2 Samuel 15

Abisaloom mākaǹ kí fōō dibeel

1Míǹ boonee ní Abisaloom nyàab̄ janjatɔrɔku nì itaamu, ní bijanjaliibi imuŋku ili nì saalaa sáń ki līī u-nyɔkɔpu. 2Abisaloom nìn péetí kutaafaau ní kí cùú kàl̄ kitiŋ punyɔkɔ nsan caŋin. Ŋyunti ŋun kamaa ubɔ yaa nìn cáá tiba ki cá ubɔti dumpu ki là ubɔti ń sòoǹ kí ŋāŋkì kí tīī-uee ní ú yíiń udaan kí bàlifì-u yii : «A nyánní kitiŋ kilakan ní?» Ní úǹ ń kíí-u yii : «Man a-tɔntɔnliu nyánní Isirayeel yab naakooku kubɔ poon ní.» 3Ní Abisaloom ń bí-u yii: «A-bɔti ŋān̄ ki túĺ nsan, ama ubɔ kaa bí ubɔti cee ki làá gbìl̄ kí tīiǹ-si.» 4Ní ú kūtì kí lì yii: «Man di yaa bàà sá kitiŋ nee bɔsoonliuee, bin kɔkɔ cáá tibɔti ki là bí sòoǹ kí ŋāŋkì kí tīī-bee bàà dòoń m-cee ní ḿ sòoǹ kí ŋāŋkì kí tīī-bi!» 5Ubɔ yaa nìn bāań ki gbāaǹ kí jāam̀-uee, ní ú cúú u-ŋal kí yáatí-u kí yóoń ní kí kpàl̄-u.

6Míǹ ní Abisaloom nìn ŋáań bin kɔkɔ nìn cá ubɔti cee ú sòoǹ kí ŋāŋkì bi-bɔtee. U nìn ŋá míǹ ní ki ŋmātiǹ Isirayeel yab.

7Abin anaa boonee, ní Abisaloom bí ubɔti yii: «Pɔ̄-mi nsan ḿ cù Eebrɔn kí pà ipoon in m nìn pōoǹ ti-Dindaanee. 8Di sá yii ŋyunti ŋun m nìn bí Geesuur, Siirii yab tiŋkinee, man a-tɔntɔnliu nìn pōoǹ yii: <M-Dindaan, a yaa yāntì m fātìi gítì Jeerusaleemee, m làá cù Eebrɔn kí ŋá saraabi kí tīī-si.>» 9Ní ubɔti bí-u yii: «Nín̄ cá nì ŋgbansɔŋfi.» Ní u yíkìi kíĺ nsan ki búntì Eebrɔn. 10U bàn̄ niinee ní ki tú binib Isirayeel yab timmu kɔkɔ poon bí tùkù-bi yii: «Ni yaa láa pée gbìl̄ bi búń ŋyinee, ní dāá lì yii: <Abisaloom kpántì ubɔti Eebrɔn tiŋkin.>» 11Abisaloom nìn mēē Jeerusaleem binib alaataa ali bi pá u-boon kaa nyí tiba poon. Bíǹ kaa nìn pée nyí tin Abisaloom nìn bɔ́ntì kí ŋée poon tiba.

12Ŋyunti ŋun Abisaloom bíi ŋáań saraayee ní u tú bí yíiń Ayiitoofeel, u-baa Daafiidi saŋkiliu. U nìn kóò u-tiŋkin Giiloo. Niinee bin nìn pá Abisaloom boonee dūu wíiǹ ní bi nín nìn bóob́ kí ŋá tiŋyee mun ká mpɔn.

Daafiidi sáǹ Jeerusaleem

13Unil ubɔ nìn dɔ́miń ki tùkū Daafiidi yii: «Isirayeel yab gítì Abisaloom jandi pú.» 14Ní Daafiidi bí u-kàliŋkpilib bin nìn bí u-cee Jeerusaleemee yii: «Tí yīkì kí sām̀maan malaa, an yaa sá fám, Abisaloom kaa làá tàan̄ ti-kansikin báà ubɔ. Yáb́maan, an yaa kaa sá míǹ, u làá cúú-ti malaa, kí kpɔ̀ binib kɔkɔ kí cáań nnaabu kí tɔ̄ kitiŋ nee pu.» 15Ní u-kàliŋkpilib kíí-u yii: «Ti-baa ubɔti, a yaa pée lēē puee, míǹ ní ti làá ŋá.» 16Niinee ní ubɔti còom̄ ataa pu u nì u-dicaŋku kɔkɔ nyáń ki búntì. Ubɔti nìn dū u-nimpoobi ŋwaamu saalaa ki kāaǹ bí nīn kpèé dibeecindi.

