Deutéronome 33
33
Mooyiisi mēē ki bīiǹ Isirayeel naakɔti pu
1Kí wàatī Unimbɔti niliu Mooyiisi ń kpúee, u nìn mēē ki bīiǹ Isirayeel yab pu.
2U nìn lī yii:
«Ti-Dindaan nyánní Siinaayi jool pu,
u nyáń ki páaǹní Seeyiir jool watil pú,
ní ki ŋmíntì u-samaau pu doooo Paaran jool pu.
U bāań Meeriiba Kadeesi.
Niin ní u nìn ŋúbiń marab bin jìl̀ee u-ŋaan kí tīī-bi.
3Tiŋman ti-Dindaan, a néeń Isirayeel naakɔti.
Bin kɔkɔ bí circiree bí a-ŋaan.
Bi gbāā a-taaŋi taapu kí fōō a-nyɔɔbundi.
4Marab bin ní Mooyiisi tīī-tee,
Jaakɔb naantiibi gaajawanti dee.
5Ŋyunti ŋun samaa kpilib nìn kpáfì
ki kpáaǹ Isirayeel naakɔti kɔkɔee,
ti-Dindaan di nìn sá Yeesurun#33.5 Yeesurun, an dàkà yii Isirayeel àá Jaakɔb. bɔtiu.»
6Ní Mooyiisi kútì ki lī yii:
«Rubeen naakooku ń nīn bí dimaŋfalin kí taa kpú,
u-nib bin pátèe mun ń nīn bí dimaŋfalin.»
7U sòon̄ Juuda naakooku pu yii:
«Ti-Dindaan, pīlifì Juuda neen,
kí cáań-u u-yab cee bí ŋá ubaanti.
Ú mɔ̄tì u-ba pu nì tininjati.
Tūtuǹ-u ú jáǹ u-nannanliibi.»
8U sòon̄ Leefii naakooku pu yii:
«Ti-Dindaan, a dū a-Tumiimuu nì a-Uriimuu
ki tīī unil un fáatiǹ-see ní.
A nìn cɔ́ŋkì-u Maasa,
sii nì u nìn kpáká Meeriiba nyim laŋki#33.8 a-Tumiimuu nì a-Uriimuu: kpèè Disa 28.30 nì tin bi ŋmàn̄ kugbɔŋu faaku taapuee. - Maasa, Meeriiba: kpèè Disa 17.1-7, Dikà 20.1-13..
9U dàkā a-pu dineendi ki jítiǹ u-baa nì u-na pu,
ki jítiǹ u-nabiyaamu nì u-biyaamu pu.
Di sá bi nìn ŋúb́ a-nyɔɔbundi,
ní ki nìn ŋúb́ a-poondi#33.9 Tibɔti gbanti gíti kā Disa 32.25-29..
10Bíǹ di dàkà Jaakɔb yab a-koobiliŋ,
ki dàkà Isirayeel yab a-marab.
Bíǹ di tùutī talaalub ki tìì-si,
ki ŋáań saraawɔkaa a-saraafaŋŋu pu.
11Ti-Dindaan, mɔ̀tīí kūtì-bi mpɔn,
yàntī bi-ŋaan tuuŋŋi ń fáatiǹ-si.
Fáá kí tàtī bin yíkì kí jáǹ-bee cammu,
bin ná-bee ń taa ti ŋmā kí yīkì.»
12U sòon̄ Beenjameen naakooku pu yii:
«Ti-Dindaan bineeŋkaaki,
ú nīn bí ŋgbansɔŋfin u-Nimbɔtiu cee.
di sá úǹ di wúń u-pu baabadal,
ní ki kóò u-gbantammu kansikin.»
13Mooyiisi sòon̄ Jooseefi naakooku pu yii:
«Ti-Dindaan ń bìin̄ u-tiŋki pu,
kí tīī-kì dimalindi din nyēeń yilpuee,
nì nnyim min nyēeń kitiŋ taapuee,
14kí tí tīī-kì tikpaajin timɔntiil tin ŋwìiń yàntī an nyēēyee,
nì asubimɔnti ŋin lòoǹ uŋmal kamaayee.
15Tijimmɔntiil ń lòoǹ ki-jooŋŋi ŋin bí doooo jaanjaanee pu,
asubimɔnti ń lòoǹ ki-gbantammu mun bí doooo cannaakuee pu.
