2 Samuel 23

Daafiidi bɔjoolkaati

1Daafiidi bɔjoolkaati sɔ̀.

Jeesee jipɔɔn Daafiidi bɔti,

un ní Unimbɔti yōoǹ yilpuee bɔti sèé.

Jaakɔb Nimbɔtiu lēē-u ú nīn sá ubɔti,

Isirayeel yab laŋgaamɔntiu.

2Ti-Dindaan Fam dī m-pu ki sòon̄,

u-nyɔɔbundi kā m-nyɔkɔn.

3Isirayeel Nimbɔtiu sòon̄,

Isirayeel taŋkpanaakooku bí-mi yii:

«Ubɔti un di ŋúb́ binib deedee,

ki cáá Unimbɔti faaŋku ki kpòotī-bee

4bí kii ntaafaawìiń nín nyēē pu ki wāĺ bɔ́iii

kutaa kun pu atagban kpée ní.

Utaa yaa nìn̄ boonee, ŋu-tuntuŋku

yàntī kumɔsɔŋu nyēē.»

5Míǹ ní Unimbɔti ŋá m-dicaŋku,

di sá u pōoǹ-mi ipoon kí nīn pée cáa cá jaanjaan,

ní ki síiǹ marab bin làá nīn wúń ipoon gbanti puee.

U tīī-mi dijajil ijaan kɔkɔ pu,

ní ki ŋá tin kɔkɔ m lèe ki tīī-mi.

6Ama bin kɔkɔ kaa bí tibanee

bí kii ikuŋkum in bi féeńee ní.

Baa cútí-i mɔ̀b.

7Un yaa là kí gbēē-iee, see udaan ń dū kikpaŋ

àá ndɔ kí kùl̄-i kí tūū ŋŋmi dibɔbilin niin.

Daafiidi baatandambi

(Kpèè 1 Kroo 11.10-47)

8Daafiidi janjaliibi bin sá bibaatandambee yiŋŋi sèé.

Yooseeb-Baseebeeti uakimoonja nìn kútì bijanjakpilib bin nìn cí ubɔtee pu. Úǹ di nìn kūū binib alaataa anii kujabambaantiiu poon.

9Úǹ boonee Doodoo jipɔɔn Eelasaar di nìn pá. U-naanja nìn sá Ayooya tiŋkin ní. U nìn bí bibaatandambi bita bin nìn nóó Daafiidi bi cūtìi jáń nì Fiiliistii yab kujaau kubɔ poonee. Bíǹ nìn kpáfì kí já kujaau ní Isirayeel yab sáǹ. 10Ama Eelasaar nìn yúl̀ ki cíitì-bi, ki kūū Fiiliistii yab, áli u-ŋal dūu mɔ́ɔb́ ki nákáǹ dijigbandi. Ti-Dindaan nìn yāntì Isirayeel yab ká dijajikpaandi ŋwiin gbanti. Bijanjaliibi dāa fātìi gítìń Eelasaar ceeyee, an sá bí fūkul̀ anikpil wanti ní.

11U mun boonee, Agee jipɔɔn Sama di pá. U nìn sá Arari tiŋkin. Fiiliistii yab nìn kóoǹ ki kpáfì Leeyii tiŋkin. Lantiiyi kpaabu bubɔ nìn bí niin, ní Isirayeel yab fāŋkì ki sáǹ. 12Ama Sama úǹ nìn gbíntì bukpaayee kansikin, ki jáń ki pɔ́ɔkiǹ-bi ki fōō-bu. Míǹ ní ti-Dindaan nìn dī ki tīī Isirayeel yab dijajikpaandi.

13Kuceeu yuntiŋuee, bijanjakpilib bin cí ubɔtee bita nìn cūtìi ká Daafiidi Adulaam taŋkpalɔkɔlin. Di sá yii Fiiliistii janjakitil diba nìn cūtìi gāā bi-janjanaapaal Reefayiim tantakalin#23.13 Adulaam : kpèè 1 Sami 22.1.. 14Daafiidi nìn bí laakin u sáǹ ki bál̀ee, ní Fiiliistii yab fōō Beetileem ki kā niin. 15Ní kpɔkɔsi ubɔ cúú Daafiidi ní u bí yii: «Ŋma di làá cùú cáań-mi lɔkɔ un bí Beetileem punyɔkɔki caŋinee nyim ḿ nyɔ̀ dee?» 16Niinee bijanjaliibi bitee kɔ́ Fiiliistii yab janjanaapaalin, ki lúnní nnyim lɔkɔ un dɔ̄ Beetileem punyɔkɔki caŋinee ki cáań ki tīī Daafiidi. Ama u nìn yíì kaa nyùn̄-mì. U nìn dū-mi ki fá ti-Dindaan un máaǹ-mee ní. 17Ní u bí yii: «Ti-Dindaan ń cúú-mi ḿ taa nyɔ̀ nnyim nee! Mi sá-mi kii binib bin kaa mɔ́tì bi-ba pu ki cūtìi nyàabìń-mèe fatikuu ní.» Ní u yíì kaa nyùn̄-mì.

