1 Chroniques 13

Daafiidi cáań Unimbɔti Dakaau Jeerusaleem

(Kpèè 2 Sami 6.1-11)

1Daafiidi nìn kpáfì bijanjakpilib bin kpòotī bijanjaliibi dilaataalee nì bin kpòotī kutukuee nì bitindaŋkpilib kɔkɔ ní bi kāl̀ ki sòon̄ ki kpōotì tɔb. 2Boonee ní Daafiidi bí Isirayeel yab kɔkɔ yii: «An yaa kítì ni-cee ní ki yaa lafun sá ti-Dindaan ti-Nimbɔtiu lammee, tí lēē binib kí tɔ̄ ti-nabiyaamu mun kɔkɔ dáá gbíntìi kāń Isirayeel timmu kɔkɔnee. Cilinjee tí cù kí ká bisaraaŋaliibi nì Leefii yab bin kóò bi-timmunee bí dāan̄ kí kūtì ti-pu. 3Bi yaa dɔ́mińee ní tí cù kí yòon̄ní ti-Nimbɔtiu Dakaau kí gíiǹní, kun puee ŋyunti ŋun Saayuul nìn kā dibeelee, ti-tafal kaa nìn fātìi tɔ́ Dakaa gbanti.» 4Binib bin kpáfì niinee kɔkɔ kíí yii bí ŋá Daafiidi nín lī puee, kun puee báà ŋma nìn ká yii an nìn sá nlandɔkɔmɔnti. 5Niinee ní Daafiidi kpáfì Isirayeel yab kɔkɔ, kí kíĺ bin kóòń Eejipiti tinnyɔkɔki ŋgiil púee kí cáá sāā bin kóòń Leeboo-Amaati tiŋki ŋgan púee, bí cù kí yòon̄ní Unimbɔti Dakaau Kiiriyati-Yeeyariim tiŋkin. 6Ní Daafiidi nì Isirayeel yab kɔkɔ nín jɔ́ḿ Baala, an dàkà yii Kiiriyati-Yeeyariim tiŋki kin bí Juuda naakookunee, kí cùú yòon̄ní Unimbɔti Dakaau. Ti-Dindaan un kā keerubimbi#13.6 Disa 25.22. kansikinee yindi ní bi dūu pú Dakaa gbanti. 7U nìn yú Abinadaab dumpu ní. Bi nìn dū-u ki tākaǹ tɔrɔkupɔɔn poon ní. Usa nì Ayiiyoo di nìn kpòotī inaa in dàtī tɔrɔkupɔɔn gbantee. 8Daafiidi nì Isirayeel yab kɔkɔ nìn bí ki fàal̀ nì dipɔɔpindi Unimbɔti nimbiin ki gà ilan ní ki bɔ̀ɔ́ tibati nì saŋgub nì ŋgaŋgamu, ki cákafí cancakantib, ki búǹ akantán. 9Bi bàn̄ Kiidɔn tuulool caŋinee ní inaa gbéetì ní Usa tāntì u-ŋal kí cúú Unimbɔti dakaau. 10Niin ní ti-Dindaan gíí Usa pu diŋuul. U nìn fáá ki kūū-u, kun puee u nìn gbēē dakaa. Usa nìn kpíì Unimbɔti dakaau caŋin niin. 11Niinee Daafiidi fōō diŋuul, kun puee ti-Dindaan nìn fáá ki kūū Usa. Bi nìn pú mpaan gbanti diyindi yii Peereesi-Usa. Bi dáá gbíntìi yíì mpaan gbanti míǹ ki dāa sāā díǹ. 12Daafiidi nìn fāŋkì ti-Dindaan yaadal wiiŋŋu, ní ki bí yii: «Maa làá ŋmā kí cùnnì ti-Dindaan dakaau m-dumpu!» 13Daafiidi kaa nìn gíti là kí yòon̄ ti-Dindaan dakaau kí cùnnì Daafiidi Tiŋkin. U nìn yāntì bi cáa yóoǹ Oobeedi-Eedoom dumpu. Kijapaai gbanti nìn sá Gaati tiŋkin ní. 14Dakaayee nìn yúl̀ Oobeedi-Eedoom dumpu iŋmal ita, ní ti-Dindaan bīiǹ u nì tin kɔkɔ u cááyee pu.

Currently Selected:

1 Chroniques 13: BASSARDC

Highlight

Copy

Compare