2 Samuel 12

Naatan wòon̄ Daafiidi u-kpitii pu

1Unimbɔti nìn tú u-bɔnaatiliu Naatan Daafiidi cee. U bàn̄ ki ká-uee ní ki bí-u yii: «Binib bili nìn bí kitiŋ kiban, ubɔ nìn sá ugaaja ní un kíǹee sá usoodaan. 2Ugaajee nìn cáá ipii nì iŋoobu nì inaa tikpil. 3Usoodaanee úǹ kaa nìn pée cáá báà tiba, asee kipisalii kiba ní u nìn dá. U nìn kpīintí-kì ní ki nì u-biyaamu wīintí mbaantiim. Tijin tin u nìn jīǹee nì nnyim min u nìn nyùee ní u tìì-kì. Kipisaliiyee nìn dɔ̀ ki kɔ́l̀-u, ní kì bí kii u-bisalee. 4Dalbee unicaan ubɔ kɔ́ ugaajee. Ama ugaajee kaa là kí cúú u-piii àá u-ŋoobui àá u-naai kansikin ubɔ kí ŋá u-nicaaŋwu tijin. Ama ní ki cúú usoodaan pisaliiki ki kūū ki ŋá u-nicaaŋwu tijin.»

5Ní Daafiidi fōō ugaajee pu diŋuul ŋkpitim pu, ní ki bí Naatan yii: «M pūtì ti-Dindaan un bí nee yii unil un ŋá mimmee máaǹ bí kpɔ̀-u. 6U nín ŋá pu kaa súń u-juti saayee, ú pà mpisalimu munaa kí téeǹ kipisaliiyee pu.» 7Ní Naatan bí Daafiidi yii: «Unil un ŋá mimmee, sii dee! Kpèè ti-Dindaan Isirayeel yab Nimbɔtiu nín lī puee sèé: <Man di lēē-si á nīn sá Isirayeel yab bɔtiu. Man di fīī-si ki nyántì Saayuul ŋaan. 8M dū a-kpiliu Saayuul dicaŋku ki tīī-si, ki dū u-nimpoobi ki ŋá a-ŋaan. M dū-si ki kāaǹ á jī dibeel Isirayeel yab nì Juuda yab pu. An yaa bàà pátì, m bàà ŋūǹ kí kūtì-si tin jítiǹ mimmee. 9Ba pu ní a kpēē man a-Dindaan fám ki ŋá min kaa fáatiǹ-mee? A kūū uyitiija Urii. A yāntì Amɔn yab kūū-u, ní sii fōō u-nimpuu ki cáá. 10An puee kí yòon̄ kɔŋkɔnnee kí nīn cée, nnikpaakoon pée kpá kí lóó a-dicaŋkun, di sá yii a kpēē-mi fám ki fōō uyitiija Urii nimpuu ki cáá. 11Man ni-Dindaan nín lī puee sɔ̀. M làá yàntī mbusu ń jēetí a-pu, ní mbusu gbantee làá nyānní sii a-ba dicaŋkun ní. A-nimbilaaliyin ní m làá fōō a-nimpoobi kí tīī a-yab ubɔ ní ú dòon̄ nì bi ŋwiimpu#12.11 Kpèè 16.21-22.. 12Di sá yii sii ŋá dibalin ní, ama man làá nyāntí tin a ŋée Isirayeel yab kɔkɔ nimbilaaliyin ŋwiimpu ní.»

13Ní Daafiidi bí Naatan yii: «M yīntiǹ ti-Dindaan.» Ní Naatan kíí Daafiidi yii: «Ti-Dindaan mun dū a-kpitii ki pú-si. Aa làá kpú. 14Ama tibɔti nee poonee, a kpēē ti-Dindaan fám. An puee kibininjabiki kin bi màl̄-si nee làá kpú.» 15Niinee ní Naatan nín kùǹ.

