1 Samuel 26

Daafiidi tí yíì kaa kūū Saayuul

1Siifi tiŋki yab cūtì Saayuul cee Giibeeya ki tùkū-u yii: «Aa nyí yii Daafiidi cūtìi bál̀ Akiila gbantaŋki pu kuteeu caŋinaaa?» 2Ní Saayuul yōoǹ Isirayeel janjamɔntiibi kutukub bita ki kíĺ nsan ki nín cá Siifi teekun kí nyàab̀ Daafiidi. 3Saayuul nìn gāā u-janjanaapaal Akiila gbantaŋki pu, didandi caŋin. Daafiidi úǹ nìn bí kuteeun. U nìn gbìl̄ yii Saayuul dɔ́miń niin ki nyàab̀ kí kpɔ̀-u. 4Ní Daafiidi tú binib biba cūtìi kpēē ní ki ká yii tiŋman Saayuul bāań ki bí niin. 5Ní u yíkìi nín cá niin ki tin bàn̄ Saayuul janjanaapaal pu. U nìn dáań ki ká laakin Saayuul nì u-janjakpiliu Abineer, Neer jipɔɔn dɔ̄ee. Saayuul nìn dɔ̄ dijanjanaapaal kansikin ní bijanjaliibi dɔ̄ ki māntìi tú-u.

6Niinee Daafiidi yíiń Ayiimeeleeki uitiija nì Abisayi, Joowaab nabiki bin na bi yíì yii Seeruyee ki bí-bi yii: «Ŋma di làá nóó-mi tí cù Saayuul janjanaapaal pu?» Ní Abisayi kíí yii: «M làá nóó-si tí cù.»

7Kunyeeuee, Daafiidi nì Abisayi ŋá soooo ki bàn̄ Saayuul janjaliibi cee. Saayuul nìn dɔ̄ dijanjanaapaal kansikin ki gèeǹ. U-kpaŋki nìn cɔ́ u-yil caŋin. Abineer nì bijanjaliibi nìn dɔ̄ ki māntìi tú-u ki gèeǹ. 8Abisayi bí Daafiidi yii: «Unimbɔti baasii dū a-nannanliu ki ŋá a-ŋaan díǹ ní. Yàntī ḿ pée dū kikpaŋ kí sāā-u dibaja kí nákań kitiŋ, maa làá sāā mili.» 9Ní Daafiidi bí-u yii: «Á taa kpɔ̀-u. Un di yaa dū u-ŋal ki gbēē un ti-Dindaan lēē ú nīn sá ubɔtee kaa lóotí ditafadaaldi. 10M pūtì ti-Dindaan un bí dimaŋfalin nee yii ti-Dindaan u-ba di làá dāá kpɔ̀-u. An dāa ŋūǹ kí nīn sá yii u-wiiŋŋu di bàn̄ ní u kpíì, àá u cūtì kujaau ní bi kūuń-u. 11Ti-Dindaan ń cúú-mi ḿ taa dū m-ŋal kí gbēē ubɔti un u lēēyee maŋfal. Tí pée yòon̄ u-kpaŋki kin cɔ́ u-yil caŋinee nì u-túuŋŋu ŋun poon nnyim kēe kí nīn cá.»

