1 Samuel 5
5
Unimbɔti dakaau bí Fiiliistii yab cee
1Fiiliistii yab nìn fōō Unimbɔti dakaau. Bi nìn yōoǹ-u Eebeen-Eeseer ki cáa cūnnì Asidoodi tiŋkin. 2Bi yōoǹ-u ki cáa kɔ́ǹ bi-waal Daagɔn diikun ki nákáǹ-dì. 3Kutaa wúntì kutaafaau pɔ̀lpɔl Asidoodi yab kpēēyee, diwaal Daagɔn lítì dicincibil ki dɔ̄ kitiŋ Unimbɔti dakaau nimbiin, ní bi yōoǹ-dì ki gíiǹ ki yóoǹ di-paaŋŋu. 4Kù tí wúntì kutaafaau pɔ̀lpɔl bi kpēēyee, Daagɔn tí lítì dicincibil ki dɔ̄ kitiŋ Unimbɔti dakaau nimbiin. Diyil nìn cúu tūkutì ní iŋal liitil kɔ́fì ki dɔ̄ nsan pú. An nìn pée kíǹ dimuundi ní ki dɔ̄. 5An pu ní áli ki dāa sāā díǹ nee, diwaal Daagɔn tandambi nì bin kɔkɔ cá ki kóò kuwaadiin Asidoodi tiŋkinee taal kaa tà kuwaadii punyɔkɔpu kí kɔ́.
6Ti-Dindaan nìn kɔ́ǹ Asidoodi yab agìŋ́kpaan poon. U nìn kɔ́ǹ-bi dinyoondin, ki yāntì ncaapa cúú-bi, ki kpáaǹ bin nìn kóò ntimu mun māntìi tú-bee. 7Asidoodi yab nín ká tin bíi jītí bi-puee, ní bi bí yii: «Isirayeel yab Nimbɔtiu dakaau kaa máaǹ kí yūĺ ti-cee doo. Isirayeel Nimbɔtiu dàkā ti nì ti-waal Daagɔn u-pɔŋŋu.»
8Ní bi tú bi yíiń Fiiliistii yab bɔtiibi bi dɔ́miń ki kpáfì bi-cee, ní bi bālifì-bi yii: «Ti làá ŋá Isirayeel Nimbɔtiu dakaau nee mana?» Ní bíǹ kíí-bi yii: «Yòom̄maan-u kí cáá cùnnì Gaati tiŋkin.» Niinee ní bi yōoǹ Isirayeel yab Nimbɔtiu dakaau ki cáa yóoǹ Gaati tiŋkin. 9Bi nín cáá Unimbɔti dakaau ki yóoǹ kitiŋ gbantinee, Unimbɔti nìn dáaĺ kitiŋ gbanti nib tafal, ki yāntì dinyoondi kɔ́-bi. U nìn dáaĺ bikpaambi nì ŋwaamu kɔkɔ tafal, ki yāntì ncaapa cútì-bi. 10Niinee ní bi yōoǹ Unimbɔti dakaau ki cūnnì Eekrɔn tiŋkin. Ama bi nín cáá Unimbɔti dakaau ki bàn̄ niinee ní Eekrɔn yab kíĺ ki bíi gbáà ibiil yii: «Bi cáań Isirayeel yab Nimbɔtiu dakaau ti-cee doo kí kpɔ̀ ti nì ti-nibul!»
11Ní bi mun yíiń Fiiliistii yab bɔtiibi kɔkɔ ki kpáfì ki bí-bi yii: «Ní fàtīí gíiǹ Isirayeel yab Nimbɔtiu dakaau u-tiŋkin, laakin u nìn bée, ú taa kpɔ̀ ti nì ti-nibul.» Di sá ŋkúm faanti nìn cúú Eekrɔn yab kɔkɔ, kun puee Unimbɔti nìn dàkā-bi u-pɔnŋu. 12Bin ŋkúm kaa nìn kūūyee, ncaapa nìn cúú-bi, ní bi gbáń kunimbaau biilii áli an tin bàn̄ kutagbɔŋu.
Currently Selected:
1 Samuel 5: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
