2 Samuel 22
22
Daafiidi laŋŋu
(Kpèè Ilan 18)
1Daafiidi dū anyɔɔbun nee ki gāā nlan ki nyɔ́ŋkì ti-Dindaan ŋyunti ŋun u nyántì-u u-nannanliibi kɔkɔ, cilinjee Saayuul ŋaanee.
2U lī yii:
Ti-Dindaan di sá man taŋkpanaakooku,
úǹ di sá man guŋkpaandi lɔkɔl nì man fiiliu.
3U sá man Nimbɔtiu ní ki sá ntaŋkpalɔkɔ ŋun poon m sáń ki kóòyee.
Úǹ di sá man gbampɔɔl ní ki sá man jajil pɔŋŋu,
ti-Dindaan di sá man balilaŋki.
Úǹ ní m sáń ki kóò
ní u fìil̄-mi tipɔmbɔti dambi ŋaan.
4Tí nyɔ̄ŋkì ti-Dindaan!
M kúuǹ ki yíiń ti-Dindaan
ní u yāntì m jáń ki pɔ́ɔkiǹ m-nannanliibi.
5Ŋkúm kusakai nìn fìn̄-mi,
dinàandi nyiŋgbeeŋŋu nìn yōoǹ-mi ki dóò.
6Ditaŋkpiilin laaŋku nìn māntìi tú-mi,
ní ŋkúm talinti píĺ ki dɔ̄ m-nimbiin.
7M kúuǹ ki yíiń ti-Dindaan m-nimbinaamandi poon.
M fáá mbiil m-Nimbɔtiu ń jòoń-mi.
U gbìl̄ m-neen pu doooo u-diikun
ní m-kuŋkuuntii kɔ́ u-tafalin.
8Niinee ní kitiŋ fōō dijinjikil ki cīŋkì,
ní ajoon nyeel cīŋkì.
Di sá yii Unimbɔti gíí diŋuul.
9Ŋŋminyiim nìn nyēē u-maŋfataabuŋyin,
ní aŋmilimbil ŋin nàantée nì amɔsiŋkoon nyēē u-nyɔkɔn.
10Ní u cúú kutagbɔŋu ki cátì ní ki kpákatìń,
ní ditagbandi din bɔ̀ǹee bí u-taaŋi taapu.
11U kāl̀ tiwannáaŋkaal tin cáá ifeenee pu ki ŋàan̄,
ní ki dū kubuŋu ki kpántì ifeen ki kíǹ ki dàn̄.
12Dibɔmbɔndi ní u dūu bīiǹ u-ba pu
ní atagban ŋin gbìfì nnyim gbí ŋi-poonee māntìi tú-u.
13Ŋwalifi nìn bí u-nimbiin,
ní atagban jītí ki sá ataanyiŋkumbil nì amɔsiŋkoon.
14Ti-Dindaan sòon̄ní doooo yilpu kii ntaateenteenee,
Yilpu Fɔ́ŋŋŋ Nimbɔtiu yāntì bi gbìl̄ u-nyɔkɔ pu.
15U tɔ́ u-piiŋyi ní u-nannanliibi yàl̄,
ní u dū itaaŋmɔŋmɔ ki ŋmíntì bi-pu ní bi sáǹ ki kátì.
16Ti-Dindaan tāā ki bíikì u-nannanliibi pu,
ní ki fōō bi-pu diŋuul,
an pu ní tiŋku poon nyim fóotì,
ní kitiŋ nyeel cúu bīitì ki dɔ̄.
17Ní ti-Dindaan kāl̀ doooo yilpu ki tāntì u-ŋal
ki cúú-mi ki nyántì inyiŋfi taapu.
18U fōō-mi m-nannanliu un pɔ̄ɔ̄yee ŋaan,
m-pulincɔntiibi bin pɔ̄ɔǹ-mee ŋaan.
19M-nimbinaamandi dal ní bi dɔ́miń ki jáń nì mi,
ama ti-Dindaan dɔ́miń ki tíkiǹ-mi.
20U nyántì-mi digìńdin ki tīī-mi dibatɔl.
U fīī-mi, kun puee u néeń-mi.
21Ti-Dindaan di pàn̄-mi,
kun puee m ŋá tin bí deedeeyee.
U bīiǹ m-pu kun puee tikpitil tiba kaa táká m-ŋal.
22M nóó ti-Dindaan saŋŋu nì mbaamɔn,
ní kaa fātì m-boon ki tīī m-Nimbɔtiu.
23M ŋúb́ ti-Dindaan marab kɔkɔ,
kaa fātì m-kpaŋkpamboon ki tīī u-bɔkpaaŋi.
24Waa ká m-pu tiba kí wòoǹ-mi,
ní m pɔ́ɔǹ m-ba kí taa ŋá ikpiti.
25An pu ní ti-Dindaan pàn̄-mi,
kun puee m ŋá tin bí deedeeyee,
ní u nyí mun yii m-ŋalii kaa táká ikpiti.
26Ti-Dindaan, bin nóó-si nì dipɔbil dibee,
a sí nì bi dipɔbil diba mun ní.
Bin bí deedeeyee,
a sí nì bi deedee ní.
