2 Samuel 16

Daafiidi nì Siiba bɔti

1Daafiidi cōom̀ ki jítì dijool yilpu kpalaayee ní ki tú Meefiibooseeti tɔntɔnliu Siiba nsanni u dòoń u-cee. U nìn kpàl̄ mmamu muli mu túń kpɔnɔb alaataa ali nì fiinyi subiliŋ akulim asaka dilaataal, nì fiigi subiliŋ dilaataal, nì ndamam kuloou. 2Ubɔti bālifì Siiba yii: «Tin kɔkɔ ní a tú nee, a làá ŋá nì ba?» Ní Siiba kíí-u yii: «Ti-baa ubɔti, mmamu nee sá ki tīī a-dicaŋkun yab ń nīn cáa kàal̀, ní kpɔnɔb nì asubilee sá a-naacimpɔmbi jikaati, ní bin cōom̀ kuteeun ki gīīyee ń nīn cáá ndaamee ki sɔ̀ŋkī bi-neen.» 3Ní ubɔti bālifì-u yii: «Kin a-kpiliu Saayuul naantiiu Meefiibooseeti bí la?» Ní Siiba kíí-u yii: «U bí Jeerusaleem niin. Di sá u lī yii: <Kɔŋkɔnnee, Isirayeel yab làá gíiǹ m-naanja beel kí tīī-mi.>» 4Ní ubɔti bí yii: «Too, an ŋān̄. Kí yòon̄ díǹ kí nīn cée, m fōō Meefiibooseeti fakal kɔkɔ ki tīī-si.» Niinee ní Siiba tātìi dōoǹ dicincibil ní ki bí yii: «Ti-baa, m jáam̀-si diyimɔɔl din a pú-mee pu.»

Simeeyii nì Daafiidi bɔti

5Ubɔti Daafiidi bàn̄ Bawuriim timbiliikinee, uninja ubɔ nìn nyēeń ki-ni bi yíì-u Simeeyii, Geera jipɔɔn. U nì Saayuul nìn pēē mmaal ní u kíĺ ki bíi tòó Daafiidi mbusu. 6U nìn bí ki tòó Daafiidi nì u-kàliŋkpilib kɔkɔ ataŋkpee, min kamaa samaa nì bijanjaliibi nìn bí u-ŋaŋgiil pú nì u-ŋaŋgan pú bi còom̄ ki cée. 7U nín nìn tòó-u mbusu ki lì puee di sá yii: «Nyā doo, nyā doo, unikpɔl un bí nee, aa pée bí tiban! 8Ti-Dindaan yāntì binib bin kɔkɔ a kūū Saayuul dicaŋkunee fatikuu fātìi lítì a-pu nín̄ nee. A fōō Saayuul ŋaan dibeel, an pu ní ti-Dindaan fōō-dì a-ŋaan ki dūu tīī a-jipɔɔn Abisaloom. Kɔŋkɔnnee, a kɔ́ nnaabun, kun puee a sá unikpɔl ní.» 9Abisayi un na bi yíì Seeruyee bí ubɔti yii: «Ba pu ní dibɔkpil nee tòó ti-baa ubɔti mbusu míǹ? Yàntī ḿ cùú lēē u-yil.» 10Ní ubɔti bí yii: «Seeruya jipɔmbi Abisayi nì Joowaab, tíǹ ká-ni la? Kijapaai nee yaa bíi tòó-mi mbusuee, an yaa yíì ti-Dindaan di bí yii ú ŋá míǹ. Ŋma di ŋūǹ kí kpákáǹ-u?» 11Ní Daafiidi bí Abisayi nì u-kàliŋkpilib kɔkɔ yii: «Un sá m-jipɔɔn, man m-ba poon naŋuee nyàab̀ kí kpɔ̀-mi. Ŋma nín kàlaasì un sá Beenjameen naakookun nee. Ti-Dindaan di yaa pú-u nsan ú tɔ̄-mi mbusuee, yàntīmaan-u. 12An yaa yíì ti-Dindaan làá kpèè m-falaau kí cúú mbusu un u tòó-mi díǹ nee kí kpántí dibiindi.»

13Daafiidi nì u-yab nìn bí ki còom̄ ki cá. Simeeyii nìn bí ki kpàkaǹ dijool ki nóó-bi kaa dátiǹ Daafiidi. U nìn gbíntìi tòó mbusub, ki tòó ataŋkpee, ní ki kàfī ntam ki yàantí. 14Boonee ubɔti nì u-yab dūu bàn̄ Jɔɔdan buŋgbandi. Bi nìn gīī ní ki kāl̀ niin ki ŋūŋfì.

Abisaloom bāań ki kɔ́ Jeerusaleem tiŋkin

15Abisaloom nì Isirayeel yab dinikitikpaandi bāań ki kɔ́ Jeerusaleem. Ayiitoofeel nìn bí u-cee. 16Ŋyunti ŋun uarkitiija Usayii un nìn bí Daafiidi cee ki sá u-saŋkiliuee bāań Abisaloom ceeyee ní u téeń yii: «Ubɔti ń nīn cáá mmaŋfafɔkɔn! Ubɔti ń nīn cáá mmaŋfafɔkɔn!» 17Ní Abisaloom bālifì-u yii: «A nín yú nì a-bɔɔ Daafiidi deedee puee deeee? Ba pu ní aa nóó-u?» 18Ní Usayii kíí-u yii: «Un ní ti-Dindaan nì Isirayeel nibul kɔkɔ lēē ú nīn sá ubɔtee, úǹ ní man làá nóó kí nīn bí u-cee. 19Nliliitiimee, ŋma ní m làá tɔ̄ ditundi kí tīī, an yaa kaa sá m-bɔɔ jipɔɔn? Kii m nín túń ditundi pu ki tīī a-baayee, míǹ mbaantiim ní m làá tɔ̄ kí tīī si mun.»

Abisaloom nì u-baa Daafiidi nimpoobi bɔti

20Abisaloom bí Ayiitoofeel yii: «Kàl̄maan ni-ŋmaniŋma kí kpèèmaan min sá tí ŋée.» 21Niinee Ayiitoofeel bí Abisaloom yii: «Cùú dòon̄ nì a-baa nimpoobi bin u kāaǹ bí nīn kpèé dibeecindee. Niinee, Isirayeel yab kɔkɔ làá béé yii a kɔ́ a-baa poon ki lēē baadakam, ní bin bí a-jandi púee ń ká kunyannyaau.» 22Niinee ní bi gāā tanti bi nín bɔ̀b̄ dibeecindi puee yilpu ki tīī Abisaloom. Ní Abisaloom dōoǹ nì u-baa nimpoobi mpaampiin pu Isirayeel yab kɔkɔ nimbilin.

23Ŋyunti gbantee, Ayiitoofeel yaa nìn pée tīī isaŋkee, an nìn bí kii Unimbɔti di sòon̄ee ní. An puee, an yaa sá Daafiidaaa, Abisaloomaaa, Ayiitoofeel yaa nìn pée lī puee, míǹ ní bi nìn ŋáań.

Currently Selected:

2 Samuel 16: BASSARDC

Highlight

Copy

Compare