2 Samuel 19

Daafiidi yáliŋkì u-jipɔɔn kúm pu

1Ŋkúmee nìn kɔ́ ubɔti tikpil. U nìn jɔ́m̀ kudii kun tɔ́kɔ́ digundi yilpuee poon ki súń. Ní u còom̄ ki tátí ki lì yii: «M-jipɔɔn Abisaloom! M-jipɔɔn, m-jipɔɔn Abisaloom, m yaa bàà fōō a-yil ki kpíì, an kaa bàà sɔ́ɔɔ? Abisaloom, m-jipɔɔn, m-jipɔɔn!»

2Ní ubɔ cūtìi tùkū Joowaab yii: «Daafiidi bí ki sūǹ ki yáliŋkí Abisaloom pu.» 3Ŋwiin gbantee, dijajil nìn dūu kpántì kunimbaau ki tīī bijanjaliibi kɔkɔ. Di sá bi mun nìn gbìl̄ yii ubɔti jipɔɔn kúm nìn kɔ́-u tikpil. 4Bijanjaliibi nìn nɔ̄ntì ní ki kɔ́ kitiŋin. Bi nìn ŋá kii bijanjaliibi bin cūtì kujaau bi jáń ki pɔ́ɔkiǹ-bi bi fātìi gítìń nì icooyee ní. 5Ubɔti nìn dū ŋŋaabu ki bīiǹ u-nimbiin ní ki tátí mpɔn yii: «M-jipɔɔn Abisaloom! Abisaloom, m-jipɔɔn, m-jipɔɔn!»

6Niinee ní Joowaab kɔ́ ubɔti cee kudiin ki bí-u yii: «A bíi kɔ̄ntí a-janjaliibi bin fīī si nì a-jipɔmbi nì a-bisalib nì a-nimpukpilib nì a-nimpuwaamu kɔkɔ ki líí díǹ nee icoo dee. 7Di sá yii a néeń bin ná-see, ní ki ná bin néeń-see. A dàkā díǹ yii a-janjakpilib nì binib bin kɔkɔ tíkí-see kaa sá tiba a-cee dee. Díǹ nee, m béè yii timbi di yaa bàà kpíì ní Abisaloom bí dimaŋfalin nee, an bàà ŋān̄ a-cee ní. 8An puee cúú a-ba kí nyā kí tīī a-janjaliibi kunyannyaau nyɔɔbundi. M pūtì ti-Dindaan yii a yaa kaa ŋá míǹ, aa ti làá ká báà uniseen kunyeeu nee a-cee. Doooo a-naacimpɔntin ki dāa sāā díǹ nee, a láá pée ká nnaabu ŋubɔ kii ŋunee juti.» 9Niinee ní ubɔti yíkì ki cūtìi kāl̀ kipunyɔkɔpu. Ní bi báakì ki tùkū bijanjaliibi kɔkɔ yii ubɔti nyáń ki kā kipunyɔkɔpu, ní bi dɔ́miń ki kpáfì u-cee.

Daafiidi bíi bɔ́ntí kí gítí Jeerusaleem

Abisaloom janjaliibi nìn sáǹ báà ŋma nín kùǹ u-dumpu. 10Isirayeel naakɔti kɔkɔ poonee, binib nìn sòoǹ sòoǹ yii: «Ubɔti Daafiidi fīī-ti ki nyántì ti-nannanliibi ŋaan, cilinjee Fiiliistii yab ŋaan. Abisaloom puee, ní u yíkìi sáǹ. 11Abisaloom un ti nìn lēē ki kāaǹ dibeelee kpíì kujaaun. Ti gíti kā ki cí ba kí gíiǹní ubɔti Daafiidi ní?»

12Ubɔti Daafiidi úǹ nìn tú bí tùkù bisaraaŋaliibi Saadooki nì Abiyataar yii: «Cùú sòoǹ nì Juuda yab kpilib yii: <Ubɔti nyí Isirayeel yab landɔkɔŋu. Ní nīn sá bipeekaabi kí gíiǹní ubɔti u-dumpu. 13Nimbi di sá ubɔti nabiyaamu kiŋkiŋ ki sá fatikubaanti. Ní nīn sá bipeekaabi kí gíiǹní ubɔti u-dumpu.> 14Ní tùkù Amasaa yii: <Sii di kaa sá man nabiki kiŋkiŋaaa? Unimbɔti ń dáaĺ m-tafal kí gíti dáaĺ m-tafal m yaa kaa yāntì a kpántì ujanjakpil ki fōō Joowaab yil.» 15Daafiidi nìn ŋúń ki fātìi gíiǹní Juuda yab kɔkɔ landɔkɔŋu u-pu. Bi nìn ŋá kinyɔɔbaantii kí cùú tùkù ubɔti yii: «Gítiń ti-cee, sii nì a-yab kɔkɔ.» 16Niinee ubɔti yíkìi kíĺ nsan ki nín gítí, ki tin bàn̄ Jɔɔdan buŋgbandi.

