1 Samuel 25

Daafiidi nì Abiigayiil bɔti

1Ŋyunti gbantee ní Samiyeel kpíì. Isirayeel yab kɔkɔ nìn kpáfì ki súń u-kpool. Bi nìn síb́-u u-dumpu Raama tiŋkin. Míǹ boonee ní Daafiidi yíkì ki nín cá Paaran teekun. 2Uninja ubɔ nìn bí Maawɔn ní u-sati bíń Kaarmeel. U nìn cáá tigaajati tikpil. U nìn cáá ipii kutukub bita nì iŋoobu kutuku. U nìn cūtì Kaarmeel kí cā u-piii kuti#25.2 kí cā u-piii kuti. Bi yaa nìn cēē ipii kutee, an nìn sá jiŋaakpaan ní, kpèè B. 8, ní kí dūú ŋmàntī nì 2 Sami 13.23-27.. 3Bi nìn yíì-u yii Nabaal ní ki yíì u-nimpuu yii Abiigayiil. Abiigayiil nìn cáá iciin tikpil ki ŋān̄ unimpu, ama ní u-cal nìn cáá ntoom ní u-bɔti pɔ̄ɔ̄. U nìn sá Kaleeb maaliŋun ní.

4Daafiidi bí kuteeunee ní ki gbìl̄ yii Nabaal bíi cēē u-piii kuti. 5Daafiidi nìn lēē u-naacimbi binib saalaa ki tú. U bí-bi yii: «Cùmaan Kaarmeel Nabaal cee, kí tùkù-u yii man di túnní-ni ní dāá jāam̀-u. 6Ní tùkù-u yii: <Ti nì dibàl! Án bútí si nì a-dicaŋku nì tin kɔkɔ a cááyee! 7Daafiidi gbìl̄ yii a bíi cēē a-piii kuti. Ŋyunti ŋun a-pikpaaliibi nìn bí ti-cee Kaarmeelee, taa nìn pée ŋá-bi digìńdi diba, ní bi-wanti báà kubɔbɔ kaa wáŋkì. 8Bàlifì a-tɔntɔnliibi bi làá tùkù-si. Daafiidi gbàam̄-si yii á dàkà-ti kulaŋŋaŋfitiiu díǹ jiŋaal wiiŋŋu nee. Ti pée gbàam̄-si ní, tīī timbi nì a-tɔntɔnliu Daafiidi kun a yaa pée ŋūǹee.>»

9Binib bin Daafiidi túee bàn̄ ki dū u nín tùkū-bi puee ki lī Nabaal cee, ki kíǹ ki yú ki cí. 10Ní Nabaal bí yii: «Ŋma di sá Daafiidi ní? Ŋma di sá Jeesee jipɔɔn gbanti ní? Ti-yuntii nee bitɔntɔnliibi tikpil yíkí bi-kpilib cee ki sáń. 11Ní man ḿ yòon̄ m-jinti nì m-nyim nì m-nanti tin m ŋāaǹ kí fōō bin m mēē dikpaameelee kí dūú tīī nimbi bin maa nyí laakin pú ni nyánnéeee?» 12Daafiidi naacimpɔmbee fātìi nín gítí, ki tin dū Nabaal nín sòon̄ puee kɔkɔ ki máafì-u. 13Ní Daafiidi bí u-naacimbi yii: «Báà ŋma ń yòon̄ u-tàataajiki kí gbìn̄!» Ní báà ŋma yōoǹ u-tàataajiki ki gbìn̄. Ní úǹ u-ba mun dū u-yaka ki gbìn̄, ní u nì binib kii alaataa anaa nín cá, ní binib alaataa ali gbíntì ki kā ki kpèé bi-wanti.

