Juges 17
17
Miika nì mpaan ŋun pu u jáaḿ Unimbɔtee bɔti
1Uninja ubɔ di nìn bí, ki nìn kóò Eefiraayiim jooŋŋi pu ní bi nìn yíì-u yii Miika. 2Dalbee ní u bí u-na yii: «Tikúti nimbiliŋ ŋin bi nìn yùn̄-si jitɔmbi kutuku ubɔ nì dilaataal, ní a sòon̄ ki tɔ́ udaan un yùn̄-see mbusu mama m-ba gbìl̄ee, an nimbiliŋ gbanti bí man cee. An sá man di nìn yōoǹ-ŋi!» Ní u-na bí-u yii: «Ti-Dindaan ń bìin̄ a-boon, m-jipɔɔn!» 3Miika nìn gíiǹ tikúti nimbiliŋ jitɔmbi kutuku nì dilaataalee ki tīī u-na, ní u-na bí-u yii: «Mama m-ba lēē kí dū animbil gbanti kí sú ti-Dindaan sii m-jipɔɔn pu. M làá dū-ŋi kí tīī bí mɔ́ɔ́ diwaal kí dùntī tikúti kí nyùntī-dì. Kɔŋkɔnnee m gíiǹ animbil gbanti ki tīī-si.» 4An pu ní Miika nín fātìi gíiǹ animbilee ki tīī u-nee, u-na nìn lēē ŋi-poon jitɔmbi kulaafaau ki dūu tīī ucaa u mɔ́ɔ́ diwaal ki dūntì tikúti ki nyūntì-dì ní bi cáa yóoǹ Miika dumpu.
5Too, Miika gbanti nìn cáá mpaan ŋun pu u jáaḿ inimbɔtee u-cindin. U nìn yāntì bi fātìi mɔ́ɔ́-u diwaal diba, ki kpítì-u awaa ŋin làá nīn cí u-cindee mun ní u dūu kútì, ní ki lēē u-jipɔɔn ubɔ ki kāaǹ ú nīn sá u-saraaŋaliu. 6Ŋyunti gbantee bibɔtiibi kaa nìn dá láá bí Isirayeel tiŋkin. Báà ŋma nìn ŋáań min u lèe ní.
7An yuntiŋuee, unaacimpɔɔn ubɔ nìn bí, ki nìn sá Leefii naakookun ní ki nìn kālìń Beetileem, Juuda tiŋkin kunicaŋu. 8Unaacimpɔɔnee nìn yíkì Beetileem, Juuda tiŋkinee, ní ki nìn bíi yìiǹ ki nyàab̀ laaba kí gíti kàl̄ kunicaŋu. U nìn bíi yìiǹ ki tin kɔ́ Eefiraayiim jooŋŋi timmunee, ní ki tin nyáń Miika dicaŋku pu. 9Ní Miika bālifì-u yii: «La ní a nyánní ní?» Ní u kíí Miika yii: «Man sá Leefii naakookun ní ki nyánní Beetileem, Juuda tiŋkin. M bíi yìiǹ ki nyàab̀ laaba kí kàl̄ kunicaŋu ní.» 10Niinee ní Miika bí-u yii: «Yaa sée gbíntí m-cee doo kí nīn sá m-baa nì m-saraaŋaliu. M làá nīn tìì-si animbil jitɔmbi saalaa dibindi poon, kí nīn tìì-si tiwampeeŋkaal nì tijikaal.» Leefii naakookun naacimpɔɔŋwuee nìn kíí ki gbíntì niin. 11U nìn kíí ki kāl̀ Miika dicaŋkun ní Miika dū-u ki ŋá kii úǹ u-ba jipɔɔn ubɔee. 12Miika nìn dū usaraaŋal tundi ki ŋúbiǹ Leefii naakookun naacimpɔɔŋwuee. U nìn kíǹ ki kóò Miika dumpu ní. 13Niinee ní Miika lī yii: «Min bí nee, m nín ká Leefii naakookun niliu ú nīn sá m-saraaŋaliu nee, m lafun béè yii ti-Dindaan làá dàkà-mi u-ŋanti dee!»
Currently Selected:
Juges 17: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
