Deutéronome 24

Unimpu un bi jìn̄ee bɔti

1Ubɔ yaa cáá unimpu ní ki ká yii unimpuee bɔti kaa ti mɔ̄ǹ-u kun puee u ká u-pu tibee, ú ŋmà kugbɔŋu#24.1 Kpèè Maat 5.31, 19.7, Maar 10.4. kun dàkà yii u jìn̄-uee kí ŋúbíǹ-u ní kí nín jà-u u-cindi. 2Unimpuee yaa búntì ní ki tin ká uninja ubɔ ki mɔ́ǹ, 3ní uninja liliiti un u mɔ́ǹ gbantee mun yaa bí yii waa ti là-u ní ki mun ŋmàn̄ gbɔŋku kun dàkà yii u jìn̄-uee ki ŋúbiǹ-u ní ki mun tí jìn̄-u u-cindi, àá tí lì yii u-cal liliiti gbanti kpíì. 4Niinee, u-cal peepeekaa un nìn jìn̄-uee kaa ti cáá nsan kí fàtīí cáá-u, di sá yii unimpuee kɔ́ tijɔkɔndi. Waa ti ŋūǹ kí cáá-u. U yaa fātìi cáá-uee, an sá ntimbiil tundi ní ti-Dindaan nimbiin. Ní taa kɔ́ǹ kitiŋ kin ti-Dindaan ni-Nimbɔtiu làá dūú tīī-ni ní nīn kíǹ ki yèe tijɔkɔndi.

Uninja un cáá unimpucaanee

5Uninja un cáá unimpucaanee kaa máaǹ kí cù kujaau. Baa máaǹ kí tīī-u ditundi diba mun ú tɔ̄. U cáá dibimmɔndi kí tɔ̄ u-ba kí kàl̄ mmɔŋki kí kɔ̀ntī unimpu un u cááyee nimbiliŋ.

Toolima bɔti

6Ubɔ yaa cáá-ni dipɔndee, ní taa cùú yòon̄ u-naaku toolima, kí taa yòon̄ u-namintidɔŋu gba. Ni yaa ŋá mimmee, an bí kii ni fōō kun u ŋáań ki jīǹ ki bí dimaŋfalinee ní toolima.

Unil un bi cúú mpɔnee

7Ni yaa ká ubɔ cúú u-nabiki Isirayeel nib kansikin ubɔ ki dū-u ki kpántì u-yumbuu àá u dū-u ki nyáfèe, ní kpɔ̀ udaan. Ní ŋá míǹ kí nyāntí ikpiti ni-kansikin#24.7 Kpèè Disa 21.16..

Dinyaŋgbandi bɔti

8An yaa sá dinyaŋgbandi weeŋŋu jandee, ní kpèè tiŋan kí ŋá kii Leefii yab bisaraaŋaliibi#24.8 Dinyaŋgbandi bɔtee, kpèè Akoo 13-14. - Leefii yab bisaraaŋaliibi bɔtee, kpèè 17.9 nì tin bi ŋmàn̄ kugbɔŋu faaku taapuee. nín dàkā yii ní ŋá puee deedee. Ni máaǹ kí ŋá tin m kpáafì-bi bí dūú dàkà-nee. 9Ní téetí ni nín nyáń Eejipiti tiŋkin ki dòoń ti-Dindaan ni-Nimbɔtiu ŋá Miiriyam pu nsannee#24.9 Kpèè Dikà 12.10..

Toolima bɔti tiba mun

10Ni yaa pīnnì ni-juti tibee, ní taa bìl̄ kí kɔ́ u-dumpu kí yòon̄ tiba toolima. 11Ní nīn yú mmɔŋki ní ni-pɔnliu u-ba ń cáań-ni kun u làá dūú tīī-ni toolimee. 12Udaan yaa sá usoodaan ní ki yaa dū u-satabiiŋkaau ki tīī-ni toolimee, ní taa yàntī kutaa ń wúntí u-toolimau gbanti pu ni-dumpu. 13Ní fàtīí gíiǹ u-satau kí tīī-u ní ŋwìiń ń nín jēetí, án nín làá ŋá pu ú ŋmā kí ká kí bìin̄ kunyeeuee. Ni yaa ŋá mimmee, u làá mèè kí bìin̄ ni-pu ní án nīn sá min kítì ti-Dindaan ni-Nimbɔtiu ceeyee#24.13 B. 12-13: kpèè Disa 22.25-26..

Bí nīn tɔ́ usoodaan

14Ní taa mùul̀ upaadaan un sá usoodaan kaa cáá tibee. An yaa sá ni-nabiyaamu Isirayeel yab ubɔ àá binicambi bin kóò ni-tiŋkinee kansikin ubɔɔɔ, ní taa mùul̀ udaan. 15Ní pà u-paati ní ŋwìiń ń nín jēetí, di sá yii u sá usoodaan, ní animbil gbanti pu ní u máká. An yaa kaa sá mimmee, u làá tīminsì ti-Dindaan kí tɔ̄ ni-pu ní ní kɔ́ ikpitin#24.15 B. 14-15: kpèè Akoo 19.13..

Unil kamaa kpitii pu ní bi làá kpɔ̀-u

16Baa máaǹ kí kpɔ̀ bibaatiibi bi-biyaamu kpitii pu, kaa tí máaǹ kí kpɔ̀ mbiyaamu bi-baabi kpitii pu. Báà ŋma kpitii pu ní u máaǹ kí kpú#24.16 Kpèè 2 Bib 14.6, 2 Kroo 25.4, Eesee 18.20..

Bi nín máaǹ kí ŋá bisoodambi puee

17Ní taa mùul̀ unicaan àá ditaŋkpiibil ibɔsoon poon, kí taa yòon̄ ukpiipu bɔkutil toolima. 18Téetímaan yii ni nìn sá iyumbu ní Eejipiti tiŋkin ní ti-Dindaan ni-Nimbɔtiu dá-ni ki líì#24.18 B. 17-18: kpèè 27.19, Disa 23.9, Akoo 19.33-34.. An pu ní m kpáafí-ni ní ŋúb́ tibɔti nee.

19Ni yaa bíi cēē ni-kpaajinti ní ki yaa súntì dibɔ́ndi diba pu boonee, ní taa fàtīí gítí ni-boon kí yòon̄-dì. Ní yàntī-dì, binicambi nì ataŋkpiibil nì bikpiipoobi yaa bíi lúlifí ki tin kée, bí yòon̄ ní ti-Dindaan ni-Nimbɔtiu ń bìin̄ ni-tuuŋŋi kɔkɔ pu. 20Ni yaa kītì ɔliifi biliŋee, ní taa fàtīí gítí kí lūlifì. Ní yàntī abil ŋin kíǹ ki lúń busubu puee kí tīī binicambi nì ataŋkpiibil nì bikpiipoobi. 21Ni yaa tí kītì fiinyi biliŋee, ní taa fàtīí gítí kí lūlifì. Ní yàntī abil ŋin kíǹ ki lúńee kí tīī binicambi nì ataŋkpiibil nì bikpiipoobi#24.21 B. 19-21: kpèè Akoo 19.9-10, 23.22.. 22Ní taa súntí yii nimbi ni-ba nìn sá iyumbu ní Eejipiti tiŋkin. An pu ní m kpáafí-ni ní ŋúb́ tibɔti nee.

Currently Selected:

Deutéronome 24: BASSARDC

Highlight

Copy

Compare