cáá-maaa?» 25Ní Daani naakookun yab fātìi kpātì u-pu ki bí-u yii: «A yaa pée nyí nnyiimee, á ŋmīĺ a-nyɔkɔ laakin a yú nee, kí taa ti sòoǹ kí páb́ timbi! Yaa sá fám, a làá yàntī ti-kansikin biba ń dū bi-ŋuul kí nyìntī a-pu, kí kpɔ̀ kí céetí sii nì a-dicaŋku yab kɔkɔ.» 26Daani naakookun yab kpātì Miika pu mimmee ní ki nìkī bi-saŋŋu. Miika nín ká yii bi cáá mpɔn ki jítiǹ-uee, ní u fātìi nín kùǹ u-dumpu.
Daani naakookun yab kāl̀ Layiisi tiŋkin
27Daani naakookun yab nìn yōoǹ tiwan tin Miika nìn yāntì bi mɔ́ɔ́-uee. Bi nìn kpáaǹ usaraaŋal un u nìn fōō ditundee ki cáa búntì. Bi nìn cūtìi táká Laayiisi tiŋki kin nib kā nì ŋgbansɔŋfi kaa nìn fàŋkí yii tiba bí ki làá ŋá-bee. Bi nìn pɔ̄fì-bi ki sēē bi-tiŋki ŋŋmi kì wùn̄ kɔkɔ. 28Layiisi tiŋki nìn bí Beeti-Reewɔɔfi tantakalin ní, ki nìn dátiǹ Siidɔn tiŋki ní kaa nìn bí kitiŋ báà kiba taapu. An puee báà unil kaa nìn dɔ́miń ki fīī-kì. Daani naakookun yab nìn fātìi máń kitiŋ gbanti ki kāl̀ niin. 29Bi nìn kpántì kitiŋee diyindi, ki nìn kíǹ ki yíì-kì yii Daani, kii bi nín nìn yíì bi-naanja, Jaakɔb jipɔɔn puee. Njaminee, ki-yindi di nìn dáá láá sá Layiisi. 30Daani naakookun yab nìn dū Miika waalee ki yóoǹ bi-tiŋki gbantin. Geersɔm jipɔɔn Joonatan, Mooyiisi naantiiu di nìn sá Daani naakookun yab saraaŋaliu. Joonatan boonee, u-naantiibi di nìn tɔ́kɔǹ ki nìn sá Daani naakookun yab saraaŋaliibi míǹ ki tin cáa sāā ŋyunti ŋun ní bi dāa cúú Isirayeel yab ki cūnnì kuyuŋuee. 31Bi nìn dū Miika waal din u nìn yāntì bi mɔ́ɔ́-uee ki síiǹ bi-ba bi-tiŋkin. Di nìn gbíntìi niin ní ŋyunti ŋun kɔkɔ Unimbɔti diiku nìn dáá bí Siiloo tiŋkinee#18.31 Kpèè Joos 18.1..
Currently Selected:
Juges 18: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