16Tigaajati tin gbí kitiŋ nee puee
nì ti-Dindaan un nìn nyántì u-ba kisugbooi poon ki dàkēe
biindi ń dāan̄ kí nīn bí Jooseefi pu,
úǹ un sá kii ubɔti u-nabiyaamu kansikinee#33.16 B. 13-16: kpèè Diny 49.25-26. - kisugbooi poon ki dàkā: kpèè Disa 3.1-6. - u-nabiyaamu kansikinee: kpèè Diny 37.5-11, 44.14..
17U sá unaja un sá dibiseemalee, ki cáá tinyool.
U-yiŋyi bí kii upɔɔnaa yiŋyee,
íǹ ní u làá nīn cáa gbáà atimbun nib
kí cáá sāā kitiŋ kúntilaŋki.
Míǹ ní Eefiraayiim naantiibi cutimaanyee bí,
míǹ ní Manasee naantiibi kutukub kutukubee bí.»
18Mooyiisi sòon̄ Sabulɔn nì Isakaar naakɔti pu yii:
«Sabulɔn, án nīn mɔ̄ǹ-si a-saŋkindi poon.
Isakaar, án nīn mɔ̄ǹ si mun a-tantib poon!
19Ni làá dāá yíiń anibul dijool pu,
kí dāá ŋá saraabi kii bi nín síiǹ mara puee.
Di sá yii ni-gaajati làá dāá nyānní dimɔɔl pu,
ní tiwammɔntiil tin bál̀ee ń dāá nyānní dibulin.»
20U sòon̄ Gaadi naakooku pu yii:
«Nyɔ̄ŋkìmaan ti-Dindaan un wàantí Gaadi tiŋkee!
Gaadi dɔ̄ kii gbikintee ní.
U yaa cúú kuwaŋkuluuee, u tɔ̀ntī-ku ní,
kí yòon̄ ataa kí cáá sāā diyil.
21U lēē kitimmɔntii ki gāā u-bindi,
u dū dijandi din sá ubɔti yalee kí síiǹ u-ba.
U dɔ́miń ki kútì samaa kpilib pu ki ŋá kii ti-Dindaan nín là puee,
ní ki sòoǹ ti-Dindaan bɔkpaaŋi ŋin u nìn tīī Isirayeel yabee pu#33.21 ki kútì...: kpèè Dikà 32.16-18..»
22Mooyiisi sòon̄ Daani naakooku pu yii:
«Daani sá kii digbikintipɔmbil
din wúliń doooo Baasan tiŋkinee ní#33.22 Dūú ŋmàntī nì Diny 49.17, Joos 19.47..»
23U sòon̄ Neefitalii naakooku pu yii:
«Ti-Dindaan gbéeǹ Neefitalii
u-ŋanti nì u-biindi.
Úǹ di làá nīn yì kitiŋ kí yòon̄ ŋwìiń jeetilaŋki kí cáá cùnnì ŋgiil pú.»
24U sòon̄ Aseer naakooku pu yii:
«Jaakɔb biyaamu kansikinee,
Aseer ń nīn sá un boon ti-Dindaan bīiǹ tikpilee,
u-nabiyaamu ń nīn néeń u-bɔti
ní u-taaŋi ń nīn dēē ɔliifi kpamin.
25U-kampiiŋi ń dāá nīn sá tikúti nì tasa kúti,
ú dāá nīn cáá mpɔn kí cáá sāā u-kúm dal!»
26Ní Mooyiisi nìkī ki lī yii:
«Yeesurun Nimbɔtiu kaa cáá juti.
Úǹ di sá ukpaan ki kāń atagban pu ki jàkàń
ki pùntī kutaa kí dāá jòoń-si.
27Unimbɔti un bí jaanjaanee di sá a-taŋkpanaakooku.
U dàkà u-pɔŋŋu taapu doo baabadal.
Úǹ di jìn̄ a-nannanliibi a-nyɔkɔpu,
ní ki bí-si yii á kpɔ̀ kí céetí-bi!
28«Isirayeel yab bí ŋgbansɔŋfin,
Jaakɔb naantiibi bí dibatɔlin.
Bi tàkā bilee nì ndapɔm tiŋkin,
kitiŋ kin pu dimalindi nyēeń yilpu ki tòóyee.
29«A bí mmɔnneeee Isirayeel!
Ŋma di bí kii sii dinibul din ní ti-Dindaan fīīyee?
Ti-Dindaan di sá a-gbampɔɔl, ki sá un tútúǹ-see.
U sá kitàataajiki kin tìì-si dijajilee.
A-nannanliibi làá dāá gbàan̄ a-nimbiin
ní á dāá tāā bi-waapaaŋyi pùb.»
Currently Selected:
Deutéronome 33: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