Daafiidi dū Simeeyii bɔkpil ki pú-u

Juuda yab kɔkɔ cūtì Giilgaal kí tūŋkì ubɔti kí cáá-u kí dùtī Jɔɔdan buŋŋu. 17Geeraar un sá Beenjameen naakookun ki kóò Bawuriim tiŋkinee jipɔɔn Simeeyii mun nìn ŋá malaa u nì Juuda yab sīntì kí cùú tūŋkì ubɔti Daafiidi. 18U nì Beenjameen naakookun yab binib kutuku di nìn nóó. Siiba un sá Saayuul tɔntɔnliuee nì u-jipɔmbi saalku, nì u-tɔntɔnliibi mmuŋku nìn kútì bi-pu. Bi nìn bíi ŋáań malaa malaa kí bà Jɔɔdan buŋŋu kí tūŋkì ubɔti. Bi máaǹ kí nīn bí niin 19kí ká buŋalimbu bun làá yòon̄ ubɔti nì u-dicaŋku kí dùtēe, ní kí ŋá min u lèe.

Simeeyii nìn dɔ́miń ki lítì ubɔti nimbiin ŋyunti ŋun u nìn bíi bɔ́ntí kí dùtēe. 20U nìn bí-u yii: «Ti-baa ubɔti, taa dū m-yìntitam kí ŋá tibɔti! Á taa téetí ikpiti in man a-tɔntɔnliu nìn ŋá-si ŋwiin ŋun a nìn nyēē Jeerusaleemee pu! Ubɔti, á taa pée díkí m-pu. 21Ti-baa, man m-ba béè yii m ŋá-si ikpiti. Ama díǹ nee, sii a-ba ká yii m sá unipeekaa Jooseefi naakookun ki dɔ́miń ki túŋkì-si.»

22Abisayi un na bi yíì Seeruyee fōō dinyɔɔbundi ki lī yii: «Simeeyii tɔ́ un ti-Dindaan lēē ki kāaǹ dibeelee mbusu. Tibɔti tin u ŋá nee kaa máaǹ bí kpɔ̀-uaaa?» 23Ama ní Daafiidi bí yii: «Seeruya jipɔmbi, ni nyàab̀-mi nì tilati ní? Ba pu ní ni ŋáań díǹ kii man nì ni kpákà tiba puee? Díǹ wiiŋŋu nee, ti máaǹ kí kpɔ̀ unil Isirayeel tiŋkinaaa? M cáá dimákal díǹ wiiŋŋu nee yii man di sá Isirayeel bɔtiu.» 24Ní ubɔti bí Simeeyii yii: «M pūtì yii aa làá kpú.»

Meefiibooseeti nì ubɔti Daafiidi gbìlīǹ tɔb

25Saayuul naantiiu Meefiibooseeti mun nìn cūtìi túŋkì ubɔti Daafiidi. Kí yòon̄ daliŋkin ubɔti nyáń Jeerusaleem ki dāa sāā ŋwiin ŋun u fātìi gítìń nì ŋgbansɔŋfee, Meefiibooseeti kaa fíntì u-taaŋi, kaa kōol̀ u-nyimpul, kaa fíntì u-wampeeŋkaati mun. 26U nín bàn̄ ubɔti nimbiinee ní ubɔti bālifì-u yii: «Ba ŋá ní aa nìn nóó-mi ti yíkì ní?» 27Ní u kíí ubɔti yii: «Ti-baa ubɔti, m-tɔntɔnliu di kíil̀-mi. Di sá m nìn lī m-neen yii: <M nín kaa ŋūǹ kí còom̀ee, m làá dū digakal kí páań m-mansaliiki pu kí kàl̄ kí nīn nóó ubɔti.> 28Ama ní m-tɔntɔnliu cūtì a-cee ki kúŋfì m-boon. Nì míǹ kɔkɔee, ti-baa ubɔti sá kii Unimbɔti tuuŋŋuee ní. Ŋá min ŋān̄ a-ceeyee. 29Di sá yii m-naanja Saayuul dicaŋkun yab di bàà kā ki cí kun sii ti-baa ubɔti ceeyee di sá ŋkúm. Ama nì míǹ kɔkɔee a fōō-mi m bí bin jīǹ a-sambilinee kansikin. M gíti cáá nsan kí mèè-si tibaaa? Aayee, maa ti ŋūǹ kí mèè-si tiba.» 30Ní ubɔti bí-u yii: «A sòon̄ tikpil! M lēē yii sii nì Siiba ń yàkatī Saayuul kpaatanti.» 31Ní Meefiibooseeti bí yii: «Siiba ŋūǹ kí yòon̄ tikpaatan kɔkɔ! Tin páb́ee di sá ubɔti nín fātìi gítìń u-dumpu nì ŋgbansɔŋfee.»

