2 Chroniques 4
4
1Bi nìn dū tasa ki mɔ́ɔ́ nsaraafan ŋubɔ, ŋu-púuŋŋu sá meetab saalaa, ŋu-waaŋŋu sá meetab saalaa ní ŋu-fɔkɔŋŋu sá meetab biŋmoo#4.1 Dūú ŋmàntī nì Disa 27.1-2..
Bi dū tasa ki mɔ́ɔ́ kusɔŋkpaaŋŋu nì asambil
(Kpèè 1 Bib 7.23-26)
2Bi nìn dū tasa ki mɔ́ɔ́ kusɔŋkpaaŋŋu dikuŋkundi. Kí yòon̄ dinyɔɔgbandi diba kí cáá sāā din kíǹee, mpúun nìn sá meetab biŋmoo, ku-fɔkɔŋŋu nìn sá meetab bili nì dijandi, ní kí màntīí tū-kùee sá meetab saalku. 3Bi nìn lēē inajaa yam ki māntìi tú kusɔŋuee nyɔɔgbaŋŋi, dimeetajandi kamaa puee, inajaa saalaa di nìn bí ikuul ili pu. Ŋyunti ŋun bi nìn dūntì tasa ki mɔ́ɔ́ kusɔŋuee ní bi dūntì ki mɔ́ɔ́ inajaa gbanti mun. 4Bi nìn dūntì tasa ní ki dūu mɔ́ɔ́ inajaa saalaa nì ili: ita nìn kpèé ŋgan pú ní ita kpèé ŋwìiń jeetilaŋki pú ní ita kpèé ŋgiil pú ní ita mun kpèé ŋwìiń nyalaŋki pú, ní bi dū kusɔŋuee ki tɔ́kɔǹ i-pu. 5Kusɔŋuee gbifiŋŋu nìn sá kii santimeetab binii waaŋŋuee ní, ní bi nìn ŋáŋkì ku-nyɔɔgbaŋŋi kii kɔŋkɔnnyɔkaa nyɔɔgbaŋŋee, ní an gíti bí kii lii supumpukumee. Nnyim liitirib kutukub dilaataal nì mmuŋku di nìn kàal̀ poon.
6Bi nìn gíti mɔ́ɔ́ nsampeemu saalaa ní ki dū muŋmoo ki síiǹ kusɔŋuee gaŋŋu pú ní ki dū muŋmoo mun kíǹee ki síiǹ ŋgiil pú. Nnyim min nìn kā nsampeemu gbanti poonee ní bi nìn cáa fíntí ki ŋáań tiwan circir. Nsampeemu gbantin ní bi nìn fíntí saraawɔkaa nanti, ama kusɔŋkpaaŋŋu poon nyim ní bisaraaŋaliibi nìn cáa fíntí bi-ba.
Tiwan tin bi nìn dū sindaariya ki mɔ́ɔ́yee
(Kpèè 1 Bib 7.40-51)
7Uram nìn dū sindaariya ki mɔ́ɔ́ fitilab tɔ́kɔŋkaati saalaa ki nóó nì bi nín síiǹ mara bí mɔ́ɔ́-bi puee. U nìn dū-bi ki síiǹ kunimbɔtidiin, biŋmoo bí ŋŋaŋgiil pú ní biŋmoo bí ŋŋaŋgan pú#4.7 Dūú ŋmàntī nì Disa 25.31-40..
8U nìn kpáá teebilib saalaa ki dūu síiǹ kunimbɔtidiin, biŋmoo ŋŋaŋgiil pú ní biŋmoo mun ŋŋaŋgan pú#4.8 Dūú ŋmàntī nì Disa 25.23-30..
U nìn dū sindaariya ki mɔ́ɔ́ nsambiyaamu dilaataal ki ŋáań mu-poon fatiku kí nīn cáa yàantí.
