2 Samuel 18

Bi kūū Abisaloom kujaaun

1Daafiidi nìn kóoǹ bijanjaliibi bin nìn bí u-ceeyee ki kpáfì ki bɔ́ntì-bi. U nìn lēē biba bí nīn sá bijanjaliibi kutukub kpilib, ní biba mun ń nīn sá bijanjaliibi alaataa kpilib. 2U nìn cúú ajanjakitee ki yākatì mita pu, ki dū diba ki ŋúbiǹ Joowaab un na bi yíì Seeruyee, ní ki dū diba mun ki ŋúbiǹ Joowaab nabiki Abisayi, ní ki dū din kíǹee ki ŋúbiǹ ugaatija#18.2 ugaatija : kpèè 1 Sami 5.8 nì tin bi ŋmàn̄ kugbɔŋu faaku taapuee. Itaayii. U nìn tùkū bijanjaliibi yii: «Ma mun làá nóó-ni tí cù kujaau.» 3Ama ní bijanjaliibi kíí-u yii: «Kpataaa, a kpá kí nóó-ti! Di sá yii bi yaa tāā ki bíikì ti-pu ní ti bíi sáńee, an kaa làá nīn ká ti-nannanliibi. Báà bi yaa kūū timbi dijandi, an kaa làá nīn ká-bi. Ama siiyee, a jítiǹ timbi janjaliibi kutukub saalaa pu. An puee an sɔ́ sii ń gbíntí kitiŋin ní an yaa píĺ ki pɔ́ɔkèe, á jòoń-ti.» 4Ní ubɔti bí yii: «M làá ŋá min fáatiǹ-nee.»

Ní ubɔti cūtìi yúl̀ kipunyɔkɔ pú ní bijanjaliibi alaataa alaataa kitiŋi nì kutukub kutukub kitiŋi dòoń ki jītí u-nimbiin. 5Ní ubɔti tīī Joowaab nì Abisayi nì Itaayii mara nee yii: «Man puee, ní ŋá Abisaloom soooo!» Bijanjaliibi kɔkɔ nìn gbìl̄ mara un ubɔti nìn tīī bijanjakpilib Abisaloom puee.

6Daafiidi janjaliibi nyáń kí já nì Abisaloom yab. Eefiraayiim bambaŋkun ní bi nìn kpáfì ki jáń kujaau gbanti. 7Daafiidi janjaliibi nìn jáń ki pɔ́ɔkiǹ Abisaloom yab. Bi nìn kūū bi-janjaliibi tikpil, áli binib kutukub mmuŋku. 8Kujaau nìn yàl̄ ki gbí kitiŋ gbanti jaŋŋi kɔkɔn. Binib bin nìn kpíì kubambaŋŋunee nìn jítiǹ binib bin bi nìn kūū nì ntàataajimuee.

Joowaab kūū Abisaloom

9Bi pée bíi jáà ki sāā ŋyunti ŋubɔee Abisaloom dūu túuǹ Daafiidi janjaliibi. U nìn kā umamboon pu ní umamboon bàà sáń kí gúutí asupan taapuee, ní u-yil fákáǹ asupan kansikin, ní umamboon gúutì taapu ki búntì. Abisaloom nìn gbíntì niin ki lúń. 10Daafiidi janjaliibi ubɔ nìn ká-u ní ki cūtìi tùkū Joowaab yii: «M ká Abisaloom lúń busubu bubɔ pu.» 11Ní Joowaab bí-u yii: «A ká-uaa! Ba pu ní aa kūū-u niin niin? M bàà làá pɔ̄-si animbil jitɔmbi saalaa nì dambala.» 12Ama ní ujanjalee kíí-u yii: «Báà a yaa bàà tīī-mi animbil jitɔmbi kutuku, m pée kpá kí gbēē ubɔti jipɔɔn. Kun puee ti-kɔkɔ tafalin ní u tīī sii nì Abisayi nì Itaayii mara yii: <Ní ŋá soooo nì m-jipɔɔn Abisaloom.> 13Báà m yaa ŋá kii maa nyí ki kūū-uaaa, tiba kaa bí ubɔti kaa nyí. U làá dāá béé yii m mɔ́ntí, ní sii dāa yú kaa làá mɔ̄tì m-pu.» 14Ní Joowaab bí-u yii: «Maa làá kúntíǹ-si kí bīil̀ ŋyunti!»

Ní u yōoǹ ikpaa ita ki búntì. U bàn̄ee Abisaloom lúń busubu pu ki dáá wāĺ ní u dū ikpaayee ki sāā u-pɔbil. 15Ní ajanjapɔmbil saalaa ŋin nìn tūntí Joowaab janjawantee māntìi tú Abisaloom ní ki púntì-u. 16Niinee ní Joowaab búń ŋyin bí gbèen̄ kujaau. Ní Daafiidi janjaliibi gbēeǹ kaa ti bíi jì Abisaloom janjaliibi. 17Bi nìn yōoǹ Abisaloom ki dūu tɔ́ kubookpaaŋŋu kubɔn kubambaŋŋun niin, ní ki tōō ataŋkpee ki nyīkiǹ u-pu ní an dūu kpántì ditaŋkpakpukul. Ŋyunti gbantee, Abisaloom janjaliibi sáǹ báà ŋma nín kùǹ u-dumpu.