Bibaatandambi bitee nín nìn túń dituŋkpaandi diŋyee dee.

18Joowaab un na bi yíì Seeruyee naal Abisayi nìn kútì bijanjamɔntiibi bin nìn cí ubɔtee pu. Úǹ di nìn dū u-kpaŋki ki kūū binib alaataa ata kujaaun. An puee, u nìn nyáń diyindi kii <bibaatandambi bitee kitilee> ní. 19Áli gba u ká jilma ki jítiǹ bitee ní ki kpántì bi-kpiliu. Ama nì míǹ kɔkɔee, waa kɔ́ bitee kitil poon.

20Yooyadaa, ukabiseelja jipɔɔn Beenayawuu nìn sá ubaatandaan ubɔ naantiiu ní. Úǹ di nìn kūū bibaatandambi bili Moowaab tiŋkin. Ŋwiin ŋubɔ ntaayim bíi lítí ní u kɔ́ dinyimbɔbilin ki kūū gbikinti nsɔnsɔm yuntiŋu gbantin. U nìn túń atuŋkpaan kujaaun. 21Úǹ di nìn tí kūū ueejipitija ubɔ. Kijapaayee nìn yáà unil. U nìn ŋúb́ kikpaŋ, ní úǹ ŋúb́ ndɔ ki nín cá u-cee, ki bàn̄ ki fōō u-kpaŋki ki gíiǹ ki sāā ki kūū-u. 22Atuŋkpaan ŋin Yooyadaa jipɔɔn ŋá kujaaunee dee. An puee u nyáń diyindi kii bibaatandambi bitee kitilee. 23Áli gba u nìn ká jilma ki jítiǹ bibaatandambi mmuŋku nì saalaayee. Ama nì míǹ kɔkɔee, waa kɔ́ bitee kitil poon. An puee Daafiidi yōoǹ-u u kíǹ ki cí úǹ ubɔti.

24Dikitil mmuŋku nì saalaayee poonee, bin mun nìn gíti bée sèé: Joowaab naal Asayeel, nì Doodoo un sá Beetileemee jipɔɔn Eelanan, 25nì Sama nì Eelka, bíǹ liitil sá Aroodi tiŋkin, 26nì Eeleesi un sá Peeleeti tiŋkinee nì Ikeesi un sá Teekoowa tiŋkinee jipɔɔn Iira, 27nì Abiyeeseer un sá Anatooti tiŋkinee, nì Meebunaayi un sá Usa tiŋkinee, 28nì Salmɔn un sá Ayooya tiŋkinee, nì Marayii, un sá Neetoofa tiŋkinee, 29nì Baana un sá Neetoofa tiŋkinee jipɔɔn Eeleebi, nì Riibayi un sá Giibeeya, Beenjameen tiŋkinee jipɔɔn Itaayii, 30nì Beenayawuu un sá Piratɔn tiŋkinee, nì Adaayi un sá Gaasi bùmbiyaamu tiŋkinee, 31nì Abiyalbɔn un sá Beeti-Arabaa tiŋkinee, nì Asimafeeti un sá Bawuriim tiŋkinee, 32nì Eeliyaab un sá Saalbɔn tiŋkinee, nì Yaaseen jipɔmbi ubɔ un bi yíì Joonataŋyee, 33nì Sama un sá Arari tiŋkinee, nì Saraari un sá Arari tiŋkinee jipɔɔn Ayiiyaam, 34nì Akasibaayi jipɔɔn Eeliifeeleeti, u-naanja sá umaakaja, nì Ayiitoofeel un sá Giilɔn tiŋkinee jipɔɔn Eeliyam, 35nì Eesirayii un sá Kaarmeel tiŋkinee nì Paarayii un sá Araab tiŋkinee, 36nì Naatan un sá Sooba tiŋkinee jipɔɔn Igaal, nì Banii un sá Gaadi naakookunee, 37nì Seeleeki un sá Amɔn tiŋkinee, nì Narayii un sá Beerooti tiŋkinee. Úǹ di nìn tūntí Seeruya jipɔɔn Joowaab janjawanti, 38nì Iira nì Gaareeb bin sá Yeeteer tiŋkinee, 39nì Uurii un sá Itii tiŋkinee. Bi-kɔkɔ nìn kpáfì binib mmuŋku nì saalaa nì biluli ní.

Currently Selected:

2 Samuel 23: BASSARDC

Highlight

Copy

Compare