1 Samuel 8

Isirayeel yab bālifì yii bí kàan̄-bi ubɔti

1Samiyeel púĺee ní ki dū u-jipɔmbi ki kāaǹ bí nīn kpòotī Isirayeel nibul. 2Bi nìn yíì u-jipɔŋkpiliu yii Jooweel, ní ki yíì uliliiti yii Abiiya. Bi nìn kóò Beerseeba ní ki kpòotī samaa. 3Ama bíǹ kaa nìn nóó bi-baa tabɔbiliŋ. Nnimbineel puee, bi nìn fòol̄ dinyɔɔŋeebil jim ní kaa sòoǹ tibɔti ti-pú. 4An pu ní Isirayeel yab kpilib kpáfì ki cūtìi ká Samiyeel Raama tiŋkin. 5Bi nìn bí-u yii: «Kpèè, a púĺ ní nee, ní a-jipɔmbi mun kaa nóó a-tabɔbiliŋ. Míǹ puee, kàan̄-ti ubɔti ú nīn kpòotī-ti kii atimbun kɔkɔ poon an nín bí puee#8.5 Kpèè Ditee 17.14..» 6Tibɔtee kaa nìn mɔ́ɔkiǹ Samiyeel bi nín bālifì yii bi là ubɔtee, ní u bíi mèé ti-Dindaan. 7Ní ti-Dindaan bí-u yii: «Pīlifì dinibul nín bālifì-si tiŋyee kí ŋá míǹ. Di sá yii an kaa sá sii ní baa ti là, an sá man! Baa ti là yii man ḿ nīn sá bi-bɔtiu. 8Kí yòon̄ daliŋkin m nyántìń-bi Eejipiti tiŋkin ki dāa sāā díǹ nee, bi pée fàtī bi-boon ní ki tìì-mi ní ki nóó awaa. Míǹ mbaantiim ní bi bíi ŋáań si mun nee. 9An puee pīlifì tin bi bālifì-see kí ŋá míǹ. Ama á kpāafì-bi ubɔtee nín làá dāá jī dibeel bi-pu miŋyee.»

Ubɔti nín cáá nsan kí ŋá tiŋyee

10Samiyeel cáań tibɔti tin ti-Dindaan lēe ki tùkū Isirayeel yab bin nìn bālifì-u yii bi là ubɔtee. 11U bí-bi yii: «Ubɔti un bi làá kàan̄ee nín dāa cáá nsan kí ŋá puee sɔ̀. Ni-jipɔmbi kansikin ní u làá dāá lēē bin làá nīn ŋàal̀ u-janjatɔrɔkubee nì bin làá nīn jàkà u-taamuuyee nì bin làá nīn sáń ki līī u-tɔrɔkuu nyɔkɔpuee. 12U làá dāá dū biba kí ŋá bijanjakpilib bin kpòotī bijanjaliibi kutukuee, kí dū biba kí ŋá bijanjakpilib bin kpòotī bijanjaliibi imuŋku ili nì saalaayee. U làá dāá cáá biba mun kí bòon̄ u-saaku bí nīn kù ki cēē u-kpaajinti. Biba mun dāa mɔ́ɔ̀ tijanjawan nì tɔrɔkub wanti. 13U làá dāá dū ni-bisalib kí kpántí bitalaaluŋaliibi nì bijiŋŋaliibi nì bikpɔnɔpuliliibi. 14U làá dāá fōō ni-sati nì ni-fiinyikpaaŋŋi nì ni-ɔliifikpaaŋŋi amɔnti kí tīī u-kàliŋkpilib. 15U làá dāá lēē ni-kpaajinti nì ni-fiinyib pu tisaalaatiil kí dūú tīī u-kpambaliŋ nì u-kàliŋkpilib. 16U làá dāá fōō ni-tɔntɔnliibi bininjab nì binimpoobi. U làá dāá lēē ni-nipɔmbi bin cáá mpɔnee, ki kpáaǹ ni-mammu gba bí nīn bí ki tūǹ u-tundi. 17U làá dāá lēē ni-piii nì ni-ŋoobui saalaa kamaa puee ubɔ ubɔ. Mimmee nimbi ni-ba dāa kpántì u-yumbui dee. 18Ŋyunti gbantee, ni làá dāá yāliŋkì, ama ti-Dindaan kaa làá dāá pīlifiǹ-ni.»

19Isirayeel yab yíì kaa pílifiǹ Samiyeel nyɔkɔ. Bi bí-u yii: «An kaa páb́! Ubɔti ní ti pée là. 20Ti mun là kí nīn bí kii atimbun ŋin kíǹee nín bí puee ní. Ti-bɔtiu làá nīn sòoǹ ti-bɔti, kí nīn līī ti-nyɔkɔpu ki jáà ti-jaaku.» 21Samiyeel pílifì tibɔti tin kɔkɔ Isirayeel yab sòon̄ee ní ki fātìi kàan̄ míǹ ki tùkū ti-Dindaan. 22Ní ti-Dindaan bí Samiyeel yii: «Pīlifiǹ-bi kí kàan̄-bi ubɔti.» Niinee ní Samiyeel bí Isirayeel yab yii: «Báà ŋma ń nīn kùǹ u-dumpu.»

Currently Selected:

1 Samuel 8: BASSARDC

Highlight

Copy

Compare