1 Chroniques 12

Daafiidi bɔɔbi bipeepeekaabi bɔti

1Ŋyunti ŋun Daafiidi nìn sáǹ Kiisi jipɔɔn Saayuul ki cūtìi bál̀ Siikilaagi#12.1 Siikilaagi : kpèè 1 Sami 27.6. tiŋkinee, binib biba nìn cūtì u-cee niin. Binib gbanti nìn sá bibaatandambi ní, ki nìn bɔ́ntì kí já kujaau. 2Bi nìn ŋúb̀ itɔfi nì tijaataafun, ki nìn ŋūǹ kí tɔ̄ ataŋkpee nì ipiin ŋŋaŋgiil nì ŋŋaŋgan kɔkɔ.

Beenjameen naakookun, an dàkà yii Saayuul u-ba naakookunee, bin nìn bée di sá: 3Seemaa un sá Giibeeya tiŋkinee jipɔɔn Ayeeseer, bi-kpiliu, nì u-naal Joowaasi nì Asimafeeti jipɔmbi Jeesiyeel nì Peeleeti, nì Beeraka nì Jeewuu bin sá Anatooti tiŋkinee, 4nì Isimeeya un sá Gabawɔn tiŋkin ki nìn sá bijanjaliibi bin nìn bí dikitil mmuŋku nì saalaa#12.4 bijanjaliibi bin nìn bí dikitil mmuŋku nì Saalaa: kpèè 2 Sami 23.8. poonee kpilib ubɔee, 5nì Yiirmeeya, nì Jaasiyeel, nì Yoowanan nì Joosabaadi un sá Geedeera tiŋkinee, 6nì Eelusayi, nì Yeereemooti, nì Beeyaliya, nì Seemariyawuu, nì Seefatiyawuu un sá Arufi tiŋkinee, 7nì Eelkana nì Isiya nì Asareeyeel nì Jooweeseer nì Yasoobaam bin sá Kooree maaliŋunee, 8nì Jeeroowaam un sá Geedɔɔr tiŋkinee jipɔmbi Jooweela nì Seebadiya.

9Gaadi naakookun yab biba mun nìn yíkì ki cūtìi kútì Daafiidi pu u-balilaŋki kuteeun. Binib gbanti nìn sá bijanjaliibi bin cáá dipɔbilee ní, ki nìn nyí kujaau bɔti tiŋan pu. Kujaaunee bi nìn ŋúb̀ digbampɔɔl nì kikpaŋ ní ki jáà. Bi nìn pɔ̄ɔ̄ kii gbikintibee ní ki nìn yáb̀ kii mpeewumu mun kóò ajoon puee. 10Ukpil di nìn sá Eeseer, ní uliliiti sá Oobadiya, ní utataati sá Eeliyaab. 11Unanaati di nìn sá Miisimana, ní uŋmooŋmooti sá Irimeeya, 12ní ululuuti sá Atayii, ní ululuúti sá Eeliyeel. 13Uniniiti di nìn sá Yoowanan, ní uwawati sá Eelsabaadi, 14ní usaalaati sá Irimeeya ní saalaa nì upeekaa sá Makibanaayi. 15Gaadi yab gbanti nìn sá bijanjakpilib ŋma ní. Bi-kansikin un kaa nìn pɔ̄ɔ̄yee pɔŋŋu nìn sá kii bijanjaliibi dilaataalee ní, ní upɔɔl pɔŋŋu nìn sá kii bijanjaliibi kutukuee. 16Ŋwiin ŋubɔee, bíǹ di nìn dūtì Jɔɔdan buŋŋu dibindi poon uŋmapeekaa, ŋyunti ŋun ní nnyim gbéè kí páań dibuŋgbándi an kɔkɔ puee. Bi nìn cūtìi jìn̄ binib bin nìn kóò atantakan ŋwìiń nyalaŋki pú nì ŋwìiń jeetilaŋki púee.