17Ubɔti còom̄ ataa pu u nì samaa kɔkɔ nyáń ki cée ní ki cūtìi yúl̀ kudiluŋkikaau boon. 18Ní u-yab còom̄ ki jītí. Bíǹ di sá Keereeti yab kɔkɔ nì Peeleeti yab kɔkɔ bin cí ubɔtee, nì Gaati#15.18 Gaati : kpèè 1 Sami 5.8 nì tin bi ŋmàn̄ kugbɔŋu faaku taapuee, 1 Sami 27. yab binib alaataa aluu bin nìn nóoń-u doooo Gaati tiŋkinee. Bíǹ gbanti kɔkɔ nìn cōom̀ ki jítì ubɔti nimbiin. 19Ubɔti bí Gaati yab janjakpiliu Itaayii yii: «Ba pu ní a nóoń-ti? Gítí kí cùú nīn bí ubɔtipɔɔn cee, di sá yii a sá unicaan ní, ní bi jìn̄-si gba a-tiŋkin. 20A dáá pée bàń dee ní ḿ kpáaǹ-si tí nīn tú ki yìiǹaaa? Maa kpáàa nyí laakin m cée. Míǹ puee kpáaǹ a-nabiyaamu kí gítí. Ti-Dindaan ń dàkà-si u-poommɔŋŋu nì u-laŋŋaŋfitiiku.» 21Ama ní Itaayii kíí ubɔti yii: «M pūtì ti-Dindaan nì sii ubɔti yii, laakin ti-baa ubɔti làá nīn bée, án yaa sá kí kpúɔɔɔ, án yaa tí sá kí ŋmátáaa, niin ní man a-tɔntɔnliu mun làá nīn bí.» 22Ní Daafiidi kíí-u yii: «An ŋān̄, dāá lìntī nyɔkɔpu.»

Niinee ní Itaayii nì u-janjaliibi nì bi-dicaŋŋi jítìi līntì nyɔkɔpu. 23Ŋyunti ŋun bijanjaliibi nìn còom̄ ki jītí Daafiidi nimbiinee, samaa nìn gà dituweel ní. Ní ubɔti dūtì Seedrɔn bùmbiki nì u-yab kɔkɔ, ní ki dūu túĺ kuteeu saŋŋu. 24Usaraaŋakpil Saadooki nì Leefii yab bin tūntí Mpèé dakaauee mun nìn bí bi-kansikin. Leefii yab nìn túutì dakaayee ki yóoǹ ní Abiyataar kíĺ ki bíi ŋáań saraabi áli binib kɔkɔ dāa sáǹ ki nyáń kitiŋin ki dóò. 25Ubɔti bí Saadooki yii: «Gíiǹ Unimbɔti dakaau kitiŋin. Ti-Dindaan yaa súń m-saai, u làá fàtīí gíiǹní-mi. U làá yàntī ḿ fàtīí ká Unimbɔti dakaau nì u-kɔŋkooŋŋu. 26Ama u yaa tí bí yii maa ti fáatiǹ-u, ú ŋá-mi min ní u lèe.» 27Ní ubɔti gíti bí usaraaŋakpil Sadooki yii: «Aa káaa? Nín̄ gítí mmɔŋki nì ŋgbansɔŋfi sii nì a-jipɔɔn Ayiimaasi nì usaraaŋakpil Abiyataar nì u-jipɔɔn Yoonatan. 28Man làá nīn bí kuteeun laakin Jɔɔdan buŋŋu kaa nyóò binib còom̄ ki dùtēe ki cí ni-kansikin ubɔ ń dāan̄ kí tùkù-mi tin bíi jītée.» 29Niinee ní Saadooki nì Abiyataar fātìi gíiǹ Unimbɔti dakaau Jeerusaleem ní ki gbíntì niin.

Daafiidi tú Ayiimaasi ú cùú cɔ̄ŋkì Abisaloom

30Daafiidi nìn dàb̀ ɔliifi sufii jool pu ki sūǹ. U nìn dū ŋŋaabu ki bīiǹ u-nimbiin kí dàkà u-nimbaaku, ní ki còom̄ fám kaa táká anaataka. U nì bin nìn nóóyee mun nìn dū iŋaabu ki bīiǹ bi-nimbiiŋyi ki dàb̀ dijool ki sūǹ. 31Bi dɔ́miń ki tùkū Daafiidi yii: «Ayiitoofeel kútì Abisaloom nì u-yab bin fōō dibeelee pu.» Ní Daafiidi mēē yii: «M gbāam̀-si m-Dindaan, yàntī Ayiitoofeel saŋkii kɔkɔ ń taa tɔ̄ ditundi.» 32Ŋyunti ŋun Daafiidi dàb̄ ki bàn̄ dijool yilpu kúnti kunti laakin bi jáaḿ Unimbɔtee, ní u ká uarkitiija Usayii, u-saŋkiliu còom̄ ki túŋkí-u. Tiwan tin u nìn pēēyee nìn cátì ní u-yil táká ntam. 33Ní Daafiidi bí-u yii: «A yaa dɔ́miń m-cee, a làá kpántí-mi digìńdi ní. 34Ama nín̄ gítí kitiŋin Abisaloom cee kí tùkù-u yii: <Ti-baa ubɔti, m dɔ́miń kí nīn kíǹ ki bí a-cee ní. Dooooyee m nìn tūǹ ditundi ki tìì a-baa ní, ama kɔŋkɔnnee sii ní m làá tɔ̄ ditundi kí tīī.>» Niinee a ŋūǹ kí pìin̄ Ayiitoofeel saŋkii kí tūtuǹ-mi. 35Bisaraaŋakpilib Saadooki nì Abiyataar bí niin kí tūtuǹ-si. Tin kɔkɔ yaa bíi jítì dibeecindinee, á māafì-bi. 36Saadooki jipɔɔn Ayiimaasi nì Abiyataar jipɔɔn Yoonatan bí bi-cee niin. Tin yaa pée bíi jītée, ní tɔ̄ń-bi bí dāá tùkù-mi. 37Ŋyunti ŋun Daafiidi saŋkiliu Usayii cá kí kɔ́ Jeerusaleem tiŋkinee, Abisaloom mun dòoń kí kɔ́ dee.

Currently Selected:

2 Samuel 15: BASSARDC

Highlight

Copy

Compare