2 Rois 5

Eeliisee cáaǹ Naama unyaŋgbanti

1Siirii tiŋki bɔtiu janjakpiliu ní bi yíì Naama. U-kpiliu nìn pàkà-u ki dàkà-u kulaŋŋaŋfitiiu. Di sá yii u-pu ní ti-Dindaan nìn dī ki tīī Aram yab dijajil. Ama ubaatandaan nì ujanjakpaan gbantee nìn sá unyaŋgbanti. 2Siirii yab janjaliibi biba nìn nyáń ki kɔ́ Isirayeel tiŋkin ki fúkúl̀ bi-wanti ní ki kpáàa cúuń kisapɔmbiki kiba uyumbu. Kì nìn bí Naama nimpuu cee ní ki tūǹ-u ditundi. 3Dalbee ní kì bí ki-kpiliu yii: «Áà, m-kpiliu cal yaa bàà ŋūǹ kí cù kí ká Unimbɔti bɔnaatiliu un bí Samaarii tiŋkinee! Úǹ bàà làá cáaǹ-u u-nyaŋgbandi nee.»

4Niinee ní Naama cūtì u-kpiliu ubɔti cee ki dū tin kisirayeelsapɔmbikee tùkū-uee ki máafì-u. 5Ní ubɔti bí yii: «Bɔ́ntí a-ba kí nīn cá, m làá tīī-si kugbɔŋu á cáá tīī Isirayeel bɔtiu.» Niinee Naama yōoǹ animbil kiiloobi alaataa ata nì sindaariya kiiloobi imuŋku ita nì jiŋaal bɔkutiŋ saalaa ki kíĺ nsan ki nín cá. 6U bàn̄ee ní ki dū kugbɔŋuee ki tīī Isirayeel bɔtiu. Kugbɔŋuee poonee, bi nìn ŋmàn̄ yii: «Man di túnní m-janjakpiliu Naama un ŋúb́ kugbɔŋu nee yii á cáaǹ-u u-nyaŋgbandi.» 7Ubɔti nín pée kàan̄ kugbɔŋu ki dóòyee ní ki cúú tiwan tin u pēēyee ki cátì ní ki bí yii: «M sá Unimbɔtaaa? M cáá mpɔn kí kpɔ̀ unil àá kí yàntī unil ń nīn bí dimaŋfalinaaa? Kin ba pu ní Siirii bɔtiu dū ubɔ ki túnní m-cee ḿ cáaǹ-u dinyaŋgbandi? Ni káa, u bíi tákà-mi tibɔti ní!»

8Unimbɔti bɔnaatiliu Eeliisee nín gbìl̄ yii Isirayeel bɔtiu dáaĺ tiwan tin u pēēyee ki cátèe, ní u tú bí tùkù-u yii: «Ba pu ní a dáaĺ ki cátì tiwan tin a pēēyee? Yàntī Naama ń dāan̄ m-cee, u làá béé yii Unimbɔti bɔnaatiliu ubɔ bí Isirayeel tiŋkin.»

9Niinee Naama jɔ́m̀ ki kāl̀ u-tɔrɔkuu un u-taamui dátée poon, ki nín cá ki cūtìi síl̀ Eeliisee diiku nyɔkɔpu. 10Eeliisee nìn tú ubɔ ú tùkù-u yii: «Cù Jɔɔdan buŋŋun kí múĺ ŋfunyɔm miluli pu. A yaa ŋá míǹ, a làá pɔ̄ɔkì ní a-wunti ń ŋāŋkì.» 11Naama gbìl̄ mimmee ní ki gíí diŋuul ki nín cá ki lī yii: «Man bàà dàkafī yii u làá nyānní kí sīĺ m-nimbiin kí mèè ti-Dindaan u-Nimbɔtiu, ní kí dū u-ŋal kí càab̀ m-wunti laakin dinyaŋgbandi tɔ́ee ní kí cáaǹ-mi. 12Damaasi buŋyi Albana nì Paarpaar kaa jítiǹ ibun in kɔkɔ bí Isirayeel tiŋkineeee? Maa bàà ŋūǹ kí múĺ íǹ poon m-wunti ń ŋāŋkàaa?»