17Beenjameen yab nì Juuda yab biba mun nìn cūtì Daafiidi cee u-balilaŋki. 18Daafiidi nìn nyáń ki túŋkì-bi nsanni ní ki bí-bi yii: «Ni yaa dɔ́miń nì ŋgbansɔŋfi kí dāá tūtuǹ-mee, m làá fōō-ni nì dipɔbil diba. Ama ni yaa dɔ́miń kí kīil̀-mi ní kí tūtuǹ m-nannanliibi ŋyunti ŋun ní maa ŋá tikpitil tibee, ti-baabi Nimbɔtiu ń nīn sá seeradaan kí sòoǹ ti-bɔti gbanti.» 19Unimbɔti Fam nìn gbí Amasaayi un nìn sá bibaatandambi bin nìn bí Mmuŋku nì Saalaa kitil poonee kpiliu ní u bí yii:

«Ti bí ki tīī-si,

ti bí a-jandi pú, Isayi jipɔɔn Daafiidi.

Ŋgbansɔŋfi ń nīn bí a-cee,

kí nīn bí bin di tíkí-see mun cee.

Di sá yii a-Nimbɔtiu di tútúǹ-si!»

Niinee ní Daafiidi fōō-bi ní ki dū-bi ki ŋá u-janjakitil kpilib.

20Kí kúntée, Manasee naakookun yab nìn cūtìi kútì Daafiidi pu. An sá ŋyunti ŋun ní u nìn céeǹ Fiiliistii yab bí cù kí já nì ubɔti Saayuulee. Ama tiŋman puee, Daafiidi nì u-naacimbi kaa nìn tútúǹ Fiiliistii yab bi jáń kujaau gbanti, di sá yii Fiiliistii yab kpilib nìn jìn̄-bi. Bi nìn lī tɔb cee yii: «Daafiidi làá fàtīí gítí u-kpiliu ukpiki Saayuul cee ní kí cáá-ti kí líiǹ-u!»#12.20 Kpèè 1 Sami 29.1-5. 21Ŋyunti ŋun Daafiidi nìn fàtīi gítí Siikilaagi tiŋkinee ní Manasee yab biba nìn cūtìi kútì u-pu. Bi-yiŋŋi di sá Adina nì Joosabaadi nì Yeediyeel nì Miikayeel nì Joosabaadi nì Eeliiwuu nì Siileetayi. Bi nìn sá Manasee janjaliibi kutuku kutuku kitiŋi kpilib ní. 22Bi-kɔkɔ nìn sá bibaatandambi bin cáá dipɔbilee, ki nìn tútúǹ Daafiidi janjaliibi tikpil ní ki kpántì u-janjakpilib. 23Ŋwiin kamaayee, binib nìn pée dòoń ní ki kútí Daafiidi pu kí nīn tútúǹ-u, ní u-janjaliibi kitil dūu ŋá dikpaandi kii Unimbɔti janjakitilee.

