1 Samuel 9

Saayuul nì imansal bɔti

1Ŋyunti gbantee, Beenjameen tiŋkinee, uninja ubɔ nìn bí ki sá ubaatandaan bi yíì-u yii Kiisi. Bi nìn yíì u-baa yii Abiyeel ní ki yíì u-naanja yii Seeroor. Bi nìn yíì Seeroor baa yii Beekoorati ní ki yíì u-naanja yii Afiya. 2U nìn cáá jipɔɔn ubɔ bi yíì-u yii Saayuul. U nìn ŋān̄ unaacimpɔɔn an kaa cáá bí lì. Isirayeel tiŋkinee, un nìn ŋān̄ ki bàn̄-uee kaa bí, ní u nìn fɔ̀kɔǹ bi-kɔkɔ.

3Dalbee, Saayuul baa Kiisi mansalii wáŋkì, ní u bí u-jipɔɔn yii: «Yòon̄ utɔntɔnli ubɔ kí páań a-boon ní cùú nyàab̀ imansal.» 4Saayuul nì utɔntɔnlee yìin̄ Eefiraayiim timmu mun bí ajoon puee, nì Salisaa timmun kaa ká-i. Boonee ki nín cá Saaliim timmun ki yìin̄ kaa ká-i, ní ki yìin̄ Beenjameen timmun kaa ká-i. 5Bi bāań Suufi tiŋkinee ní Saayuul bí utɔntɔnlee yii: «Tí gítí mmɔŋki, an yaa sá fám m-baa làá súntí imansal pu kí nīn bíi yáliŋkí ti-pu.» 6Ní utɔntɔnlee kíí-u yii: «Unimbɔti bɔnaatiliu ubɔ bí kitiŋ nee poon! U sá unil un pu bi nyée ní. Tin u yaa lēe, see á ká míǹ deedee. Tí cùú ká-u, an yaa yíì, u làá dàkà-ti dijandi din sá tí túĺ kí nīn nyàab̀ee.» 7Ní Saayuul kíí-u yii: «Too, tí cù. Kin ba ní ti làá tin pɔ̄ Unimbɔti bɔnaatiliu gbanti? Di sá yii ti-kpɔnɔb dóò kulooun, ní taa ti cáá tiwampɔkaal tiba mun kí tin pɔ̄-u, tiba nì tiba kaa ti kíǹ ti-cee.» 8Ní utɔntɔnlee bí yii: «Man cáá kijitɔŋwaai kiba m-cee doo. M làá dū-kì kí tīī Unimbɔti bɔnaatiliu ú dàkà-ti nsan ŋun sá tí túĺee.» 9Njaminee Isirayeel yab yaa nìn cá Unimbɔti cee kí bàlifèe, bi nìn lì yii: «Dāam̄maan tí cù un wāĺee cee ní.» Di sá yii bi nìn yíì bin ti yíì díǹ Unimbɔti bɔnaatiliibi nee yii bin wāĺee ní. 10Ní Saayuul bí u-tɔntɔnliuee yii: «A nín lī puee ŋān̄, tí nīn cá.»

Ní bi páaǹ tɔb pu ki búntì kitiŋ kin poon Unimbɔti bɔnaatiliuee kóòyee. 11Bi bíi dàb̀ kí kɔ́ kitiŋinee ní ki tú bisapɔmbi cá ŋkpin, ní bi bālifì-bi yii: «Doo ní uninja un wāĺee báaa?» 12Ní bisapɔmbee kíí-bi yii: «U bāań an kaa yúntì ní ni mun dūu bāań nee. Ama ní ŋá malaa, u dɔ́miń kitiŋin díǹ. Di sá yii u cáá saraa ubɔ ki làá ŋá kí tīī samaa díǹ nsaraaŋapaan pu. 13Ni yaa pée kɔ́ kitiŋin kpalaayee, ni làá ká-u kí wàatī ú nīn nín jɔ́ḿ nsaraaŋapaan laŋki kí jī tijin. Di sá yii u yaa kaa bāań, samaa kaa máaǹ kí jī, kun puee úǹ di mèé kí bìin̄ saraa jinti pu ní bin bi yíińee ń nín jī. Míǹ puee nín̄ cámaan kɔŋkɔnnee, ni làá tin yìkin̄-u.»

