Deutéronome 25

Ubɔsoonli ń sòoǹ tibɔti ti-pú

1Binib bili yaa jáàyee, bí cù kubɔsoondiin ní bibɔsoonliibi ń sòoǹ bi-bɔti kí pɔ̀ un bɔti ŋān̄ee ní kí kpɔ̀ un bɔti kaa ŋān̄ee bɔti. 2An yaa sá bí gbá un jíń dibɔkpilee, ubɔsoonli ń yàntī ú dòon̄ kitiŋ u-nimbiin ní kí yàntī bí gbá-u anaalab. U-bɔkpil nín bàlifī bí gbá-u puee, míǹ ní bi máaǹ kí gbá-u. 3Ama ubɔsoonlee kaa máaǹ kí yàntī bí gbá-u kí jītí anaalab imuŋku ili pu#25.3 Kpèè 2 Kɔra 11.24.. Kun puee bi yaa gbáń-u an jítì míǹ puee, ni kíǹ ki bíi kpèé ki sìŋkīǹ ni-nabiki dee.

Unaa

4Ní taa bóob́ unaa un tà ki gbátí adibilee nyɔkɔ#25.4 Kpèè 1 Kɔra 9.9, 1 Tiim 5.18..

Ukpiipu un kaa cáá kibikee bɔti

5Nnabiyaamu di yaa bí ní ki kóò dicilpu, ní bi-kansikin ubɔ yaa cáá unimpu kaa láá màl̄ kibiki ní ki kpíì ki fá u-nimpuuee, ukpiipuee kaa máaǹ kí nyā kudicaŋuee poon kí cùú mɔ̄ǹ ubɔ laaba. U-cal nabiki kiba di fòol̄-u kí cáá ní kí ŋá kii mara nín bālifì puee. 6U-cal nabikee yaa cáá-uee, kibininjabiki kipeekaai kin u làá màal̀ee di làá téeǹ utaŋkpiilee yil u-yindi ń nīn bí ki cá jaanjaan Isirayeel tiŋkin#25.6 B. 5-6: kpèè Maat 22.24, Maar 12.19, Luuki 20.28..

7Ama uninjee yaa kaa là kí fōō u-nabiki kpiipuuee, ukpiipuee ń cù kí ká bitindaŋkpilib, kitiŋ punyɔkɔpu ní kí tùkù-bi yii: «M-cal nabiki kaa là u-nabiki utaŋkpiil yindi ń nīn bí ki cá Isirayeel yab kansikin. M-cal nabiki yíì kaa là kí ŋá min u máaǹ kí ŋá kí tīī-mee.» 8Niinee ní bitindaŋkpilib ń yíiń-u tibuul ní kí sòoǹ nì u. U yaa gbíntìi tɔ́kɔ́ ki lì yii: «Maa là kí fōō ukpiipuee», 9ní ukpiipuee ń còom̀ kí cù u-nimbiin bikpilib nín kā puee, ní kí tákatí u-naatakal diba ní kí tíiĺ kí pɔ̀l̄ u-nimbiin ní kí lì yii: «Bi nín ŋáań unil un kaa là kí màal̀ kí téeǹ u-nabiki yilee puee dee!» 10Niinee ní Isirayeel tiŋki poonee bí pɔ̄ kijapaai gbanti dicaŋku diyindi yii: «Un taalin bi tákatì dinaatakalee dicaŋku.»

Kujaau poon laakin baa máaǹ kí cúúyee

11Bininjab bili yaa bíi jáà ní un bi bíi gbáàyee nimpuu yaa bàà cūtì kí fīī u-cal un bíi gbáà-uee ŋaan, ní u yaa tāntì u-ŋal ki cúú un bíi gbáà u-calee ninjatee, 12ní gāā kí gùutī u-ŋal. Ní taa sɔ̄ u-saai báà fiii pu.

Nnyiŋfi nì mpúun ŋmàntitam bɔti

13Ní taa nín̄ cáá ni-lookun tikúti tin bi cáa ŋmàntī nnyiŋfee mili pu, diba ń nīn nyìm̀, din kíǹee ń taa nín̄ nyìm̀ ní nīn cáa mùul̄. 14Ní taa nín̄ tí cáá ni-dumpu asambiŋmantikaa mili pu, diba ń nīn sá dikpaandi, din kíǹee ń nīn sá kiwaai. 15Ni máaǹ tikúti tin ni cáa ŋmàntī nnyiŋfee ń nīn sá deedee kúti, ní asambil ŋin ni cáa ŋmàntī tiwanee ń nīn sá deedee sambiliŋ. Mimmee ni làá kàl̄ kitiŋ kin ti-Dindaan ni-Nimbɔtiu làá tīī-nee poon kí yúntí. 16Di sá yii bin kɔkɔ ŋáań míǹ ki cáa mùul̄ee sá ntimbiil nib ní ti-Dindaan ni-Nimbɔtiu nimbiin#25.16 B. 13-16: kpèè Akoo 19.35-36..

Bi nín máaǹ kí ŋá Amaleeki yab puee

17Ní téetímaan Amaleeki yab nín nìn ŋá-ni pu ŋyunti ŋun ni nìn nyáń Eejipiti tiŋkin ki dòońee. 18Ŋyunti ŋun ni nìn gīī kaa ti pée ŋūǹ kí ŋá tibee, ní bi cílìń ni-boon pú ki nāaǹ bin nìn pánní boonee. Baa nìn fāŋkì Unimbɔti báà fiii. 19Ti-Dindaan ni-Nimbɔtiu yaa láa nyántì-ni ni-nannanliibi bin māntì ki tú-nee ŋaan ki tīī-ni diŋuŋfil kitiŋ kin u làá dūú tīī-ni ní nīn kíǹ ki yèe poonee, ní dāá kpɔ̀ kí céetí Amaleeki yab kitiŋ pu, án nín làá ŋá pu báà ubɔ ń taa ti téetí bi-puee. Ní taa súntí tibɔti gbanti#25.19 B. 17-19: kpèè Disa 17.8-14, 1 Sami 15.2-9.!

Currently Selected:

Deutéronome 25: BASSARDC

Highlight

Copy

Compare