1 Samuel 4
4
1ní u cáa nàatī Isirayeel nibul kɔkɔ.
Fiiliistii yab jáń ki fōō Unimbɔti dakaau
Dalbee Isirayeel yab bóob́ dikɔ̀ndi kí já nì Fiiliistii yab. Bi nìn gāā bi-janjanaapaal Eebeen-Eeseer caŋin, ní Fiiliistii yab gāā bi-yal Afeeki tiŋkin. 2Fiiliistii yab nìn tātìi gbāaǹ dikɔ̀ndi pu Isirayeel yab nimbiin, ní dikɔ̀ndi píĺ ki pɔ́ɔkì. Fiiliistii yab nìn jáń ki pɔ́ɔkiǹ Isirayeel yab ní ki kūū bi-janjaliibi kutukub binaa dikɔmbool pu. 3Isirayeel yab fātìi gítì bi-janjanaapaal puee ní bikpilib bí yii: «Ba pu ní ti-Dindaan yāntì Fiiliistii yab jáń ki pɔ́ɔkiǹ-ti díǹ míǹ? Tí cùmaan Siiloo kí yòon̄ní ti-Dindaan dakaau, ú nīn bí ti-kansikin kí fīī-ti ti-nannanliibi ŋaan kí líí.» 4Ní bi lēē binib ki tú Siiloo bí cùú yòon̄ní ti-Dindaan Mpɔŋkɔdaan un kā keerubimbi puee Poondi dakaau#4.4 Kpèè Disa 25.22.. Eelii jipɔmbi Oofinii nì Fineeyaasi di nìn céeǹ Unimbɔti dakaau. 5Ŋyunti ŋun dakaayee bàn̄ Isirayeel yab janjanaapaal puee, ní bi-kɔkɔ kúuǹ ikuŋkuunti mpɔn mpɔn ní kitiŋ cīŋkì.
6Fiiliistii yab gbìl̄ ikuŋkuunti puee ní ki téeń yii: «Ba kuŋkuuntii di tùm̀ Eebru yab janjanaapaal pu míǹ ní?» Boonee ní bi béè yii an sá ti-Dindaan dakaau di bāań Isirayeel yab janjanaapaal pu. 7Niinee ní bi fāŋkì ki lī yii: «Unimbɔti dɔ́miń Eebru yab janjanaapaal pu. Taa láá pée ká míǹ dalba dalba. Ti kpíì ní! 8An dóò ti-pu ní. Ŋma di làá fīī-ti Unimbɔti Mpɔŋkɔdaan nee ŋaan kí líí? Úǹ di kɔ́ǹ Eejipiti yab agìń nín bí a-ba a-ba puee kuteeun. 9Fiiliistii yab, kámaan kunyannyaau, nín̄ sámaan bininjab, án nín làá ŋá pu ní taa kpántí Eebru yab yumbui kii bíǹ nín sá nimbi yumbui puee. Nín̄ sámaan bininjab kí já nì bi!» 10Niinee ní Fiiliistii yab dū kujaau ki sìkī nì Isirayeel yab. Bi nìn jáń ki pɔ́ɔkiǹ-bi, ní bi sáǹ ki kɔ́ bi-tantibin. Bi nìn pɔ̄fì-bi tikpil. Bi nìn kūū Isirayeel yab binib kutukub mmuŋku nì saalaa ní. 11Fiiliistii yab nìn fōō Unimbɔti dakaau. Bi nìn kūū Eelii jipɔmbi liitil, Oofinii nì Fineeyaasi.
Usaraaŋakpil Eelii nì u-coopu kúm
12Ŋwiin gbanti mbaantee, uninja ubɔ nìn nyánní kujaaun ki sáǹ ki cūtì Siiloo. U nìn sá Beenjameen naakookun ní. U nìn dáaĺ ki cátì u-bɔkutil, ki dū ntam ki pùkū u-yil kí dàkà yii u bí kunimbaaun. 13Eelii nìn nyántì u-jal ki kā ki kpèé nsan pu, kun puee u-pɔbil kaa nìn sɔ̀m̀ Unimbɔti dakaau pu. Uninjee nìn bāań ki kɔ́ kitiŋin ní ki dū tin jítèe ki máafì. Niinee kitiŋin nib kɔkɔ kíĺ ki bíi gbáà ibiil ki kūuntí. 14Eelii gbìl̄ ibiilee puee ní ki bālifì kun yì-tì ní binib gbáà ibiil mimmee, ní uninjee dɔ́miń malaa ki tùkū-u tin jítèe. 15Eelii nìn cáá abin ali kpá dilaataal, ní kaa nìn gíti wāĺ. 16Ní uninjee bí-u yii: «Man di sá uninja un nyánní kujaaun ki bāańee. Díǹ díǹ ní m sáǹní kujaaun ki bāań.» Ní Eelii bālifì-u yii: «M-jipɔɔn, ba di jítì niin ní?» 17Ní uninjee kíí-u yii: «Isirayeel yab sáǹ Fiiliistii yab. Bi pɔ̄fì ti-nibul yab tikpil. Bi kūū a-jipɔmbi liitil, Oofinii nì Fineeyaasi, ní ki fōō Unimbɔti dakaau.» 18Eelii nín pée gbìl̄ u pútì Unimbɔti dakaau yindi puee, ní u nyáń u-jal pu ki lítì u-boon pú, circir kɔŋkooŋŋu punyɔkɔki caŋin, ní u-sil gíì ní u kpíì, kun puee u nìn púĺ ní ki nyìm̀ mun. U nìn kpōotì Isirayeel yab abin imuŋku ili ní.
19U-coopu Fineeyaasi nimpuu nìn cáá dipool ki tóob́ mmaal. U nín gbìl̄ yii bi fōō Unimbɔti dakaau ní u-cooja nì u-cal kpíìyee ní u tātìi kāl̀ ki núuĺ ki màl̄, di sá yii imatiŋween nìn cúú-u dikáal. 20U bíi sìntēe ní binimpoobi bin nìn bí u-ceeyee bí-u yii: «Taa fàŋkì, di sá yii kibininjabiki ní a màl̄.» Waa kíí tibaaa, kaa fātìi tɔ́ mun. 21Míǹ boonee ní u lī yii: «Unimbɔti nyooti yíkì Isirayeel tiŋkin.» An pu ní u pú kibikee diyindi yii Ikaboodi, an dàkà yii <Tinyoolkpa>. Bi nín nìn fōō Unimbɔti dakaau nì u-cooja nì u-cal kúm pu ní u nìn dākafì ki pú-kì diyindi gbanti. 22U nìn lī yii: «Tinyool yíkì Isirayeel tiŋkin, kun puee bi fōō Unimbɔti dakaau.»
Currently Selected:
1 Samuel 4: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