Abiigayiil sɔ̄ŋkì Daafiidi pɔbil

14Ní Nabaal tɔntɔnliu ubɔ cūtìi tùkū Abiigayiil tin jítèe yii: «Kpèè Daafiidi túnní binib doooo kuteeun bí dāá jāam̀ ti-kpiliu ní waa fōō-bi. 15Ama binib gbanti nìn ŋúb́-ti tiŋan. Baa nìn ŋá-ti tikpitil tiba, ní iyunti in kɔkɔ ti dūu kāl̀ bi-cee tisatinee, ti-waŋkuti báà kubɔ kaa wáŋkì. 16Iyunti in kɔkɔ ti kpāā ti-piii nì ti-ŋoobui laakin bi nìn bée, bi nìn sá-ti kii digundee ní kunyeeu nì ŋwiimpu ki cí-ti. 17Kɔŋkɔnnee, dàkafì kí kpèè min ní a máaǹ kí ŋée, di sá bi bɔ́ntì kí cáań mbusu kí tɔ̄ ti-kpiliu nì u-dicaŋku pu. An yaa kíǹ úǹ ti-kpiliuee, u-bimbim kaa ŋān̄, an puee ubɔ kaa ŋūǹ kí sòoǹ nì u.» 18Ní Abiigayiil ŋá malaa ki yōoǹ kpɔnɔb alaataa ali nì ndaam itúun ili nì ipii in bi kūū ki tɔ́kɔǹee iŋmoo, nì bilee biliŋ ŋin bi kìn̄ee ncamsibiyaamu muŋmoo, nì fiinyi biliŋ ŋin kūńee asaka dilaataal, nì fiigi biliŋ kalaau alaataa ali. U nìn dū kɔkɔ ki túǹ mmamu, 19ní ki bí u-tɔntɔnliibi yii: «Lìntīmaan, ḿ páań ni-boon.»

Ama waa pée tùkū u-cal Nabaal tiba. 20U jɔ́m̀ ki kāl̀ kimaŋ pu ki bíi pɔ́tí kigbantaŋee, Daafiidi mun nì u-yab sìntīń ki túliń-u, ní bi dāa dūu tú tɔb. 21Daafiidi nìn bí ki lì u-ban yii: «Mimmee, m pée wúń kijapaai nee wanti kuteeu nee pu tiba kaa wáŋkì fám deeyaa! M ŋá-u tiŋan ní u dū tikpitil ki pàn̄-mi! 22Unimbɔti ń tīī m-nannanliibi mpɔn kí bìin̄ bi-pu gba, m yaa fu yāntì uninja bambaanti u-dicaŋkun kaa kūū-u fool kutaafaau.»

23Abiigayiil nín ká Daafiidi páaǹee, ní u kpákatì kimaŋ pu malaa ki tātìi gbāaǹ Daafiidi nimbiin u-yil tūū kitiŋ. 24U nìn cúú u-taal ní ki bí-u yii: «M-kpiliu, man di yì dibɔkpil. Ama, pée yàntī man a-yumbuu ń sòoǹ nì si á pīlifì. 25M-kpiliu, taa fàtīí tɔ̄ Nabaal un kaa bí tiban nee. Di sá yii u fōō u-yindi didandi ní. Nabaal taapu di sá yii: <Kinaatuui>, ní inaatuu lafun bí u-ni. Ama man a-yumbuu kaa nìn ká binaacimpɔmbi bin a nìn túnnée. 26Ama m pūtì ti-Dindaan un bí dimaŋfalin nee nì sii a-ba yii ti-Dindaan di pīiǹ-si nsan á taa kpɔ̀ unil, kí tɔ̀ ipɔntoon a-ba. Bin kɔkɔ sá sii m-kpiliu nannanliibee, nì bin nyàab̀-si tikpitilee ń dāá kpántí kii Nabaalee! 27M-kpiliu, man a-yumbuu cáań-si tiwampɔkaal á fōō kí dūú yàkatī binaacimpɔmbi bin nóoń-see. 28M gbāam̀-si, dū man a-yumbuu yìntitam kí pɔ̄-u. Di sá yii m cáá dimákal yii ti-Dindaan làá dū dibeel kí tīī a-dicaŋkun yab kí nīn cáa cá jaanjaan, kun puee m-dindaan jáń ti-Dindaan jaaku. A-maŋfal wiiŋyi kɔkɔ poonee, bí taa pée ká tikpitil tiba a-ni. 29Unil ubɔ yíkì ki bíi jì m-kpiliu ki là kí lēē u-maŋfal. Ama ti-Dindaan a-Nimbɔtiu làá wúń a-maŋfal pu kí dū-dì kí kpāafì u-cee. U làá dū a-nannanliibi maŋfal kí tɔ̄ kí fá ndandati kii bi nín dù ditaŋkpal kí ŋá kujaataafuŋ poon kí tɔ̄ puee ní. 30Ŋyunti ŋun ti-Dindaan yaa láa ŋá tiŋan tin u pōoǹ yii u làá ŋá kí tīī-see, u làá dāá dū-si kí kàan̄ dibeel Isirayeel tiŋki pu. 31Taa kpɔ̀ unil fám kí tɔ̀ a-ba ipɔntoon. Mimmee a-pɔbil kaa dāa máfí. M-kpiliu, ti-Dindaan yaa láa bīiǹ a-boonee, á dāá téetí man a-yumbuu pu.» 32Ní Daafiidi kíí Abiigayiil yii: «M jáaḿ ti-Dindaan, Isirayeel yab Nimbɔtiu un túnní-si díǹ á dāá tūŋkìń-mi nsannee. 33M jáam̀ si mun, a-landɔkɔmɔntiŋu di nyántì-mi nnikpaakoon nì man m-ba nín bàà làá tɔ̀ ipɔntoon iŋyee poon. 34Ibaamɔn an sá ti-Dindaan Isirayeel Nimbɔtiu di pīiǹ-mi nsan ḿ taa ŋá-si tikpitil. Ama m pūtì ti-Dindaan un bí dimaŋfalin nee yii a yaa kaa bàà túŋkìń-mi malaa, báà uninja kaa bàà fu kīntí fool kutaafaau Nabaal dicaŋkun.»

