Deutéronome 34

Mooyiisi kúm

1Niinee Mooyiisi dūu dī Moowaab tantakal ki dàb̄ Neeboo jool ki tin jɔ́m̀ Piisga jool yilpu. Piisga jool gbanti nìn bí Jeeriikoo tiŋki nyɔkɔpu ní. Niin ní ti-Dindaan nìn dàkā-u kitiŋ kɔkɔ, ki yōoǹ Galaadi ki tin cáa sāā Daani tiŋki, 2ki kpáaǹ Neefitalii tiŋki kɔkɔ nì Eefiraayiim nì Manasee tiŋki nì Juuda tiŋki kɔkɔ ki tin cáa sāā tiŋku ŋwìiń jeetilaŋki pú, 3nì Neegeeb tiŋki nì Jɔɔdan tantakal ki yōoǹ Jeeriikoo ibafi tiŋki, ki tin cáa sāā Soowaar. 4Niinee ní ti-Dindaan tùkū-u yii: «Kpèè, kitiŋ kin m nìn pōoǹ yii m làá tīī Abraam nì Isaaki nì Jaakɔbee dee. M nìn tùkū-bi yii: <M làá dāá dū-kì kí tīī ni-naantiibi ní#34.4 Kpèè Diny 12.7, 26.3, 28.13..> M yāntì a wál̀ kitiŋ gbanti nì a-nimbiliŋ, ama aa làá nín kɔ́ ki-ni ní.»

5Míǹ boonee ní ti-Dindaan tɔntɔnliu Mooyiisi kpíì Moowaab tiŋkin niin kii ti-Dindaan nín nìn lī puee. 6Ní ti-Dindaan síb́-u Moowaab tiŋkin ditantakalin, Beeti-Peewɔɔr tiŋki nyɔkɔpu. Ama báà ubɔ kaa nyí u-kaakul laŋki ki dāa sāā díǹ. 7Mooyiisi nìn cáá abin dilaataal nì mmuŋku ní ki kpíì. U nìn dáá pée gbíntìi wāĺ tiŋan ní, u-nimbiliŋ kaa pēefì, ní ki nìn gbíntìi dáá cáá u-pɔŋŋu mun.

8Isirayeel yab nìn súń Mooyiisi kpool iwiin mmuŋku nì saalaa ní Moowaab tantakalin. Míǹ boon ní Mooyiisi kpool kúntì. 9Ti-Dindaan nìn gbéeǹ Nuuni jipɔɔn Joosuwa Ŋfam min tīī-u dinyilee, di sá yii Mooyiisi nìn dū u-ŋalii ki páaǹ u-pu ki mēē#34.9 Kpèè Dikà 27.18-23.. An puee Isirayeel yab nìn pílifiǹ-u ní ki nìn ŋáań kii ti-Dindaan nín nìn kpáafì Mooyiisi yii bí ŋá puee.

10Baa ti ká Isirayeel tiŋkin Unimbɔti bɔnaatiliu ubɔ bí kii Mooyiisee. Mooyiisi nìn yūlifí ti-Dindaan nimbiin ní bi sòoǹ nì tɔb#34.10 Kpèè Disa 33.11.. 11Ti-Dindaan nìn tú-u Eejipiti tiŋkin u cūtìi ŋá maamaacikpaambi Faaroo nì u-kàliŋkpilib nì u-nib kɔkɔ nimbiin. 12Mooyiisi nìn dàkā mpɔŋkpaan nì maamaaci tuuŋŋi Isirayeel yab kɔkɔ nimbiin.

Currently Selected:

Deutéronome 34: BASSARDC

Highlight

Copy

Compare