2 Rois 6

Kicɔkɔ kin wáŋkì bi fātìi kée bɔti

1Dalbee Unimbɔti bɔnaatiliibi kitil bí bi-kpiliu Eeliisee yii: «Kudii kun poon ti nì si kpáfí nee kaa wāā ki bàn̄-ti. 2An puee á pɔ̄-ti nsan tí cù Jɔɔdan buŋgbandi kí gāań idɔ kí cáań kí mā ti-kpafidiiku.» Ní Eeliisee kíí-bi yii: «Nín̄ cámaan!» 3Ní bibɔnaatiliibee kansikin ubɔ bí yii: «Ti gbàam̄-si ní ukpil, pée kíí kí céeǹ timbi a-tɔntɔnliibaa!» Ní Eeliisee kíí yii: «Too, m làá cù.» 4U lī mimmee ní ki yíkì ki táá-bi. Bi bàn̄ Jɔɔdan buŋgbandee ní ki gāā isufi.

5Ŋyunti ŋun bi bíi gà isufee ní bi-kansikin ubɔ cɔkɔbiim cúu báatì ki tɔ́ nnyimin, ní u fáá mbiil yii: «M-bɔlii na! M-dindaan, m mēeń-kì ní!» 6Ní Eeliisee bālifì-u yii: «La pú ní ncɔkɔbiimee tɔ́ ní?» Ní kijapaayee dàkā-u laakin pú ní mi tɔ́ee. Niinee Eeliisee gāā didɔgindi ki dūu tɔ́ nnyimin laakin ncɔkɔbiimee tɔ́ee. Dicilpu niin ní ncɔkɔbiimee yíkì dēeǹ nnyim pu. 7Ní Eeliisee bí-u yii: «Dèetīń-mì!» Ní kijapaayee dēetìń-mì.

Eeliisee cúú Siirii janjaliibi

8Siirii bɔtiu nìn bí ki jáà nì Isirayeel yab. U nì u-janjakpilib yaa nìn kpáfì ki lī yii: «M-janjaliibi làá cùú gāā dijanjannaapaal dooyee», 9ní Eeliisee ń tɔ̄ bí cùú tùkù Isirayeel bɔtiu yii: «Á nīn nyí kí taa dī mpaan nee pu, di sá yii Siirii yab janjaliibi bí niin», 10ní Isirayeel bɔtiu ń lēē bijanjaliibi kí tɔ̄ bí cù kí nīn cɔ́ŋkí niin. An nìn ŋá míǹ ŋfunyɔm kupaau.

U nìn pée tùkù ubɔti tin bée ní úǹ bɔ́ntí u-ba. 11An ŋá mimmee ní Siirii bɔtiu kaa ti nyí tin poon u bée, ní u yíiń u-janjakpilib ní ki bí-bi yii: «Ni-kansikin ubɔ bí Isirayeel bɔtiu jandi pú. Ní tùkùmaan-mi un ní an sée.» 12Ní u-janjakpilib kansikin ubɔ bí yii: «Ti-baa ubɔti, ubɔ kaa bí ki nyēē a-boon! Ama an sá Unimbɔti bɔnaatiliu Eeliisee un bí Isirayeel tiŋkinee di ŋáań míǹ. Báà tin ní a yaa sòon̄ a-didooŋkaaku poonee, u ŋūǹ kí béé-tì kí dūú tùkù Isirayeel bɔtiu.» 13Niinee Siirii bɔtiu bí yii: «Ní cùú nyàab̀ kí béémaan laakin u bée ḿ ŋma kí tɔ̄ binib bí cùú cúuń-u!»

Ní bi tùkū-u yii Eeliisee bí Dootan. 14Niinee ubɔti dū dijanjakitikpaandi nì itaamu nì janjatɔrɔkub ki tú kunyeeuee bi cūtìi māntìi tú kitiŋ kin poon Eeliisee kóòyee. 15Kutaa wúntì kutaafaau pɔ̀lpɔlee Eeliisee tɔntɔnliu péé ki yíkì ki nyáń kitiŋinee ki ká dijanjakitikpaandi nì itaamu nì janjatɔrɔkub māntìi tú kitiŋ. Ní u bí Eeliisee yii: «Ukpil, ti kpíì ní! Ti làá nín ŋá mana dee?» 16Ní Eeliisee kíí-u yii: «Taa pée fàŋkì! Bin bí ti-ceeyee wīikíǹ bin bí bíǹ ceeyee.» 17Eeliisee lī mimmee ní ki mēē yii: «Ti-Dindaan, ŋúbití u-nimbiliŋ ú wāl̀!» Ti-Dindaan cúú utɔntɔnlee nimbiliŋ ki ŋúbitèe ní u wál̀ itaamu nì janjatɔrɔkub bin sá ŋŋmee gbí dijool pu ki māntìi tú Eeliisee.

