Exode 19

UNIMBƆTI PŌOǸ ISIRAYEEL YAB DIPOONDI (19–24)

Unimbɔti là kí pòon̄ Isirayeel yab dipoondi

1Isirayeel yab nín nìn nyáń Eejipiti tiŋkinee, iŋmal ita wimpeepeekaaŋu deedee ní bi bàn̄ Siinaayi teekun. 2Bi nìn yíkì Reefiidiim ní ki dūu bàn̄ Siinaayi teekun ki ŋātì ŋkaa niin ki túĺ dijool. 3Ní Mooyiisi dàb̄ dijool ki nín cá Unimbɔti cee.

Ti-Dindaan nìn bíń dijoolee yilpu ki yíiń-u ní ki bí-u yii: «Á tùkù Jaakɔb naantiibi Isirayeel yab yii: 4<Ni ká tin m ŋá Eejipiti tiŋkee, nì m nín yōoǹ-ni m-feeŋyi pu kii ukaalunee ki cáań-ni m-ceeyee. 5Kɔŋkɔnnee ni yaa pílifì m-nyɔkɔ, ki ŋúb́ m-pooŋyee, inifunaan kɔkɔ kansikinee, nimbi di làá nīn sá man m-ba bindi pu nibul. Di sá yii man di yì kitiŋ kɔkɔ. 6Ama nimbee, ni làá nīn sá man beelin saraaŋaliibi, ní kí nīn sá ditimbundi din sá man yal ki tūǹ m-tundee#19.6 M-beelin saraaŋaliibi ŋūǹ kí nīn sá dinibul din tūǹ disaraaŋal tundi, an dàkà yii binib bin yú Unimbɔti nì atimbun ŋin kíǹee kansikinee, ní ki gíti ŋūǹ kí nīn sá dinibul din bisaraaŋaliibi kpòotī an kaa sá bibɔtiibee. - B. 5-6: kpèè Ditee 4.20, 7.6, 14.2, 26.18, Tiiti 2.14, 1 Peet 2.9, Dilee 1.6, 5.10..> Tibɔti tin a làá cáá nàatī Isirayeel yabee dee.»

7Mooyiisi bāańee ní ki yíiń Isirayeel yab kpilib ní ki dū tibɔti tin kɔkɔ ti-Dindaan tùkūń-uee ki bíl̀ bi-nimbiin. 8Ní dinibul kɔkɔ kíí yii: «Tin kɔkɔ ti-Dindaan lēe, ti làá ŋá míǹ.» Ní Mooyiisi gíiǹ bi nín kíí puee ki tùkū ti-Dindaan. 9Niinee ní ti-Dindaan bí Mooyiisi yii: «Kpèè, m làá dāan̄ a-cee kí nīn kāń ditagbancancaal din gbìfèe poon kí sòoǹ nì si ní dinibul ń nīn gbìl̀ m nín bíi sòoǹ nì see, án nín làá ŋá pu bí nīn cáá a-pu dimákal baabadalee.» Ní Mooyiisi cáá Isirayeel yab nín kíí puee ki tùkū ti-Dindaan.

Unimbɔti nì Mooyiisi kpáfì Siinaayi jool pu

10Ní ti-Dindaan bí Mooyiisi yii: «Cù samaa cee kí tùkù-bi yii bí nīn bí circir díǹ nì fool, kí fíntí bi-wampeeŋkaati. 11Bí bɔ́ntí bi-ba kí nīn cí winta dal, di sá yii yaadalee, m làá kpákatiń kí nīn bí Siinaayi jool pu, dinibul kɔkɔ nimbiin. 12Á yóoń-bi kikpaanyɔkɔ kí màntīí tū dijool, ní kí tùkù-bi yii: <Ubɔ ń taa dàb̄ dijool, kí taa gbēē di-kpaanceetiŋu.> Un kamaa yaa gbēē-dee làá kpú. 13Baa làá gbēē udaan, ama ataŋkpee àá ipiin ní bi làá dūú yāŋkì-u kí kpɔ̀. An yaa sá unilaaa, kuwaŋkuluuaaa, udaan ń taa ŋmátí. Bi yaa láa búń ŋyin baba ní biba dāa ŋūǹ kí jɔ̄m̀ dijool#19.13 biba : kpèè 24.1,9-11. - B. 12-13: kpèè Eebru 12.18-20..» 14Mooyiisi kpákatìń dijool puee ní ki yāntì samaa kɔkɔ bɔ́ntì ki bí circir, ní ki fíntì bi-wampeeŋkaati. 15Míǹ boonee ní u bí samaa yii: «Ní bɔ́ntí, iwiin ita nee poonee, ubɔ ń taa gbēē unimpu.»

16Winta dal kutaafaauee ní ditagbancancaal din gbìfèe dɔ́miń ki yúl̀ dijool pu, ní utaa bí ki tátí ki ŋmóò#19.16 utaa bí ki tátí ki ŋmóò: kpèè Dilee 4.5. dijoolee pu. Bi nìn gbìl̀ ŋyin búǹ ki pɔ̄ɔ̄ kpaŋkpam. Tifaandi nìn kɔ́ samaa kɔkɔ dinaapaal pu ní bi-wunti jìkì. 17Mooyiisi nyántì samaa kɔkɔ dinaapaal pu bí cù Unimbɔti nimbiin, ní bi bàn̄ ki yúl̀ dijool taapu. 18Siinaayi jool kɔkɔ nìn kpántì ŋŋminyiim ŋma ní, kun puee ti-Dindaan nìn kpákatìń ŋŋmi poon. Ŋŋminyiimee nìn nyēē ki jɔ́ḿ kii kipaai ŋminyiimee, ní dijool kɔkɔ nìn cīŋkì tiŋan tiŋan. 19Ní ŋyinee mɔ̀tīi búǹ ki pɔ̄ɔ̄ kpaŋkpam. Mooyiisi nìn sòoǹ ní Unimbɔti kíikí-u mpɔn itaatantati poon.

20Míǹ ní ti-Dindaan nìn kpákatìń Siinaayi jool yilpu kúnti kunti, ní ki yíiń Mooyiisi u jɔ́m̀ u-cee niin. 21Ti-Dindaan nìn bí Mooyiisi yii: «Kpákatí kí cù samaa cee kí tùkù-bi yii bí taa ŋá kìrikiri yii bi là kí wāl̀-mi, án yaa sá fám, bi-kansikin binib tikpil làá kpú. 22Bisaraaŋaliibi bin làá sútiń kí pìl̄-mee gba ń bɔ́ntí bi-ba kí nīn bí circir, án yaa sá fám, m làá kpɔ̀-bi.» 23Ní Mooyiisi bí ti-Dindaan yii: «Samaa kaa ŋūǹ kí jɔ̄m̀ Siinaayi jool pu, kun puee a yóoǹ-ti mara yii tí yóoń kikpaanyɔkɔ kí màntīí tū dijool ní samaa ń nīn yúń kudandaŋu.» 24Niinee ní ti-Dindaan bí Mooyiisi yii: «Kpákatí, si nì Aarɔn ń fàtīí jɔ̄mìń. Ama bisaraaŋaliibi nì samaayee ń taa ŋá kìrikiri yii bí làá jɔ̄mìń man cee, án nín làá ŋá pu bí taa kpúee.» 25Ní Mooyiisi kpákatìń samaa cee, ní ki dū an bɔtee ki tùkū-bi.

Currently Selected:

Exode 19: BASSARDC

Highlight

Copy

Compare