Bijanjaliibi bin cūtì Daafiidi cee Eebrɔn tiŋkinee

24Binib bin nìn bɔ́ntì kí já kujaauee nìn dɔ́miń ki kútì Daafiidi pu Eebrɔn tiŋkin. Kii ti-Dindaan nín nìn tīī mara puee, bi nìn dɔ́miń kí dū dibeel pɔŋŋu ŋun Saayuul nìn cááyee kí tīī-u ní. Bin nìn dɔ́mińee nyɔkɔm sèé. 25Juuda naakookunee, bijanjaliibi nìn sá binib kutukub biluu nì binib alaataa anii, ki ŋúb́ agbampɔɔ nì ŋkpamu. 26Simeeyɔn naakookunee, bijanjaliibi nìn sá binib kutukub biluli nì dilaataal, ki sá bibaatandambi. 27Leefii naakookunee, bijanjaliibi nìn sá binib kutukub binaa nì binib alaataa aluu ní, 28ní kí kūtì Aarɔn maaliŋun yab kpiliu Yooyadaa, u nì bijanjaliibi kutukub bita nì alaataa aluli. 29Unaacimpɔɔn Sadooki un nìn sá ubaatandaanee mun nìn bí, u nì u-dicaŋkun yab bijanjakpilib mmuŋku nì bili. 30Beenjameen naakooku kun poon Saayuul u-ba nyánnée janjaliibi nìn sá kutukub bita ní. Bi-kansikin tikpil nìn dá láá bí Saayuul dicaŋku tundin ní. 31Eefiraayiim naakookun yab janjaliibi nìn sá binib kutukub mmuŋku nì alaataa anii ní. Bi-kɔkɔ nìn sá bibaatandambi ní ki nìn nyáń diyindi bi-dicaŋŋin. 32Manasee naakooku dijandi din bí Jɔɔdan buŋŋu ŋwìiń jeetilaŋki púee janjaliibi nìn sá binib kutukub saalku nì bita ní. Bi nìn baasii lēē bíǹ yii bí cù kí kàan̄ Daafiidi dibeel ní. 33Isakaar naakookunee, bijanjakpilib nìn sá binib alaataa ali, bi nì bijanjaliibi bin nìn bí bi-taapuyee. Binib gbanti kɔkɔ nìn nyí ŋyunti ŋun ní Isirayeel yab máaǹ kí já kujaauee nì min ní bi máaǹ kí ŋée. 34Sabulɔn naakookunee, bijanjaliibi nìn sá binib kutukub imuŋku ili nì saalaa ní. Bi nìn bífì ki cíkitì bi nín jáà kujaau puee tiŋan, ki bɔ́ntì kí dū tijanjawan kɔkɔ nì ti-bulifi kí já kujaau. Bi nìn jáà nì dipɔbil diba ní. 35Neefitalii naakookunee, bijanjakpilib nìn sá binib kutuku, ní bijanjaliibi bin bi nìn kpòotēe nìn sá binib kutukub bita kpá imuŋku ili ki ŋúb́ agbampɔɔ nì ŋkpamu. 36Daani naakookunee, bijanjaliibi nìn sá binib kutukub mmuŋku nì binii nì binib alaataa aluu ní, ki bɔ́ntì kí já kujaau. 37Aseer naakookunee, bijanjaliibi nìn sá binib kutukub imuŋku ili ní. Bi-kɔkɔ bífì ki cíkitì kujaau ní ki bɔ́ntì kí já kujaau. 38Rubeen nì Gaadi naakɔti yab nì Manasee naakooku dijandi diba yab bin kóòń Jɔɔdan buŋŋu ŋwìiń nyalaŋki púee janjaliibi nìn kpáfì binib kutukub dilaataal nì mmuŋku ní, ki ŋúb́ tijanjawan kɔkɔ. 39Bijanjaliibi bin bɔ́ntì kí já kujaauee kɔkɔ nìn dɔ́miń Eebrɔn tiŋkin. Bi nìn dɔ́miń nì dipɔbil diba ki kāaǹ Daafiidi dibeel Isirayeel tiŋki kɔkɔ pu. Isirayeel yab bin kɔkɔ nìn kíǹee nìn kíí kí dū-u kí kàan̄ dibeel. 40Bi kāl̀ Daafiidi cee iwiin ita ní, ki jīǹ ki nyù tin bi-nabiyaamu Eebrɔn yab nìn bɔ́ntì ki yóoǹ-bee. 41Binib bin nìn kóò ntimu mun māntìi tú-bee, ki kpáaǹ bin kóòń Isakaar nì Sabulɔn nì Neefitalii yab timmunee mun nìn cáań tijikaal mmamu nì igutaamu nì imamboon nì inaa pu. Bi nìn túǹní ŋyim nì fiigi nì fiinyi subiliŋ ŋin bi díntèe, nì ndamam nì ŋkpam. Bi nìn cáań inaa nì ipii. Di sá yii an nìn sá jiŋaal ní Isirayeel tiŋki kɔkɔn.

Currently Selected:

1 Chroniques 12: BASSARDC

Highlight

Copy

Compare