2 Samuel 13

Aminɔn nì Taamaar bɔti

1Míǹ boonee tin jítèe sèé. Daafiidi jipɔɔn Abisaloom nìn cáá niisal ubɔ bi yíì-u Taamaar. U nìn cáá kunyaaŋŋu tikpil. Usapɔɔnee nìn kɔ́ Daafiidi jipɔɔn Aminɔn tikpil. 2Aminɔn niisal Taamaar nín nìn kɔ́-u puee nìn yāntì an dūu ŋá-u iween. U-niisalee nín kaa nìn nyí uninjee puee, an nìn pɔ̄ɔ̄ ú ŋmā kí sútí kí pìl̄-u. 3Aminɔn nìn cáá bɔɔ ubɔ bi yíì-u Yoonadaab. U nìn sá Daafiidi maan Simeeya jipɔɔn ní. Kijapaayee nìn wálifì tikpil. 4U nìn bālifì Aminɔn yii: «Sii sá ubɔti jipɔɔn ní, ba pu ní kutaafaau kamaa a pée kā kunandaŋu míǹ? Tiba yaa bí tùkù-maa!» Ní Aminɔn kíí-u yii: «An sá m-naal Abisaloom niisal Taamaar di kɔ́-mi tikpil.» 5Niinee ní Yoonadaab bí-u yii: «Dòon̄ a-dooŋu pu kí ŋá kii a būǹee. A-baa yaa dɔ́miń kí màntì a-puee ní á bí-u yii: <Yàntī m-niisal Taamaar ń dāan̄ kí ŋá-mi tijin. Ú nīn kā m-nimbiin ki ŋáań tijin m wāĺ-u. U yaa dóòyee, úǹ u-ba ń cáań kí tīī-mi ḿ jī.>»

6Niinee Aminɔn dōoǹ ki ŋá kii u būǹee. Ubɔti dɔ́miń kí màntì u-puee ní Aminɔn bí-u yii: «Yàntī m-niisal Taamaar ń dāan̄ kí kàl̄ m-nimbiin kí tɔ̄-mi kalaabi bili pu yéè kí tīī-mi ḿ ŋmɔ́.» 7Ní Daafiidi tú ubɔ Taamaar dumpu ú tùkù-u yii: «Cù a-niija Aminɔn cee kí ŋá-u tijin.» 8Ní Taamaar nín cá u-niija Aminɔn cee, ki bàn̄ ki ká-u u dɔ̄ ndoo pu. Ní u kāl̀ u-nimbiin niin ki búuń ŋyim ki tɔ́-u kalaabi. 9U wūutì kalaayee ní ki cáa yóoǹ u-nimbiin ú ŋmɔ́, ní u yíì. Ní Aminɔn bí yii: «Nyāntímaan binib kɔkɔ doo». Ní bin kɔkɔ nìn bí u-ceeyee nyáń. 10Ní u bí Taamaar yii: «Cáań-mi kalaabee m-diikun, kí lēē kí tīī-mi ḿ ŋmɔ́.»

Ní Taamaar yōoǹ kalaabi bin u tɔ́ee ki cáa kɔ́ǹ u-niija Aminɔn diikun. 11Ŋyunti ŋun u lēē kalaa ki tīī-u ú ŋmɔ́ee ní u cúú-u ki bí yii: «M-niisal, yàntī ḿ dòon̄ nì si.» 12Ní Taamaar fáá mbiil yii: «M-niija, taa bīil̀-mi. Baa ŋáań míǹ Isirayeel yab tiŋkin. A taa ŋá icoo bɔti gbanti. 13A yaa ŋá mimmee, la ní m làá cáá m-cooi gbanti kí báĺ? A làá kpántí kpayiliku Isirayeel tiŋkin. Míǹ puee, sòoǹ nì ubɔti, waa làá yíí yii á taa cáá-mi.» 14Aminɔn kaa pée là kí pīlifiǹ-u. U cúú-u mpɔn ní ki dōoǹ nì u.

15Míǹ boonee, Aminɔn nìn kíǹ ki ná Taamaar. Kináŋ kin u nìn kíǹ ki cáá u-puee nìn pɔ̄ɔ̄ ki jítiǹ dineendi din u nìn bí yii u néeń-uee. Ní Aminɔn bí-u yii: «Yīkìí nyā doo!» 16Ní Taamaar kíí-u yii: «A yaa jìn̄-mee kpitii làá nyàŋkiǹ in a dáá ŋá nee.» Ama ní Aminɔn kaa ti pée là kí pīlifiǹ-u. 17Ní u yíiń u-tɔntɔnliu ki bí yii: «Jà usapɔɔn nee kí nyāntí doo kí dū kudii kí pìin̄ kí kpàl̄.» 18Ní utɔntɔnlee jìn̄ Taamaar ki nyántì ki dū kudii ki pīiǹ ki kpàl̄.

