1 Samuel 19

Joonatan bíi mɔ́tí Daafiidi pu

1Saayuul nìn tùkū u-jipɔɔn Joonatan nì u-kàliŋkpilib kɔkɔ yii u là bí kpɔ̀ Daafiidi. Ama Saayuul jipɔɔn Joonatan nì Daafiidi nìn kɔ́ tɔbin tiŋan. 2Ní Joonatan tùkū Daafiidi yii: «M-baa Saayuul nyàab̀ kí kpɔ̀-si. An puee fool kutaafaauee, á fu nín̄ nyíǹ a-ba. Á fu báĺ kí taa nyā. 3M làá fu céeǹ m-baa tí cù kusaau laakin a làá cùú báĺee. M làá fu sòoǹ nì m-baa a-pu. U yaa fu sòon̄ puee, m làá tùkù-si.»

4Joonatan sòon̄ Daafiidi ŋanti pu u-baa Saayuul cee. U bí-u yii: «Ti-baa ubɔti, á taa ŋá a-tɔntɔnliu Daafiidi ikpiti, kun puee waa pée ŋá-si ikpiti iba. Ama atummɔnti ŋin u túnnée cáań-si ipaati ní. 5U nìn dū u-maŋfal ki sú ní ki kūū ufiiliistiija. Ŋwiin gbantee, ti-Dindaan nìn tīī Isirayeel yab kɔkɔ dijajikpaandi. Sii a-ba nìn ká ki fāal̀. Kin ba pu ní a làá ŋá ikpiti kí kpɔ̀ Daafiidi un kaa ŋá tibee fám.» 6Niinee Saayuul gbìl̄ ki tīiǹ Joonatan ní ki pūtì yii: «M pūtì ti-Dindaan yii baa làá kpɔ̀ Daafiidi.» 7Niinee Joonatan yíiń Daafiidi ní ki tùkū-u tin jítèe kɔkɔ. U nìn cáań Daafiidi Saayuul cee, ní Daafiidi fātìi kíĺ ki bíi tūǹ u-tundi kii u nín nìn pée bí ki tūǹ pu dooooyee.

Miikaal fīī Daafiidi

8Fiiliistii yab nì Isirayeel yab jaaku fātìi tí kíĺ. Daafiidi cūtì ki jáń ki pɔ́ɔkiǹ-bi sɔ́kɔ sɔkɔ, ní bi sáǹ-u.

9Dalbee, ti-Dindaan tí túnní ŋfaŋkpitim miba mi dɔ́miń ki kɔ́ Saayuul. U nìn kā u-dumpu ki ŋúb́ kikpaŋ. Daafiidi nìn kā u-cee ki bɔ̀ɔ́ kubeeu. 10Saayuul tɔ́ u-kpaŋki kí bàà yā Daafiidi kí nákań digundi. Ama Daafiidi nìn lóotì ní kikpaŋ cūtìi yá digundi ki báaǹ. Kunyeeuee ní Daafiidi sáǹ ki ŋmátì. 11Saayuul dū binib ki tú Daafiidi dumpu bí cɔ̄ŋkì-u kutaa yaa wúntì kutaafaauee bí kpɔ̀-u. U-nimpuu gbìl̄ ní ki tùkū-u yii: «A yaa kaa sáǹ kunyeeu nee, fool bi làá fu kpɔ̀-si#19.11 Kpèè Ilan 59.1.!» 12Ní u-nimpuu yōoǹ-u ki dī tɔkɔla pu ki nāatì boon ní u sáǹ ki ŋmátì. 13Miikaal yōoǹ diwaal ki bíl̀ Daafiidi dooŋu pu, ní ki dū ŋŋɔgban ki bíl̀ diyil pú, ní ki dū dibɔkutikpaandi ki bīiǹ di-pu múlmul. 14Bininjab bin Saayuul túnní bí dāá cúú Daafiidee bāańee ní u-nimpuu bí-bi yii: «U būǹ.» 15Ní Saayuul fātìi gíiǹ-bi ki tú bí cùú ká Daafiidi. U bí-bi yii: «Yòon̄nímaan-u kí kpáaǹ u-dooŋu ḿ kpɔ̀-u!»

16Binibee fātìi bàn̄ Daafiidi dumpu ki kpēēyee diwaal di pá ndoo pu, ŋŋɔgban dɔ̄ diyil púee. 17Ní Saayuul bí Miikaal yii: «Ba pu ní a kíil̀-mi ki yāntì m-nannanliu sáǹ ki ŋmátì.» Ní Miikaal kíí-u yii: «Úǹ di bí-mi yii: <A yaa kaa yāntì m sáǹ ki ŋmátì, m làá kpɔ̀-si.>»

Saayuul nì Daafiidi bí Raama

18Daafiidi sáǹ mimmee ní ki búntì Samiyeel cee Raama, ki máafì-u Saayuul nín ŋá-u tiŋyee kɔkɔ. Ní u nì Samiyeel cūtìi kóò Nayooti. 19Bi cūtìi tùkū Saayuul yii: «Kpèè Daafiidi cūtìi bí Nayooti tiŋkin, Raama caŋin.» 20Ní Saayuul tú binib bí cùú cúuń-u. Bi bàn̄ee ki ká Unimbɔti bɔnaatiliibi dikitil, bi-kpiliu Samiyeel līī bi-nyɔkɔpu bi fītì ki bí ki nàatī Unimbɔti bɔti. Ní Unimbɔti Fam kɔ́ binib bin Saayuul túnnée ni ní bi mun fītì. 21Bi dɔ́miń ki tùkū Saayuul ní u dū biba mun ki tú, bi mun bàn̄ee ki fītì. Ní u dū bitataatiibi ki tú, bi mun tí bàn̄ee ní ki fītì. 22Niinee ní Saayuul yíkìi nín cá u-ba Raama. U bàn̄ Seeku nyimbɔbikpaandee ní ki bālifì yii: «Samiyeel nì Daafiidi bí la pú ní?» Ní bi bí-u yii: «Bi bí Nayooti, Raama caŋin.» 23U cá ki bàn̄ nsannee ní Unimbɔti Fam kɔ́ u mun ní u fītì ní u nìkī u-saŋŋu ki tin bàn̄ Nayooti, Raama caŋin. 24Niin ní u mun pēetì u-bɔkutiŋ ní ki fītì Samiyeel nimbiin. U nìn lítì ki dɔ̄ dicancaŋgbeel ŋwiin gbanti nì kunyeeu kɔkɔ. An pu ní bi lì yii: «Saayuul mun kpántì Unimbɔti bɔnaatiliu níii?#19.24 Kpèè 10.11.»

Currently Selected:

1 Samuel 19: BASSARDC

Highlight

Copy

Compare