1 Samuel 18
18
Joonatan nì Daafiidi bɔɔtiiku
1Daafiidi nín sòon̄ nì Saayuul míǹ ki dóòyee ní u-bɔti kɔ́ Joonatan, ní u dū u-ba ki nákáǹ-u ní ki néeń-u kii u nín néeń u-ba puee. 2Saayuul kaa nìn yāntì Daafiidi fātì u-baa dumpu yaadal, ní u fōō-u u bí u-cee. 3Joonatan nìn yāntì u nì Daafiidi pōoǹ ki pūtì kí nīn sá bibɔɔtiibi, kun puee u nìn néeń-u kii úǹ u-bee ní. 4Joonatan nìn pēetì u-bɔkutikpaandi ki dūu tīī Daafiidi. U nìn tīī-u u-bɔkutiŋ mun, áli ki dū u-tàataajiki nì u-tɔbu nì u-gbajau ki tīī-u.
5Ŋyunti kamaa Saayuul yaa nìn tú Daafiidi kujaauee, u nìn jáà ki jīǹ ní. An pu ní Saayuul nìn dū-u ki ŋá u-janjakpiliu. Samaa kɔkɔ nìn néeń u-bɔti, ki kpáaǹ Saayuul kàliŋkpilib.
Saayuul bíi nyàab̀ kí kpɔ̀ Daafiidi
6Daafiidi nín kūū ufiiliistiija Gooliyaati ki fātìi kùnnée, binimpoobi nìn nyánní Isirayeel yab timmu kɔkɔn ki túŋkì ubɔti Saayuul ki gà ilan ki ŋōō ki kūuntí nì dipɔɔpindi ki bɔ̀ɔ́ ŋgaŋgamu nì cancakantib. 7Bi nìn gà ilan ki kíikí tɔb yii:
«Saayuul kūū binib kutuku,
ní Daafiidi kūū binib cutimaanyi#18.7 Kpèè 21.11, 29.5..»
8Saayuul nín gbìl̄ mimmee ní u fōō diŋuul ŋkpitim pu, di sá nlanee kaa nìn mɔ́ɔkiǹ-u. U nìn bí yii: «Bi bí yii Daafiidi kūū binib cutimaanyi ní man kūū binib kutuku jaa! Mimmee tin pée kíǹ ú fōōyee di sá dibeelaa!» 9Kí yòon̄ yaadalee, Saayuul nìn kíǹ ki nyí nì u-ba nì Daafiidi ní.
10Kutaa wúntèe Unimbɔti túnní ŋfaŋkpitim miba, mi dɔ́miń ki kɔ́ u-ni ní u fītì u-diikun. Daafiidi nìn bíi bɔ̀ɔ́ kubeeu kii u nín pée kpààa bɔ̀ɔ́ puee. Saayuul nìn ŋúb́ u-kpaŋki u-ŋaan. 11Dicilpuee Saayuul dū kikpaŋ ki tɔ́ Daafiidi ki lī yii: «M làá pée yā Daafiidi kí nákań digundi ní.» U ŋá míǹ mba mbee mili, ní Daafiidi lóotì. 12Saayuul nìn fāŋkì Daafiidi, kun puee u nìn béè yii ti-Dindaan bí Daafiidi cee ní ki dū úǹ ki fá. 13An pu ní Saayuul kākatì-u u-cee ní ki lēē-u ú nīn sá bijanjaliibi kutuku kpiliu. Kí yòon̄ ŋyunti gbantee, bi yaa ti cá kujaauee, Daafiidi di nìn līī u-janjakitil nyɔkɔpu. 14Tin kɔkɔ Daafiidi yaa nìn ŋáańee, an nìn bútí-u ní, kun puee ti-Dindaan nìn bí u-cee. 15Saayuul nín ká an bútì-u miŋyee ní u fāŋkì-u. 16Ama nì míǹ kɔkɔee Isirayeel yab nì Juuda yab nìn néeń Daafiidi, kun puee úǹ di nìn lìntī bi-nyɔkɔpu ní bi jáà ki jīǹ.