Taamaar nìn pēē dibɔkutifɔkɔl dimɔntiil diba, di sá yii bɔtiisalib bin kaa nìn nyí uninjee nín nìn pèentí puee dee. 19Ní Taamaar dū ŋfantam ki pùkū u-yil, ki dáaĺ ki cátì dibɔkutimɔntiil din u pēēyee, ní ki dū u-ŋalii ki túǹ u-yil pu ki còom̄ ki cá ki gbáà ibiil. 20Ní u-niija Abisaloom bālifì-u yii: «A-niija Aminɔn bíil̀-si níii? Taa ti lì tiba, m-niisal, a-niija dee. Taa dūú páb́ a-ba.» Kí yòon̄ ŋyunti gbantee, Taamaar nìn kíǹ ki bí u-niija Abisaloom cee icoo poon. 21Ubɔti Daafiidi nìn gbìl̄ tin jítèe kɔkɔ ní ki fōō diŋuul ŋkpitim pu. Ama waa nìn wòon̄ Aminɔn, di sá yii úǹ di nìn sá u-jipɔŋkpiliu ní u nìn néeń-u tikpil. 22Ama Abisaloom kaa nìn gíti sòoǹ nì Aminɔn. U nìn kíǹ ki ná-u, kun puee u nìn bíil̀ u-niisal Taamaar.

Abisaloom yāntì bi kūū Aminɔn ní ki sáǹ

23Tíǹ jítì abin ali boonee, bi bíi cēē Abisaloom piii kuti Baal-Asɔɔr, Eefiraayiim tiŋki caŋin. Abisaloom nìn yíiń ubɔti jipɔmbi kɔkɔ bí jī bi nín bíi cēē u-piii kutee jiŋaaliu. 24Abisaloom cūtìi ká u-baa Daafiidi ki bí-u yii: «Ti-baa, bi bíi cēē man a-tɔntɔnliu piii kuti. M gbāam̀-si, si nì a-kàliŋkpilib ń céeǹ man a-tɔntɔnliu tí cùú jī jiŋaal gbanti.» 25Ní ubɔti kíí-u yii: «Aayee m-jipɔɔn, ti-kɔkɔ kaa máaǹ kí cù, án làá nīn sá-si digìŋ́kpaandi ní.» Ní Abisaloom pée gbíntìi cɔ́ yii bí cù, ní ubɔti yíì, ama ní ki mēē ki bīiǹ u-pu. 26Ní Abisaloom bí yii: «Mimmee sii yaa kaa làá cùee, pɔ̄ nsan m-maan Aminɔn ń céeǹ-ti.» Ní ubɔti kíí-u yii: «Ba pu ní ú céeǹ-si?» 27Ní Abisaloom gbíntìi cɔ́. Ubɔti dāa gīīyee ní ki yāntì Aminɔn nì u-jipɔmbi bin kíǹee cūtì.

Ní Abisaloom bɔ́ntì tijin mbɔtiyaamin. 28Abisaloom tīī u-tɔntɔnliibi mara nee yii: «Ní nīn cɔ́ŋkí Aminɔn. U yaa láa nyùn̄ ndaam ki bál̀ an nyāatì-u ní m yaa láa bí-ni yii: <Kpɔ̀maan Aminɔŋyee!> Ní kpɔ̀-u! Ní taa fàŋkì tiba, man di tīī-ni mara yii ní kpɔ̀-u. Kámaan dipɔbil kí dàkàmaan tininjati.» 29Ní Abisaloom tɔntɔnliibi kūū Aminɔn kii u nín bí yii bí ŋá puee. Niinee ubɔti jipɔmbi bin kíǹee yíkìi yōoǹ bi-mambooŋyi ki sáǹ ki kátì.

30Bi dáá bí nsanni ki sáń ki cá ní Daafiidi gbìl̄ yii: «Abisaloom kūū ubɔti jipɔmbi kɔkɔ pílpil báà ubɔ kaa kíǹ.» 31Niinee ubɔti cúú tiwan tin u pēēyee ki cátì ní ki dōoǹ kitiŋ. Ní u-kàliŋkpilib mun cátì bi-wanti tin bi pēēyee ki yú ki gɔ́ń-u. 32Niinee ní Daafiidi maan Simeeya jipɔɔn Yoonadaab bí yii: «Ti-baa ubɔti, a taa dàkafì yii bi kūū a-jipɔmbi kɔkɔ. Aminɔn baba ní bi kūū. Doooo ŋyunti ŋun Aminɔn bíil̀ u-niisalee ní Abisaloom nìn lī ki yóoǹ yii u làá kpɔ̀-u. 33An puee, á taa dàkafì yii bi kūū a-jipɔmbi kɔkɔ, Aminɔn baba ní bi kūū. 34Abisaloom úǹ sáǹ.»

Un nìn sí sintilee kpēē ndanee ki ká dinikitikpaandi diba tàkāń Ooroonayiim dandi ki kpàkaǹ dijool ki dòoń. 35Ní Yoonadaab bí ubɔti yii: «Ti-baa, kpèè a-jipɔmbi di dòońee! M nín bàà pée tùkū-si puee, míǹ ní ti wāĺ nee.» 36U sòon̄ kaa láá ŋmíl̀ ní ubɔti jipɔmbi dūu bāań. Bi nìn kíĺ nsiim, ní ubɔti nì u-kàliŋkpilib mun bíi sūǹ lɔ̀lɔlɔ.

37Abisaloom nín sáǹee, u nìn cūtìi kɔ́ Amiiyuur jipɔɔn Talimayi, Geesuur bɔtiu pu. Ŋyunti gbanti kɔkɔee, Daafiidi pée gbíntìi kā u-jipɔɔn kpool. 38Abisaloom un nìn sáǹ ki cūtìi bí Geesuur tiŋkinee nìn ŋá niin abin ata ní. 39Ubɔti Daafiidi nìn bíi súntí Aminɔn kúm pu fiii fiii, ní diŋuul din u nìn gíí Abisaloom puee mun sɔ̄ŋkì.

Currently Selected:

2 Samuel 13: BASSARDC

Highlight

Copy

Compare