9U nìn ŋá kiciŋwaai ki tīī bisaraaŋaliibi ní ki ŋá diciŋkpaandi. Diciŋkpaandi gbanti nìn cáá mpunyɔmu ní u dū tasa ki nyūntì-mu.
10U nìn dū kusɔŋkpaaŋŋu dikuŋkundee ki síiǹ kunimbɔtidii ŋŋaŋgiil pú, ki nákáǹ ŋgan pú nì ŋwìiń nyalaŋki faŋfakam.
11Uram nìn ŋá asambil nì peelab nì nsambiyaamu mun poon bi ŋáań tiwan ki cáa yàantée. U nìn túń ditundi din ubɔti Saloomɔn nìn tīī-u ú tɔ̄ kunimbɔtidiinee ki dóò, an dàkà yii: 12jaantalkub bili,
nì akɔl akuŋkun ŋin bi làá dūú páań jaantalkubee yilpuee,
nì tilaandi tili tin bi làá dūú bìin̄ akɔl ŋin pá jaantalkubee puee,
13nì greenaadi subiliŋ alaataa anaa ŋin bi làá dūú lúntí tilaandee puee, an dàkà yii kulaaŋŋu kamaa puee, bi nìn lúntì greenaadi subiliŋ gbanti ikuul ili pu ní ki bīiǹ jaantalkub kɔliŋee pu,
14nì tɔrɔkub nì tisɔn tin tɔ́kɔ́ tɔrɔkub gbanti puee,
15nì kusɔŋkpaaŋŋu dikuŋkundee,
nì inajaa saalaa nì ili in tú kusɔŋu gbantee,
16nì asambil nì peelab nì njiimu mun cáá anyin bi cáa sàatī tinanee nì tiwan tin pée kíǹ bi cáa tūǹ ditundee.
Tasa kúmɔntiiti ní Uram nìn dūu mɔ́ɔ́ tiwan gbanti kɔkɔ ki tīī ubɔti Saloomɔn ú dūú síiń ti-Dindaan Diikun. 17Jɔɔdan tantakalin, Sukooti nì Saartan timbilimmu kansikin ní ubɔti nìn yāntì bi dūntì tasa, kuyɔkɔu paamun ki mɔ́ɔ́ tiwan gbanti kɔkɔ. 18Tiwan tin Saloomɔn nìn ŋée nìn wīikí tikpil, an puee baa nìn gíti nyàab̀ kí béé tasa kúti tin bi dūu ŋá an tuuŋŋi gbanti kɔkɔee nyiŋfiŋu.
19Saloomɔn nìn gíti yāntì bi dū sindaariya ki ŋá ti-Dindaan Diiku wanti tin an bàlifēe.
Bi nìn dū sindaariya ki mɔ́ɔ́ nsaraafan ŋun pu bi tùutī talaalubee,
ki dū sindaariya ki mɔ́ɔ́ teebil un pu bi pāantí kpɔnɔb kí dūú sú Unimbɔtee#4.19 kpɔnɔb kí dūú sú Unimbɔtee: kpèè Akoo 24.5-9.,
20ní ki dū sindaariya ki mɔ́ɔ́ fitilab tɔ́kɔŋkaati nì bi-fitilab ki síiǹ Circir páaa laŋki nyɔkɔpuee bí nīn tùutī-bi ki nóó nì bi nín síiǹ puee,
21ní ki dū sindaariya ki mɔ́ɔ́ nsupumpukum nì fitilab nì tibabiti,
22ní ki dū sindaariya ki mɔ́ɔ́ bɔlfitantab nì asambil ŋin poon bi ŋáań fatiku ki yàantée nì kɔŋkɔnnyɔkaabi nì nfantansamu.
Bi nìn dū sindaariya ní ki mɔ́ɔ́ kunimbɔtidii punyɔmmu nì mpunyɔmu mun bi dì kí kɔ́ Circir páaa laŋkee nì kunimbɔtidii dikpaaŋku.
Currently Selected:
2 Chroniques 4: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