Batiseeba biki kúm

Ti-Dindaan yāntì iween iba dɔ́miń ki cúú Urii nimpuu Batiseeba biki kin u màl̄ Daafiidee. 16Daafiidi nìn mēē Unimbɔti kibiki gbanti pu. U nìn bōob̀ kinyɔkɔ, ní u yaa nìn kɔ́ u-diikunee, u dɔ̀ kitiŋ fám ní. 17U-kàliŋkpilib bin bí u-cindinee dɔ́miń u-cee ki gbāam̀-u ú yīkì kitiŋ ní u yíì, ní kaa là kí jī tijin bi-cee. 18An dāa tú kinyɔŋee, kibikee kpíì. Daafiidi tɔntɔnliibi nìn fàŋkí kí tùkù-u yii kibiki kpíì. Bi nìn bíi lì yii: «Ŋyunti ŋun kibikee dáá bée, ti nìn sòon̄ nì u waa pílifiǹ-ti. Kɔŋkɔnnee ti làá ŋá mana kí tùkù-u yii kì kpíì. U ŋūǹ kí ŋá u-ba tin kaa ŋān̄ee!» 19Daafiidi gbìl̄ bi nín bí ki mùkufī bi-ŋmaniŋmee, ní u béè yii kibikee kaa ti bí. Ní u bālifì-bi yii: «Kibikee kpíì níii?» Ní bi kíí-u yii: «Iiin, kì kpíì.» 20Niinee Daafiidi yíkì kitiŋ, ki cūtìi fùl̄ ki yāaǹ u-wunti pu talaalu ní ki kpántì tiwampeeŋkaal. Míǹ boonee ní u nín cá circir kɔŋkooŋŋun ki gbāaǹ ki jáam̀ ti-Dindaan.

U fātìi bāańee ní ki yāntì bi ŋá-u tijin u jíń. 21U-tɔntɔnliibi bālifì-u yii: «Ti-baa, tin a bíi ŋáań nee là kí lì yii ba dee? Di sá ŋyunti ŋun kibiki dáá bée, a nìn bōob̀ kinyɔkɔ ní ki sūǹ. Kɔŋkɔnnee kì nín kpíìyee ní a yíkìi kāl̀ ki bíi jīǹ tijin.» 22Ní Daafiidi kíí-bi yii: «Ŋyunti ŋun kibiki dáá bée, m nìn bōob̀ kinyɔkɔ ki sūǹ, di sá m nìn dàkafī yii an yaa yíì ti-Dindaan làá sɔ̄ m-saai kí cáaǹ-kì. 23Ama kɔŋkɔnnee kì kpíì, ba pu ní m nín gíti bōob̀ kinyɔkɔ? M ŋūǹ kí gíiǹní-kì dimaŋfalinaaa? Man di làá dāá cù ki-cee, kíǹ kaa ti ŋūǹ kí gítiń m-cee.»

Bi màl̄ Saloomɔn

24Daafiidi ŋméeǹ u-nimpuu Batiseeba. Boonee ní u nì u kpáfì ní u cáá dipool ki màl̄ kibininjabiki ní ki pú-kì diyindi yii Saloomɔn. Ti-Dindaan nìn néeń-kì. 25U nìn dī u-bɔnaatiliu Naatan pu ní ki tùkū Daafiidi míǹ. Ní Naatan pú-kì diyindi yii Yeediidiya, an taapu di sá yii: «Un ti-Dindaan néeńee.»

Daafiidi jáń ki fōō Raaba tiŋki

(1 Kroo 20.1-3)

26Ŋyunti gbantee ujanjakpil Joowaab nìn cūtìi jáń nì Amɔn yab tiŋki Raaba ki fōō laakin ubɔti kóòyee. 27Joowaab nìn tú binib bí tùkù Daafiidi yii: «M bíi jáà nì Raaba tiŋkin yab, ki fōō bi-tiŋki laakin bi bíl̀ nnyimee. 28An puee kpāfì bijanjaliibi bin kíǹee, sii a-ba ń dāan̄ kí já kí fōō-kì. Maa là kí já kí fōō-kì m-ba kí fōō diyindi.» 29Ní Daafiidi kpáfì bijanjaliibi bin kíǹee ní bi dɔ́miń ki jáń nì Raaba ki fōō-kì. 30Bi nìn cíkitì Amɔn yab bɔtiu beefuuliiki u-yil pu ki dūu cíkiǹ Daafiidi. Kibeefuuliiyee nyiŋfiŋu nìn sá kiiloobi mmuŋku nì saalaa nyɔkɔm, ní ataŋkpamɔnti náká ki-pu. Kí kūtèe, Daafiidi nìn jáń ki fōō tiwan tikpil, ní ki kóoǹ ki kpīnnì. 31Daafiidi nìn cúú kitiŋ gbanti nib kuyuŋu bi tūǹ atuun ŋin pɔ̄ɔ̄yee. Biba nìn sèekì ki kpítí ataŋkpee, ní biba gà isufi, ní biba mun māā brikisib. Míǹ ní u nìn ŋá Amɔn yab bin bí ntimu mun kɔkɔ kíǹee poon. U ŋá míǹ ki dóòyee ní u nì u-janjaliibi nín gítí Jeerusaleem.

Currently Selected:

2 Samuel 12: BASSARDC

Highlight

Copy

Compare