35Ní Daafiidi fōō tiwampɔkaal tin u cáań-uee ní ki bí-u yii: «Nín̄ kùǹ nì ŋgbansɔŋfi. Kpèè, m gbìl̄ tin a lēe, ki fōō-tì nì kulaŋŋaŋfitiiu.»

Nabaal kpíì, Daafiidi cáá Abiigayiil

36Abiigayiil fātìń mmɔŋkee, Nabaal bí ki jīǹ jiŋaal mmɔntiimin kii ubɔtee, ki bí dipɔɔpindi poon ki gbí púb. An puee waa pée tùkū-u tiba áli kutaa dāa wúntì. 37Kutaa wúntì ndaam cēetì-uee, ní u máafì-u tin jítèe. Niinee ní u-pɔbil bíil̀ ní u dūu fàl̄. 38Iwiin saalaa boonee ní ti-Dindaan fáá-u ní u kpíì.

39Daafiidi nín gbìl̄ yii Nabaal kpíìyee, ní u fáá mbiil yii: «M jáam̀ ti-Dindaan! Nabaal nín nìn kpēē-mi fámee, ti-Dindaan mɔ́tì m-pu, ki pīiǹ-mi nsan maa ŋá ikpiti. U yāntì Nabaal toom fātìi gítì u-pu.» Boonee ní Daafiidi tú binib Abiigayiil cee u yaa kíikí kí kpántí u-nimpuu. 40Bin Daafiidi túee nín cá Abiigayiil cee Kaarmeel, ki bàn̄ ki bí-u yii: «Daafiidi di túnní-ti a-cee yii u là á kpántí u-nimpuu.» 41Ní u yíkì malaa ki tātìi gbāaǹ u-yil tūū kitiŋ, ní ki bí yii: «M bɔ́ntì kí nīn sá u-yumbuu, kí nīn fíntí m-dindaan tɔntɔnliibi taaŋi.» 42Ní u yíkì kpalaa ki kāl̀ kimaŋ pu ki nóó Daafiidi tɔntɔnliibee. Bitɔntɔnliibi biŋmoo nìn táá-u. An nín dī pu u kpántì Daafiidi nimpuuee dee.

43Daafiidi nìn cáá unimpu ubɔ mun bi yíì-u yii Akiinoowam, u sá Jisirayeel tiŋkin, ki dūu kútì Abiigayiil pu bi ŋá binimpoobi bili. 44Saayuul nìn dū u-bisal Miikaal, Daafiidi nimpuu, ki pú Layiisi jipɔɔn Paltii un sá Galiim tiŋkinee ticati.

Currently Selected:

1 Samuel 25: BASSARDC

Highlight

Copy

Compare