27A ŋáań bin pɔbiliŋ pīiǹee tiŋan,
ama ní ki dàkà bikpitiŋaliibi yii a nyíǹ-bi.
28Di sá yii a fìil̄ dinibul din sīntiǹ di-ba taapuee,
ama ní ki sìntīǹ bilambidambi taapu.
29Ti-Dindaan, sii di sá m-fitilau,
sii di ŋmíntí-mi ní m-bɔmbɔndi ń wāŋkì.
30M ŋūǹ kí já nì dijanjakitil,
kun puee a tútúǹ-mi.
M ŋūǹ kí yùkū kí lákatí agun ŋin bi máń ki tú kitiŋee,
kun puee man Nimbɔtiu bí m-cee.
31Tin kɔkɔ Unimbɔti ŋáańee ŋān̄,
ní unil ŋūǹ kí nīn máká u-nyɔɔbundi pu.
U sá digbampɔɔl ní ki tīī bin kɔkɔ sáń ki kóò-uee.
32Ŋma di sá Unimbɔti,
an yaa kaa sá ti-Dindaan?
Ŋma di sá timbi taŋkpanaakooku,
an yaa kaa sá ti-Nimbɔtiu?
33Úǹ di sá Unimbɔti un tìì-mi mpɔnee,
ní ki cátí nsammɔnti ki tìì-mi m còom̄.
34U yàntī m-taaŋi yáb̀ m sáń kii ucaŋkpalimee,
ní ki yàntī ḿ jɔ̄m̀ kí tɔ́kɔń ajoon pu tiba ń taa ŋá-mi.
35Waa bífí-mi bi nín jáà puee ŋmaniŋma,
ama u yàntī ḿ ŋmā kí dáaĺ butɔbu
bun bi dū tasa kúti ki píĺee.
36Ti-Dindaan, a tìì-mi digbampɔɔl din fìil̄-mee,
ní a-ŋaŋgiil tíkí-mi,
ní a nín tútúǹ-mi puee yāntì m nyáń diyindi.
37Sii puee m ŋūǹ kí dàatī malaa malaa,
ní maa tà ki pántí.
38M jì m-nannanliibi ní kí cúú-bi,
m yaa kaa nāaǹ-bi maa fàtī m-boon.
39Ní ḿ pɔ̀fì pɔ̀fì-bi ní baa ti ŋūǹ kí yīkì,
ní ki kíǹ ki dɔ̄ m-taaŋi taapu fìlfil#22.39 Á dū a-taal kí tɔ́kɔń a-nannanliu pu àá ú nīn dɔ̄ a-taaŋi taapuee nìn dàkà yii a jáń ki pɔ́ɔkiǹ-u sɔ́kɔ sɔkɔ dee, kpèè Joos 10.24, Yees 51.23..
40A tìì-mi mpɔn ḿ já kujaau,
ní ki dù bin yíkíi jáà nì mee ki ŋáań m-taaŋi taapu.
41A yàntī m-nannanliibi sáń kukunsaŋu,
ní ki nàantí bin ná-mee.
42Bi kūuntí ki nyàab̀ dijòońdi,
ní ubɔ kpá kí fīī-bi.
Bi kúuǹ ki yíiń ti-Dindaan gba,
ama waa kíí-bi.
43M jáń ki pɔ́ɔkiǹ-bi ki nàn̄-bi dúsi dusi
kii ŋkpɔŋkpɔm min kubuŋu yòontée,
ki tà-bi ki ŋmàtifī kii nsanni kpatee.
44A fīī-mi ki nyántì anibul ŋin nib nìn yíkì ki jáà nì mee ŋaan,
ní ki dū-mi ki ŋá atimbun yidaaŋwu.
Anibul ŋin maa nìn nyée kpántì
m-naacimbi ki tūǹ ditundi ki tìì-mi.
45M tin pée lì yii m wàatī m-nyɔkɔ kí sòoǹee,
binaacimbee tātìi gbāaǹ m-nimbiin ki kíǹ ki tɔ́-mi.
46Bi-wunti kúù,
ní bi nyēeń bi-balilaŋki tiwun jìkì.
47Ti-Dindaan bí dimaŋfalin!
Tí nyɔ̄ŋkìmaan m-taŋkpanaakooku!
Tí pàkàmaan Unimbɔti un di sá m-fiiliuee!
48Unimbɔti tútuǹ-mi m jáń ki pɔ́ɔkiǹ m-nannanliibi,
ní ki dū atimbun ki ŋá m-taaŋi taapu.
49U fīī-mi ki nyántì m-nannanliibi ŋaan.
Tiŋman u yāntì m jáń ki pɔ́ɔkiǹ bin jáà nì mee,
ní ki fīī-mi ki nyántì tipɔmbɔti dambi ŋaan.
50An pu ní, m-Dindaan, m làá nyɔ̄ŋkì-si atimbun kansikin,
ní kí gāā ilan kí pàkà a-yindi#22.50 Kpèè Room 15.9..
51Unimbɔti tìì u-bɔtiu ajajil ŋin sá akpaanee.
U dàkà ubɔti un úǹ u-ba lēēyee
nì Daafiidi nì u-naantiibi dineeŋkpaandi
kí nīn cáa cá jaanjaan.
Currently Selected:
2 Samuel 22: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