18Ŋyunti ŋun Abisaloom dáá bée, u nìn dū ditaŋkpal diba ki cóoǹ ubɔti tantakalin. U nìn lī yii: «Maa cáá jipɔɔn bí nīn téetí m-pu.» An pu ní u dū úǹ u-ba yindi ki pú ditaŋkpalee. Bi gbíntìi yíì-dì nì díǹ yii: «Abisaloom taŋkpal.»

Daafiidi gbìl̄ Abisaloom kúm pu

19Saadooki jipɔɔn Ayiimaasi bí Joowaab yii: «Yàntī ḿ sāǹ kí cùú tùkù ubɔti yii ti-Dindaan pɔ̀n̄-u ki fīī-u ki nyántì binannanliibi ŋaan.» 20Ní Joowaab bí-u yii: «Aayee, si di kaa làá nīn sá un làá sòoǹ dinyɔɔbummɔɔndi bɔti díǹee. A dāa cáǹ-u dalba dinyɔɔbummɔɔndi, ama díǹ nee, taa cù, kun puee ubɔti jipɔɔn di kpíì.» 21Ní Joowaab bí ueetiiyoopiija ubɔ yii: «Sii, nín̄ cá kí tùkù ubɔti tin a kée!» Ní u dɔ́miń ki gbāaǹ Joowaab nimbiin ní ki yíkìi sáǹ ki nín cá. 22Ní Saadooki jipɔɔn Ayiimaasi gíti tí bí Joowaab yii: «Báà tin yaa pée bāań-mee, míǹ dee. M làá jà ueetiiyoopiija nee boon ní.» Ní Joowaab bí-u yii: «M-bɔɔ, ba pu ní a là kí jà u-boon ní? Tibɔti tin bí yéèyee juti kaa cáá ipaati.» 23Ní Ayiimaasi kíí Joowaab yii: «An kaa cáá tiba, m làá cù.» Ní Joowaab bí-u yii: «Too, nín̄ cá.» Ní u dūu dī Jɔɔdan tantakalin saŋŋu ki sáǹ ki jítì ueetiiyoopiija pu.

24Daafiidi nìn kā mmɔŋki pú punyɔkɔki nì poon pú yaka kansikin. Ucɔŋkil nìn tɔ́kɔ́ bi nín bɔ̀b̄ kipunyɔkɔ yilpu puee digundi pu ki cɔ́ŋkí. Kpalaayee ní u ká ubɔ páaǹní ndan ki sánní u-baba. 25Ní ucɔŋkilee téeń ki tùkū ubɔti yii ubɔ dòoń. Ní ubɔti bí yii: «U yaa nóoń u-babee, mimmee u cāabìń dinyɔɔbummɔɔndi dee.»

Ŋyunti ŋun kijapaayee tóobińee, 26ní ucɔŋkilee tí ká uninja ubɔ mun sánní ki dòoń ní u téeń ki tùkū upunyɔɔciitil yii: «Kpèè, ubɔ di dòoń ki sánní u-babee.» Ní ubɔti bí yii: «U mun cāabìń dinyɔɔbummɔɔndi ní.» 27Ucɔŋkilee lī yii: «Unipeekaa nín sáń puee yāntì m béè yii an sá Saadooki jipɔɔn Ayiimaasi.» Ní ubɔti bí yii: «U sá unaacimpɔmmɔnti ní. U cāabìń dinyɔɔbummɔɔndi ní.»

28Ayiimaasi bāańee ní ki téeń ki bí ubɔti yii: «Tikɔkɔ pée cōom̀ ki ŋān̄ ní.» Ní u gbāaǹ ubɔti nimbiin ní ki bí yii: «Ti-baa, ti jáam̀ ti-Dindaan a-Nimbɔtiu un dū bin yíkìi jáà nì see ki ŋá a-ŋaanee.» 29Ní ubɔti bālifì-u yii: «M-naacimpɔɔŋwu Abisaloom bí mana?» Ní u kíí-u yii: «Ŋyunti ŋun Joowaab dū man nì a-tɔntɔnliu ubɔ mun ki túnní a-ceeyee, ní m dáań ki ká yii binib sáń lìbiti libiti, ama maa nín béè tin di yaa ŋée ní.» 30Ní ubɔti bí-u yii: «Sii kàkatī kí yūĺ ŋkpaanceeti yéè.»

Ní u kākatì ki cūtìi yúl̀ ŋkpaanceeti. 31Dicilpu kpalaa niin ní ueetiiyoopiija mun dūu bāań ní ki bí ubɔti yii: «Ti-baa, dinyɔɔbummɔɔndi ní m cáań-si, di sá yii ti-Dindaan pɔ̀n̄-si díǹ ki fīī-si ki nyántì a-nannanliibi kɔkɔ ŋaan.» 32Ní ubɔti bālifì-u yii: «M-naacimpɔɔŋwu Abisaloom bí mana?» Ní ueetiiyoopiija kíí-u yii: «Tin jítì Abisaloom puee, tíǹ tibaantiil ń jītí a-nannanliibi nì bin kaa là a-bɔtee pu.»

Currently Selected:

2 Samuel 18: BASSARDC

Highlight

Copy

Compare