2 Chroniques 3
3
Kunimbɔtidii mātam
(Kpèè 1 Bib 6.1-38)
1Saloomɔn nìn kíĺ ki bíi māā ti-Dindaan Diiku Jeerusaleem tiŋkin, Mooriya jool pu. Niin ní ti-Dindaan nìn lēē u-ba ki dàkā u-baa Daafiidi. Daafiidi nín nìn bɔ́ntì mpaan gbanti ujeebusja Ɔrinan naapaal pu. 2U nín jíń dibeel dibinnanaatiil ŋmaliliitiu poonee ní u kíĺ ki bíi māā-ku.
3Ti-Dindaan Diiku kun Saloomɔn nìn máńee nyeel nìn fɔ̀kɔ̀ mpúun pu meetab mmuŋku nì saalaa ní ku-waaŋŋu sá meetab saalaa. 4Kunimbɔtidii nyɔkɔpuee, kudii kubɔ nìn bí bi tà kí kɔ́, ku-waaŋŋu nìn sá meetab saalaa kii kunimbɔtidii ku-ba waaŋŋuee, ní ku-púuŋŋu sá meetab biŋmoo. U nìn dū sindaariyamɔnti ní ki nákáǹ ku-poon. 5U nìn dū siipreesi dɔi in bi látì apampan ki dū sindaariya ki nyūntèe ki nákáǹ kudikpaaŋŋuee poon. Bi nìn lēē ibafi nì ikusaka ki nákáǹ adɔpampanee pu. 6Bi nìn gíti dū ataŋkpamɔnti ní ki nyɔ̄kɔntì kudii gbanti. Sindaariya un bi nìn dūu túń ku-pu ditundee nìn nyánní Paarwayiim tiŋkin ní. 7Bi nìn dū sindaariya ki nyūntì kudiiyee dɔi in bi dūu kpáá ki bɔ̀b̄ yilpuee nì ku-punyɔmmu nì ku-guŋŋi nì ku-punuubi, ní ki kpítì keerubimbi ki nákáǹ agun pu.
8U nìn máń kudii kun bi yíì circir páaa laŋkee#3.8 Dūú ŋmàntī nì Disa 26.33-34., ku-waaŋŋu nì kunimbɔtidii waaŋŋu nìn sá mbaantiim ní: meetab saalaa, ní ku-fɔkɔŋŋu sá meetab saalaa. Bi nìn dū sindaariyamɔnti tɔɔnib mmuŋku ní ki nyūntì ki bīiǹ ku-poon. 9Bi nìn dū sindaariya ki mɔ́ɔ́ ipiin ní i-nyiŋfiŋu nìn sá graambi alaataa aŋmoo. Ki kpáaǹ adiin ŋin nìn tɔ́kɔ́ yilpuee, bi nìn dū sindaariya ní ki nyūntì ki bīiǹ ŋi-guŋŋi pu.
10Bi nìn dūntì tikúti ki dūu mɔ́ɔ́ keerubimbi bili. Bi nìn dū sindaariya ki nyūntì-bi, ní ki dū-bi ki síiǹ circir páaa diikun. 11Keerubimbee feeŋyi fɔkɔŋŋu nìn sá meetab saalaa. Keerubim peekaa feeŋŋu ŋubɔ fɔkɔŋŋu nìn sá meetab bili nì dijandi ní ki nìn tūū digundi, ní ŋfeen ŋun kíǹee sá meetab bili nì dijandi, ní ki nìn tūū Keerubim un kíǹee feeŋŋu ŋubɔ. 12Keerubim liliitee feeŋŋu ŋubɔ fɔkɔŋŋu nìn sá meetab bili nì dijandi ní ki nìn tūū kunimbɔtidii gundi ní ŋun kíǹee mun nìn sá meetab bili nì dijandi ní ki nìn tūū keerubim upeekaayee feeŋŋu ŋubɔ. 13Keerubimbee feeŋyi nìn kpátì ní ki nìn wāā ki bàn̄ meetab saalaa. Bi nìn yú ní bi-nimbiiŋyi túĺ poon pú#3.13 Dūú ŋmàntī nì Disa 25.18-20.. 14Bi nìn dū ŋŋaabu ŋun dàfèe nì ŋŋaaman gùŋgum nì ŋŋaaman cínciŋ nì ŋŋaaman wèeee ki lùn̄ ŋŋaasakaŋkaa. Bi nìn lùn̄ keerubimbi ki nákáǹ ŋu-pu#3.14 Dūú ŋmàntī nì Disa 26.31..
Tasa kúti jaantalkub nì nsaraafan bɔti
(Kpèè 1 Bib 7.15-22)
15Bitɔntɔnliibi nìn dū tasa kúti ki mɔ́ɔ́ jaantalkub bili ki síiǹ kunimbɔtidii nyɔkɔpu, bi-fɔkɔŋŋu nìn sá meetab saalku nì bili. Bi nìn mɔ́ɔ́ akɔl ali yam ki páaǹ jaantalkubee pu. Akɔlee fɔkɔŋŋu nìn sá meetab bili nì dijandi ní. 16Bi nìn gíti ŋá tinyɔkɔntikaal ikusaka yam ki dūu sākaǹ jaantalkubee yilpu. Bi nìn gíti mɔ́ɔ́ greenaadi biliŋ ki sākaǹ ikusakee pu. 17Bi nìn dū jaantalkubee ki cóoǹ kunimbɔtidii nyɔkɔpu, ubɔ bí ŋgan pú ní un kíǹee bí ŋgiil pú. Bi nìn yíì un bí ŋgiil púee yii Yakiin, taapu sá yii: <Unimbɔti di tìì mpɔn>, ní ki yíì un bí ŋgan púee yii Boowaasi, taapu sá yii: <Unimbɔtin ní mpɔn bí>.
Currently Selected:
2 Chroniques 3: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