Daafiidi pàn̄ Barsilayii tipaal

32Barsilayii ugalaadija mun nìn yíkìń Roogeeliim tiŋki ki dɔ́miń Jɔɔdan buŋgbandi. U nìn céeǹ ubɔti bi dūtì mbun ki dóò ní u kāaǹ-u. 33Barsilayii nìn sá unil un púĺ tikpilee. U nìn cáá abin imuŋku inaa. Úǹ di nìn ŋúb́ ubɔti Daafiidi ŋyunti ŋun u nìn bí Maanayiim tiŋkinee, di sá yii u nìn sá ugaaja. 34Ubɔti bí-u yii: «Barsilayii, nóó-mi tí cù Jeerusaleem m-cee, m làá kpèè-si.» 35Ní u bí ubɔti yii: «M-wiiŋyi gíti kíǹ iŋa ní ḿ nóó sii ubɔti tí cù Jeerusaleem? 36M cáá abin imuŋku inaa dee. Maa ti ŋūǹ kí gàntī tin ŋān̄ee nì tin kaa ŋān̄ee. Man a-tɔntɔnliu limbil tīlifì maa ti gbìl̀ tin m jīǹee nì tin m nyùee mɔŋŋu, kaa tí gbìl̀ bilaŋgaaliibi bininjab nì binimpoobi neeŋyi pu. Ba pu ní ḿ cù kí tin kpántí digìńdi kí tīī sii ti-baa ubɔti? 37Tin m ŋūǹ kí ŋée di sá ḿ pée céeǹ-si tí dùtī Jɔɔdan buŋŋu. Ba ní m ŋá gba ní sii ubɔti làá pà-mi tipaal ní? 38Yàntī man a-tɔntɔnliu ń gítí m-tiŋkin. Niin ní m làá kpú kí nīn pìlīǹ m-baa nì m-na kaakul. Ama kpèè m-jipɔɔn Kimaam sèé. Úǹ ŋūǹ kí céeǹ-si. A ŋūǹ kí ŋá min fáatì a-pɔbilee kí tīī-u.» 39Ní ubɔti bí-u yii: «An ŋān̄, Kimaam ń céeǹ-mi. Min a lèe, míǹ ní m làá ŋá kí tīī-u. Tin kɔkɔ a yaa là ní ki mēē-mee, m làá tīī-si kudɔŋu.»

40Binib kɔkɔ nìn dūtì Jɔɔdan, ní ubɔti u-ba mun dūtì. Ubɔti nìn cūtìi kpàl̄ Barsilayii, ní ki mēē ki bīiǹ u-pu, ní u fātìi nín gítí u-dumpu. 41Ní ubɔti nìkī u-saŋŋu ki nín cá Giilgaal ní Kimaam nóó-u.

Juuda yab nì Isirayeel yab jaaku

Juuda yab kɔkɔ nì Isirayeel yab dijandi nìn céeǹ ubɔti ki cáá-u ki dūtì mbun. 42Niinee Isirayeel yab dɔ́miń ki ká ubɔti ki bālifì-u yii: «Ba pu ní ti-nabiyaamu Juuda yab dɔ́miń ki yōoǹ si nì a-dicaŋku yab ki cáa dūtì Jɔɔdan buŋŋu, ama ní a-janjaliibi bí a-cee?» 43Ní Juuda yab kɔkɔ kíí-bi yii: «Kun pu ti ŋá mimmee di sá yii timbi nì ubɔti di pēē. Ba pu ní an bɔti kɔ́ǹ-ni diŋuul ní? Ba ní ubɔti tīī-ti ti jíń ní? Ba ní u pú-ti?» 44Niinee ní Isirayeel yab kíí Juuda yab yii: «Timbi yì ubɔti saalaa pu ki jítiǹ-ni! Tiŋman, ti yì Daafiidi ki jítiǹ-ni! Ba pu ní ni kpēē-ti fám míǹ? Timbi di sá bipeekaabi ki sòon̄ yii tí fàtīí gíiǹní ti-bɔtiu!» Ama Juuda yab bíǹ nìn gíti sòon̄ an pɔ̄ɔ̄ ki jítiǹ Isirayeel yab.

Currently Selected:

2 Samuel 19: BASSARDC

Highlight

Copy

Compare