12Ní Daafiidi yōoǹ kikpaŋ nì ntúun ŋun poon nnyim kā ŋu yú u-yil caŋinee ki búntì. Báà ubɔ kaa fīntì, kaa ká tin jítèe, kaa béè tin ŋée mun. Bi-kɔkɔ nìn dɔ̄ ki gèeǹ, kun puee ti-Dindaan nìn yāntì ŋgeembiim miba cúú-bi. 13Ní Daafiidi nín cá lapu pu jandi ki cūtìi tɔ́kɔǹ dijool diba pu. U nìn dátiǹ Saayuul janjanaapaal. 14Daafiidi nìn téeń bijanjaliibi watil pú ki yíiń Neer jipɔɔn Abineer yii: «Abineer, á pīlifì!» Ní Abineer bí-u yii: «Ŋma di bí niin ki kūuntí ki kpáàa ubɔti tafal ní?» 15Ní Daafiidi bí-u yii: «A sá uninja ní, kaa sá mimmaaa? A-juti kaa bí Isirayeel tiŋkin. Kin ba pu ní aa cíitì ubɔti un sá a-kpiliuee tiŋan? Ubɔ dɔ́miń kí kpɔ̀ ubɔti un sá a-kpiliuee. 16Min a ŋá nee kaa ŋān̄. Aa cíitì a-kpiliu ubɔti un ti-Dindaan lēēyee tiŋan. Nì ti-Dindaan un bí dimaŋfalin nee, a máaǹ ŋkúm. Ubɔti kpaŋki nì u-túuŋŋu ŋun poon nnyim kā ki yú u-yil caŋinee bí la?»

17Niinee Saayuul béè Daafiidi neen, ní ki bālifì-u yii: «Sii m-jipɔɔn Daafiidi neen pu ní m gbìl̄ naaa?» Ní Daafiidi kíí-u yii: «Ti-baa ubɔti, an sá man Daafiidi.» 18Ní Daafiidi kútì ki lī yii: «Ba pu ní m-dindaan jì man a-tɔntɔnliu míǹ? Ba ní m ŋá-si ní? Tikpitil tilati ní m baasii ŋá ní? 19Kɔŋkɔnnee, ti-baa ubɔti, pīlifì tin man a-tɔntɔnliu làá sòoǹee. An yaa sá ti-Dindaan di yaa lùkutī-si ní a kā m-pu mimmee, ú yàntī m-saraau ń sɔ̀ŋkì u-pɔbil. Ama an yaa nyánní binib ceeyee, ti-Dindaan ń yàntī mbusu ń jēetí bi-pu. Di sá yii bi jìn̄-mi díǹ pu nee m-naanjab tiŋki kin ti-Dindaan tīī-tee pu kaa là ḿ kàl̄. An bí kii bi bíi tùkù-mi yii: <Cùú nīn jáaḿ awaayee> ní. 20Ama man kaa làá kpú kinicantiŋin kí nīn dátiǹ m-Dindaan. Di sá yii sii Isirayeel bɔtiu bíi jì man un kaa bí tiban kii dikambabilee. A bíi jì-mi kii bi nín jì ujikpal ajoon pu puee ní.»

21Niinee ní Saayuul téeń yii: «M yīntì! M-jipɔɔn Daafiidi, fàtīí gítiń. Maa ti làá ŋá-si tikpitil tiba, kun puee a dàkā díǹ yii m-maŋfal cáá kunyampoou a-cee. M ŋá ŋwaatiyaamin ní, m kíil̀ m-ba tikpil.» 22Ní Daafiidi bí yii: «Ti-baa ubɔti, kpèè a-kpaŋki sèé, a-janjaliibi kansikin ubɔ ń dāan̄ kí fōō. 23Ti-Dindaan di làá pà báà ŋma deedee tuuŋŋi nì u-baamɔŋyi paati. Díǹ nee, ti-Dindaan bàà dū-si ki ŋá m-ŋaan, ama m yíì yii maa làá dū m-ŋal kí gbēē-si, kun puee a sá ubɔti un ti-Dindaan lēēyee ní. 24A-maŋfal yaa cáá kunyampoou m-ceeyee, ma mun maŋfal ń nīn cáá kunyampoou ti-Dindaan cee, ú nyāntí-mi agìń kɔkɔ poon.» 25Niinee ní Saayuul bí Daafiidi yii: «Unimbɔti ń bìin̄ a-boon m-jipɔɔn Daafiidi. Tiŋman, án làá bútí-si ní á tɔ̄ atuŋkpaan.» Míǹ boonee ní Daafiidi búntì u-laŋki, ní Saayuul mun fātìi nín gítí u-dumpu.

Currently Selected:

1 Samuel 26: BASSARDC

Highlight

Copy

Compare