1 Chroniques 10

ISIRAYEEL BƆTIU DAAFIIDI BƆTI

(10–29)

Ubɔti Saayuul kúm

(Kpèè 1 Sami 31.1-13)

1Dalba Fiiliistii yab jáń kujaau nì Isirayeel yab Giilboowa jool#10.1 Giilboowa jool: kpèè 1 Sami 28.4. pu. Isirayeel yab nìn sáǹ ní Fiiliistii yab kūū binib tikpil. 2Fiiliistii yab nìn jɔ́m̀ ki kāl̀ Saayuul nì u-jipɔmbi pu kàti kati. Bi nìn kūū Joonatan nì Abinadaab nì Meelkiisuwa. 3Niinee dikɔ̀ndi kóoǹ ki nyīŋfì Saayuul pu. Bipintɔliibi nín dāa ká-uee ní u-pɔbil bíil̀ ní u-wunti kíǹ ki gbáà kpàkpakpa. 4Ní Saayuul bí un ŋúb́ u-janjawantee yii: «Fúutí a-tàataajiki ki sāā kí kpɔ̀-mi. Maa là yii Fiiliistii yab bin kaa gíí akpancan nee ń kpɔ̀-mi kí nīn cáa bèel̄-mi.» Ama ní un ŋúb́ u-janjawantee fāŋkì ní ki yíì. Niinee ní Saayuul yōoǹ úǹ u-ba tàataajiki ki cóoǹ ki lítì ki-pu. 5Un ŋúb́ u-janjawantee nín ká yii u-kpiliu kpíìyee, ní u mun dū u-tàataajiki ki cóoǹ ki lítì ki-pu ki kpíì. 6An nín dī min ní Saayuul nì u-jipɔmbi taatil kpíìyee dee. Mimmee ubɔti dicaŋku kúntì mun dee.

7Isirayeel yab bin kóò ditantakalinee#10.7 ditantakalinee : kpèè 1 Sami 31.7. ká yii Isirayeel yab sáǹ ní Saayuul nì u-jipɔmbi taatil kpíì. Niinee ní bi yíkìi sáǹ ki fá bi-timmu, ní Fiiliistii yab dɔ́miń ki kāl̀.

8Ku wúntì Fiiliistii yab dɔ́miń kí fūkul̀ bin bi kūūyee wantee ní ki ká yii Saayuul nì u-jipɔmbi taatil kpíì ki dɔ̄ Giilboowa jool pu. 9Bi nìn lēē u-yil, ki pēetì u-janjawanti, ní ki tú ki yìiǹ Fiiliistii yab timmu kɔkɔn nì awaadiinni nì aniwulin ki sòoǹ nì báà ŋma bi-jajil pu. 10Boonee ní bi cáá u-janjawanti ki yóoǹ bi-waadiiku kubɔn. Bi nìn dū u-yil ki lúntì bi-waal Daagɔn diikun. 11Bin kóò Yabeesi Galaadi tiŋkinee#10.11 Yabeesi Galaadi tiŋkinee: kpèè 1 Sami 31.11. gbìl̄ Fiiliistii yab nín ŋá Saayuul puee. 12Bininjab bin cáá dibaatandee yíkì ki cūtìi yōoǹní Saayuul nì u-jipɔmbi. Bi nín cáá-bi ki bāań Yabeesee ní bi dū bi-kpabiŋ ki síb́ teereebinti subu bubɔ taapu Yabeesi tiŋkin, ki bóob́ kinyɔkɔ iwiin iluli.

13Kun pu Saayuul nìn kpíìyee di sá yii waa nìn yúl̀ nì ti-Dindaan deedee. Waa nìn tɔ́ u-marab. Áli gba u cūtì un kàal̀ dibɔɔjal pu ki yíì bitaŋkpiibee cee dibalifil#10.13 Kpèè 1 Sami 13.8-14, 15.1-24, 28. Dūú ŋmàntī nì Akoo 19.31, 20.6., 14kaa mēē ti-Dindaan ú kpòotī-u. An pu ní Unimbɔti yāntì Saayuul kpíì ní u dū dibeel ki tīī Isayi jipɔɔn Daafiidi.

Currently Selected:

1 Chroniques 10: BASSARDC

Highlight

Copy

Compare