18Siirii janjaliibee nìn bíi còom̄ ki cá Eeliisee cee ní úǹ mēē ti-Dindaan yii: «Yàntī bijanjaliibi nee kɔkɔ ń kpántí bijɔfub!» Ní ti-Dindaan lafun yāntì bi kpántì bijɔfub kii Eeliisee nín mēē puee. 19Niinee Eeliisee bí-bi yii: «Ni yīntì nsan, kitiŋ kin poon ni cée kaa sɔ̀. Páaḿmaan m-boon ḿ cáá-ni kí cùnnì unil un ni nyàab̀ee cee.» Ama Eeliisee yōoǹ-bee ní ki cáá-bi ki cūnnì Samaarii tiŋkin. 20Ŋyunti ŋun bi bàn̄ Samaariiyee ní Eeliisee mēē yii: «Ti-Dindaan ŋúbití binib nee nimbiliŋ bí wāl̀!» Ti-Dindaan ŋúbitì bi-nimbiliŋee ní bi ká yii bi bí Samaarii tiŋki poon táb.

21Isirayeel bɔtiu nín ká-bee ní u bālifì Eeliisee yii: «M-baa, ḿ kpɔ̀-baaa?» 22Ní Eeliisee kíí-u yii: «Taa kpɔ̀-bi! Mimmee a yaa cūtì kujaau ní ki cúuń binib bi kpántì a-yumbuuyee, a kù-bi níii? Tīī-bi tijin bí jī kí tīī-bi nnyim bí nyɔ̀ ní kí yàntī bí nīn gítí bi-kpiliu cee.» 23Niinee Isirayeel bɔtiu ŋá-bi tican ní bi jíń ki nyùn̄. Bi jíń ki nyùn̄ míǹ ki dóòyee ní u yāntì bi nín gítí bi-kpiliu cee. Kí yòon̄ yaadal wiiŋŋuee, Siirii yab bin dòoń ki fúkuĺ binib Isirayeel tiŋkinee kaa ti pée dɔ́miń.

Ŋkùm nyáń Samaarii tiŋkin

24Ŋyunti ŋubɔ boonee Siirii bɔtiu Been-Adaadi kóoǹ u-janjakitiŋ kɔkɔ ki kpáfì ní ki cūtìi māntìi tú Samaarii tiŋki kí já nì kì. 25An ŋá mimmee ní ŋkùm dūu nyáń Samaarii tiŋkin. Bin nìn māntìi tú kitiŋee nìn cí-kì tiŋan, an puee bi nìn kíǹ ki dāā kimaŋ yil animbil kúti jitɔmbi imuŋku inaa ní ki dāā atùun disambijandi animbil kúti jitɔmbi biŋmoo.

26Dalbee Isirayeel bɔtiu tɔ́kɔ́ digundi din bi máń ki māntìi tú kitiŋee pu ki jītí ní unimpu ubɔ téeń ki yíiń-u ní ki bí yii: «Ti-baa ubɔti, dāá fīī-mi!» 27Ama ní ubɔti kíí-u yii: «Ti-Dindaan yaa kaa fīī-si, man làá ŋá mana ní kí fīī-si! Tijin kaa ti báaa, ndamam mun kaa ti bí.» 28Ubɔti gíti nìkī ki bí-u yii: «Ba ní a là ní?» Ní unimpuee kíí-u yii: «A ká unimpu nee yaa! Yaadalee u dɔ́miń ki ká-mi ní ki bí-mi yii: <Yàntī tí ŋmɔ́ a-biki díǹ, foolee tí fu ŋmɔ́ man yaka.> 29Niinee ní ti cúú m-biki ki kūū ki tɔ́kɔǹ ní ti ŋmɔ́#6.29 Kpèè Ditee 28.57, Iyal 4.10.. Kutaa wúntèe ní m bí-u yii: <Cáań a-biki tí ŋmɔ́>, ama ní úǹ yōoǹ u-biki kí cáa bál̀.»

30Ubɔti nín gbìl̄ unimpuee nín sòon̄ puee ní u cúú u-wanti tin u pēēyee ki dáaĺ ki cátì. Ubɔti còom̄ digundi pu ki jītée ní binib ká yii u dū kutuku ki ŋá poon bɔkutil ki pēeǹ#6.30 An yaa nìn sá tibɔti tin pɔ̄ɔ̄yee àá dinimbinaamandi poonee, Isirayeel kpilib nìn dū kutuku ní kí pèen̄ poon kí dàkà yii bi sīntì bi-ba Unimbɔti nimbiin.. 31Ní ubɔti bí yii: «Díǹ nee, m yaa kaa lēē Safaati jipɔɔn Eeliisee yil, Unimbɔti ń dáaĺ m-tafal kí gíti kūtì!»

Eeliisee sòon̄ yii ŋkùm làá kúntí

32Eeliisee nìn kā u-dumpu ní bitindaŋkpilib kā ki kɔ́ĺ-u. Ubɔti nìn dū ubɔ ki tú u-cee. Ama udaan kaa láá bāań u-cee ní Eeliisee bí bikpilibee yii: «Ni káa! Unikpɔl nee túnní ubɔ ú dāá lēē m-yil. Udaan yaa láa bāańee, ní dū kudii kí kpàl̄ kí taa pɔ̄-u nsan. Pīlifìmaan, m gbìl̀ u-kpiliu pu u pánní u-boon ki dòoń.» 33Eeliisee nìn dáá bíi sòoǹ u-nyɔkɔ kaa láá ŋmíl̀ ní ubɔti tuuŋŋuee dūu bāań u-cee ki bí-u yii: «Ti-Dindaan di yāntì digìńdi nee bāań-ti! Ba ní m gíti ŋūǹ kí nīn kā ki cí ú ŋá kí tīī-mi?»

Currently Selected:

2 Rois 6: BASSARDC

Highlight

Copy

Compare