Samiyeel nì Saayuul kpáfì

14Ní bi nín jɔ́ḿ kitiŋin. Ŋyunti ŋun bi làá kɔ́ kitiŋinee, Samiyeel mun nyēē bi-nimbiin kí nīn cá nsaraaŋapaan pu dee.

15Too, kutaa ń wúntí Saayuul ń bà Samiyeel ceeyee, ti-Dindaan tùkū Samiyeel yii: 16«Fool ŋyunti nee deedeeyee, m làá fu yàntī Beenjameen naakookun niliu ubɔ ń dāan̄ a-cee. Á fu sìtī u-yil pu ŋkpam kí kàan̄-u m-nibul Isirayeel yab pu dibeel. U làá dāá fīī m-nibul Isirayeel yab Fiiliistii yab ŋaan. Di sá yii m ká m-nibul falaau ki gbìl̄ di-yaliŋkii.» 17Ŋyunti ŋun Samiyeel ká Saayuul páaǹnée ní ti-Dindaan bí-u yii: «Kpèè uninja un bɔti m fu sòon̄ nì si yii u làá jī m-nibul pu dibeelee sèé.»

18Saayuul sútì ki pìl̄ Samiyeel kitiŋ punyɔkɔki caŋin ki bālifì yii: «M gbāam̀-si, dàkà-mi laakin un wāĺee kóòyee.» 19Ní Samiyeel kíí-u yii: «An sá man. Lìntī m-nyɔkɔpu tí jɔ̄m̀ nsaraaŋapaan laŋki. Ni làá jī man cee ní tijin díǹ, ní fool kutaafaauee ḿ fu tùkù-si tin kɔkɔ páb́-see, ní kí fu pɔ̄-si nsan á fàtī. 20An yaa kíǹ imansal in wáŋkì an ŋá díǹ iwiin itee bɔtee, taa ti yāliŋkì, di sá yii bi fātìi ká-i. Ŋma di yì tigaajawan tin kɔkɔ bí Isirayeel tiŋkinee ní? An kaa sá sii nì a-baa dicaŋkuaaa?» 21Ní Saayuul bí yii: «Man sá Beenjameen naakookun naa! Isirayeel naakɔti kɔkɔ poonee, kúǹ di sá kiwaai, ní Beenjameen naakookunee, man dicaŋku di kaa pée bí tiban! Kin ba pu ní a sòon̄ nì mi míǹ?»

22Samiyeel cáá Saayuul nì utɔntɔnlee ki kɔ́ǹ kudii kun poon bi làá jī tijinee. U nìn kāaǹ-bi jilma paaŋyi binib bin u yíińee kansikin. Bi nìn sá binib mmuŋku nì saalaa nyɔkɔm ní. 23Ní Samiyeel bí ujiŋŋal yii: «Cáań dinaŋkúndi din m bàà lēē ki tīī-si á yóońee.» 24Ní u cūtìi cáań dinantaal nì dipugbindi ki yóoǹ Saayuul nimbiin, ní Samiyeel bí-u yii: «Dinaŋkúndi din m lēē ki yóoǹ-see dee. Sii di yì. Nín̄ ŋmóò. Dikpafil nee pu ní bi lēē-dì ki yóoǹ. Sii nì bin m yíińee ń kpāfì kí ŋmɔ́.» Ŋwiin gbantee Saayuul nì Samiyeel di nìn kpáfì ki jíń tijin. 25Ní bi yíkìń nsaraaŋapaan laŋki ki sīntìń kitiŋin. Ní Samiyeel kāl̀ bi nín bɔ̀b̄ kudii yilpu puee u nì Saayuul gbáń mmaam.

26Saayuul nì u-tɔntɔnliuee fīntì kutaafaau pɔ̀lpɔl. Kutaa wúntì ki dóòyee ní Samiyeel yíiń Saayuul kudii yilpu ki bí-u yii: «Yīkì ḿ nyāntí-si nsanni.» Ní bi yíkìi táá tɔb ki nín nyēē. 27Bi nyáń kitiŋin ki dóòyee ní Samiyeel bí Saayuul yii: «Yàntī a-tɔntɔnliu ń lìntī nyɔkɔpu kí nīn cá.» Ní u-tɔntɔnliuee jítìi līntì ní Samiyeel bí Saayuul yii: «Sii yūĺ doo ḿ tùkù-si Unimbɔti nín lī puee.»

Currently Selected:

1 Samuel 9: BASSARDC

Highlight

Copy

Compare