Daafiidi kpántì ubɔti coo
17Saayuul bí Daafiidi yii: «M-biseekpiliu Meerab sɔ̀. M làá dū-u kí tīī-si á cáá. Ama a máaǹ kí dàkà difaŋgiil m-tundi poon ní kí já ti-Dindaan jaaku.» Di sá u nìn lī u-neen yii: «Maa làá kpɔ̀ Daafiidi m-ba, m làá yàntī Fiiliistii yab ní ń kpɔ̀-u.» 18Ní Daafiidi kíí Saayuul yii: «Man di sá ŋma, ní tilati poon ní m-baa dicaŋku nì u-maaliŋu bí Isirayeel yab kansikin, ní man un bí nee ń nīn sá ubɔti coo?» 19Ama an ŋmāntì ubɔti Saayuul ń dū u-bisal Meerab kí tīī Daafiidi ticatee ní u dū-u ki tīī Adriyeel umeeyoolaaja.
20Ama Saayuul bisal Miikaal nìn là Daafiidi. Saayuul nín gbìl̄ mimmee ní an mɔ́ɔkiǹ-u. 21Ní Saayuul lī u-neen yii: «M làá dū-u kí tīī Daafiidi ń cáá án nín làá ŋá pu ú nīn sá-u kutaliŋŋu Fiiliistii yab ń ŋmā kí kpɔ̀-uee.» Niinee ní Saayuul bí Daafiidi nliliitiim yii: «Díǹ nee, a làá kpántí m-coo.» 22Saayuul tīī u-kàliŋkpilib mara nee bí sòoǹ nì Daafiidi dibalin yii: «Ubɔti néeń a-bɔti ní timbi u-kàliŋkpilib mun néeń-si. An puee kíí kí kpántí ubɔti coo.» 23Ní Saayuul kàliŋkpilibee cáá an bɔtee ki lī Daafiidi cee, ní úǹ bí-bi yii: «Ni dàkafī yii á nīn sá ubɔti cooyee, an sá gbaŋgbam níii? Man sá usoodaan ní kaa bí tiban.»
24Ubɔti kàliŋkpilib gíiǹní Daafiidi nín kíí puee ki tùkū ubɔti. 25Ní Saayuul bí yii: «Ni nín làá sòoǹ nì Daafiidi puee sèé: <Ubɔti kaa là á ŋá kucootiiu. Kun u bàlifī-see di sá á cáań-u Fiiliistii yab kuncooti dilaataal ú tɔ̀ u-nannanliibi ipɔntoon.» Saayuul nìn dàkafī yii u yaa ŋá mimmee, Daafiidi làá kɔ́ Fiiliistii yab ŋaan bí kpɔ̀-u. 26Saayuul kàliŋkpilib cáań tibɔti tin u lēe ki tùkū Daafiidi. Daafiidi ká yii án nín sá ú ŋá pu kí kpántí ubɔti cooyee ŋān̄. Kí wàatī ŋyunti ŋun ubɔti yóoǹee ń bàńee, 27ní Daafiidi nì u-naacimbi búntì kujaau ki kūū Fiiliistii yab bininjab alaataa ali. Daafiidi nìn lēeń bi-kuncooti ki cáań bi kàan̄ ubɔti nimbiin ú kpántí ubɔti coo. Míǹ ní ubɔti Saayuul dū u-bisal Miikaal ki tīī Daafiidi cáá.
28Saayuul ká ki béè yii ti-Dindaan bí Daafiidi cee ní u-bisal Miikaal néeń-u. 29Niinee Saayuul mɔ̄tìi fāŋkì Daafiidi, ní ki kíǹ ki ná-u an kaa cáá digbèendi.
30Fiiliistii yab bɔtiibi nìn dòoń ki jáà nì Isirayeel yab. Kujaau kamaa poonee, Daafiidi nìn jáà ki pɔ́ɔkiǹ binannanliibi ki jítiǹ Saayuul janjaliibi bin kíǹee. An nìn yāntì u nyáń diyindi tikpil.
Currently Selected:
1 Samuel 18: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
