Exode 20

Unimbɔti tīī u-nibul marab saalaa

(Kpèè Ditee 5.6-21)

1Niinee ní Unimbɔti sòon̄ nì Isirayeel yab tibɔti nee yii:

2«Man di sá a-Dindaan a-Nimbɔtiu un nyántìń-si kuyuŋun Eejipiti tiŋkinee.

3Á taa jāam̀ unimbɔti ubɔ kí kūtì man pu.

4Á taa mɔ́ɔ́ diwaal diba kí nántíǹ tiba tin bí yilpuee àá tin bí kitiŋ pu taapu dooyee àá tin bí nnyimin kitiŋ taapuee. 5Ní taa gbàan̄ awaa gbanti nimbiin ní kaa nín jáam̀-ŋi#20.5 B. 4-5: kpèè 34.17, Akoo 19.4, 26.1, Ditee 4.15-18, 27.15.. Di sá yii man di sá a-Dindaan a-Nimbɔtiu, Unimbɔti un cáá ipoompoonee. Ubɔ yaa ná-mee, m dátí udaan tafal ní kí dāá dáaĺ u-biyaamu mun tafal kí cáá sāā anaantitɔntɔkɔ ata kii anaa pu. 6Ama bin néeń-mi ki ŋúb́ m-marabee, m ŋáań-bi tiŋan ní kí cáá sāā anaantitɔntɔkɔ kutuku pu#20.6 B. 5-6: kpèè 34.6-7, Dikà 14.18, Ditee 7.9-10, dūú ŋmàntī nì Eesee 18..

7Á taa nín̄ yíì man a-Dindaan a-Nimbɔtiu yindi fám fám, kun puee man a-Dindaan kaa làá dūú pɔ̄ un ŋáań mimmee#20.7 Kpèè Akoo 19.12..

8Á nīn tɔ́ ŋwiŋŋuŋfikaa ŋú nīn sá circir wiiŋŋu ki tīī-si. 9A cáá iwiin iluu kí tɔ̄ ditundi, kí ŋá tin kɔkɔ a cáá kí ŋée. 10Ama ŋwinluluúti dal sá ŋwiŋŋuŋfikaa ní, ŋwiin ŋun a dūu sú man a-Dindaan a-Nimbɔtiuee. Á taa tɔ̄ báà ditundi diba ŋwiin gbanti. Sii a-baaa, a-jipɔmbaaa, a-bisalibaaa, a-tɔntɔnliibi bininjab nì binimpoobaaa, a-waŋkutaaa, binicambi bin kóò a-pueeyaaa, ubɔ ń taa tɔ̄ ditundi. 11Di sá man ni-Dindaan dū iwiin iluu ní ki náań yilpu nì taapu, nì tiŋku nì tin kɔkɔ bí u-poonee, ní ŋwinluluúti dalee m kāl̀ ki ŋūŋfì. An pu ní ti-Dindaan bīiǹ ŋwiŋŋuŋfikaa gbanti pu, ní ki dū-ŋu ki sú u-ba#20.11 B. 8-11: kpèè 16.23-30, 23.12, 31.12-17, 34.21, 35.2, Diny 2.1-3, Akoo 23.3..

12Á nīn tɔ́ a-baa nì a-na ní kí ŋmā kí kàl̄ kitiŋ kin ti-Dindaan Unimbɔti làá tīī-see poon kí yúntí#20.12 Kpèè Ditee 27.16, Maat 15.4, 19.19, Maar 7.10, 10.19, Luuki 18.20, Eef 6.2-3..

13Á taa kpɔ̀ unil#20.13 Kpèè Diny 9.6, Akoo 24.17, Maat 5.21, 19.18, Maar 10.19, Luuki 18.20, Room 13.9, Yaku 2.11..

14Á taa ŋá tilaakpaal#20.14 Kpèè Akoo 20.10, Maat 5.27, Maar 10.19, Luuki 18.20, Room 13.9, Yaku 2.11..

15Á taa yɔ̀#20.15 Kpèè Akoo 19.11, Maat 19.18, Maar 10.19, Luuki 18.20, Room 13.9..

16Á taa lēē inyimɔn seerau kí túń a-juti pu#20.16 Kpèè 23.1, Maat 19.18, Maar 10.19, Luuki 18.20..

17Á taa nín̄ cáá a-juti diiku pu nnimbitaataam, kí taa nín̄ cáá a-juti nimpuu àá u-tɔntɔnliu uninja àá unimpu àá u-naau àá u-maŋki àá tin pée sá a-juti wantee pu nnimbitaataam#20.17 Kpèè Room 7.7, 13.9..»

18Isirayeel yab kɔkɔ nìn gbìl̄ itaatantati nì ŋyin pu, ki ká itaaŋmɔŋmɔ nì dijool din pu nnyiim bīīyee, ní ki fāŋkì yɔ́kɔ́ yɔkɔ ki yúń kudandaŋu. 19Ní bi bí Mooyiisi yii: «Sii ní ń sòoǹ nì ti a-ba tí ŋmā kí gbìl̄. Ama Unimbɔti u-ba ń taa ti sòoǹ nì ti, an yaa kaa sá míǹ ti làá kpú#20.19 B. 18-19: kpèè Eebru 12.18-19..» 20Ní Mooyiisi bí-bi yii: «Taa fàŋkìmaan! Unimbɔti là kí cɔ̄ŋkì-ni kí kpèè ní, an pu ní u dɔ́miń ni-cee. U là ní nīn tɔ́-u ní kí taa ŋá ikpiti.» 21Samaa kɔkɔ nìn yúń kudandaŋu, ama ní Mooyiisi sútìi pìl̄ ditagbambɔndi din poon Unimbɔti nìn kēe.

Mara un bi yóoǹ nsaraafan puee

22Ti-Dindaan bí Mooyiisi yii: «A nín làá tùkù Isirayeel yab tibɔti tiŋyee sèé: <Kéè nimbi ni-ba ká yii doooo yilpu ní m sòon̄ní nì naa! 23Ní taa dū animbil kúti nì sindaariya kí mɔ́ɔ́ awaa kí dū-ŋi kí ŋàl̄-mi. Ní taa mɔ́ɔ́ awaa gbanti kí yóoń ni-ba. 24Ní dāá mā-mi titan saraafaŋŋu ŋun pu ni làá dāá nīn cáá ni-naai nì ni-piii nì ni-ŋoobui kí ŋáań-mi bisaraawɔkaabi nì mpèé saraabee. Laakin kamaa ní m yaa láa lēē m-ba ki dàkēe, m làá dāá nīn bí niin kí bìin̄ ni-pu. 25Ama ni yaa làá dū ataŋkpee kí mā nsaraafanee, ní taa dū ataŋkpee ŋin bi kpítèe kí mā, di sá yii ni yaa dū kigaai ki kpítèe, ni kɔ́ǹ-ŋi tijɔkɔndi dee#20.25 Kpèè Ditee 27.5-6, Joos 8.31.. 26Ní taa mā nsaraafan án nín bí yilpu yilpu bi tà ki jɔ́ḿ, án nín làá ŋá pu bí taa ká un còom̄ ki jɔ́ḿee cancaŋgbeelee.>»

Currently Selected:

Exode 20: BASSARDC

Highlight

Copy

Compare