U lī mimmee ní ki fātì kí nīn kùǹ nì diŋuul. 13Ama ní u-tɔntɔnliibi sútì ki pìl̄-u ní ki bí-u yii: «Ukpil! Unimbɔti bɔnaatiliu nee yaa bàà bí-si yii á ŋá tiba tin pɔ̄ɔ̄yee, aa bàà làá ŋáaa? Kin ŋma nín kàlaasì u nín bí-si yii: <Cùú dū a-ba kí múĺ nnyimin a-wunti ń ŋāŋkì na!>» 14Niinee Naama nín sìntī Jɔɔdan buŋŋun ki múĺ nnyimin ŋfunyɔm miluli pu kii Eeliisee nín bí yii ú ŋá puee, ní u-wunti ŋáŋkì kii kibiki wunti nín bí puee#5.14 B. 1-14. kpèè Luuki 4.27.. 15Dicilpu niinee ní u nì u-naacimbi nín gítí Unimbɔti bɔnaatiliu cee. U bàn̄ee ní ki kɔ́ ki síl̀ u-nimbiin ní ki bí-u yii: «Kɔŋkɔnnee ní m nín béè yii Unimbɔti ubɔ kaa ti bí kitiŋ pu laaba an yaa kaa sá Isirayeel tiŋkin. M gbàam̄-si, fōō tiwampɔkaal tin man a-tɔntɔnliu cáań-si nee.» 16Ama ní Eeliisee kíí yii: «Nì ti-Dindaan un bí dimaŋfalin m sá u-tɔntɔnliu nee yindi puee, m pūtì yii m kpá kí fōō tiba.» Naama pée páb́-u yii ú fōō, ama ní Eeliisee yíì.

17Naama bí yii: «Kii a nín yíì kaa fōō m-wampɔkaatee, pɔ̄-mi nsan ḿ yáfí a-tiŋki pu tam kí túń imamboon ili. Di sá yii man a-tɔntɔnliu kaa ti làá ŋá saraawɔkaa àá saraa ubɔ fám kí tīī awaa, see ti-Dindaan baba. 18Ama m mèé yii ti-Dindaan ń dū tin bí nee kí pɔ̄-mi. Di sá yii m-kpiliu Siirii bɔtiu yaa kɔ́ u-waal Riimɔn diikun ki gbāaǹ kí jāam̀-dì ní ma mun gbāaǹee, an sá yii m-ŋaliŋu pu ní u nyìitī. M yaa gbāā diwaal Riimɔn diikun mimmee, ti-Dindaan ń dūú pɔ̄ man a-tɔntɔnliu an pu.» 19Ní Eeliisee kíí-u yii: «Nín̄ cá nì ŋgbansɔŋfi.» Ní Naama nín cá.

Geeyaasii yìntitam

Naama búntì kaa láá kɔ́ ndan 20ní Eeliisee tɔntɔnliu Geeyaasii lī u-neen yii: «M-kpiliu ŋá u-ba kaa fōō tin usiiriija Naama cáań kí pɔ̄-uee tiba. Nì ti-Dindaan un bí dimaŋfalin nee yindi puee, m làá sāǹ kí páań u-boon kí fōoń tiba u-cee!» 21Ní Geeyaasii kùl̄ ki bīiǹ Naama boon. Naama nín ká-u u sáń ki dòoń u-ceeyee ní u kpákatì u-tɔrɔkuu pu malaa ki túŋkì-u ní ki bālifì-u yii: «Ba ŋá?» 22Ní Geeyaasii kíí-u yii: «Tiba kaa ŋá. M-kpiliu di túnní-mi ḿ tùkù-si yii: <A nín pée búntì kpalaayee ní Unimbɔti bɔnaatiliibi kitil poon binib bili nyánní Eefiraayiim jooŋŋi pu ki bāań m-cee. An puee m gbàam̄-si, tīī-mi animbil kúti kiiloobi mmuŋku nì saalaa nì jiŋaal bɔkutiŋ ali.>» 23Ní Naama bí-u yii: «Yòon̄ animbil kúti kiiloobi imuŋku ita.» U pée páb́-u míǹ ní ki dū animbil kúti kiiloobi imuŋku ita nì tiwampeeŋkaal tili ki ŋá kutukub bili poon ki kúĺ ki dūu túǹ u-tɔntɔnliibi bili bí túń kí cáá céeǹ Geeyaasii. 24Bi bàn̄ Oofeelee ní Geeyaasii fōō kutukubee ki dūu bíl̀ u-cee ní ki bí Naama tɔntɔnliibee yii bí nīn gítí, ní bíǹ nín cá.

25Míǹ boonee ní Geeyaasii nín kóò u-kpiliu Eeliisee cee ní úǹ bālifì-u yii: «Geeyaasii, a nyánní la ní?» Ní u kíí yii: «Man a-tɔntɔnliu kaa pée cūtì laabaa!» 26Ama ní Eeliisee bí-u yii: «A nyí yii maa bí a-cee ŋfamin ŋyunti ŋun uninja ubɔ kpákatì malaa u-tɔrɔkuu pu ki túŋkìń-see niin? Mimmee ŋyunti ŋun an sá á fōō animbil kúti nì tiwampeeŋkaal nì ɔliifi nì fiinyi nì ipii nì iŋoobu nì inaa nì bitɔntɔnliibi bininjab nì binimpoobee deeee? 27Too Naama nyaŋgbandi làá gítí sii nì a-naantiibi pu ní kí nīn cá jaanjaan!» Geeyaasii nyáń Eeliisee ceeyee, dinyaŋgbandi píń u-wunti pu ki pīiǹ kii ntaayimee.

Currently Selected:

2 Rois 5: BASSARDC

Highlight

Copy

Compare