Jeremiah 17

Hay Bahol nan iJudah

1Impahapita' ay Apo Dios, at inalinay,

“Nan bahol nan iJudah ya paddungnay niyo'odol ay dida

an niyay'ayan di hiyay atonda,

ya paddungna goh un hiyay nipa'ot hinan dugun nan pun'onnganda.

2Ya ta"on un nan imbabaluyda ya umat goh ay dida ti inada'adalda

an hay gunda pundayawan ya hinan inyammadan pun'onngan hinan awadan nan bulul an Asherah#17:2 Hi Asherah ya babain bulul di iCanaan an mangidat anuh imbaluy ya nan amaphod di mihabal.

hinan way mun'alubong an ayiw hinan dudunduntug.

3At hiyanan hay ato' ya ipahamham'un amin nan inadangyandah nan buhulda

an dumalat nan pumbaholan an ato'atonda.

Ya ta"on nan duntug hi awadan nan Timplu' ad Jerusalem ya midat goh ay dida,

ya umat goh hinan nundayawandah bululda ta bagida.

4At taynanda nan babluy an indat'un dida

ta umuyda itamuan nan buhuldah udum an babluy an agguyda in'innila.

Ti nidugah di bohol'un dida an ay apuy an dumaladalang hi enggana.”

5Ya inalin goh Apo Dios di,

“Ha"in an Dios ya moltao' nan tatagun adi managgung ay Ha"in

an hay pundenlanda ya nan abalinan di tagu.

6Hay ipaddunganda ya nan a'ayiw an nitanom hinan mapulun,

at hiyanan mi'id di hohoddon hi pumhodandah udum hi algaw.

7Mu mawagahan nan tagun mange'kod hi nitaguanan Ha"in an Dios,

8at hay ipaddunganda ya nan a'ayiw an nitanom hinan neheggon hinan way ginnaw an dimmatong di lamutdah nan way danum.

At hiyanan ta"on hi un mabayag an umugaw ya hihidyan munlangtay tubuda,

ya bumungadah nan gutud di bumungaanda.

9Hay aat di nomnom di tagu ya nidugah an bumalbalih an amin hi logom

ti nihimung an na"appuhi.

At naligat an ma'awatan.

10Mu Ha"in an Dios ya inila' di nomnomnomon#17:10 Hay immannung hi inalinah tu ya nan batin ti hiyah ne kinulug nan Hudyuh awadan di punle'nan di tagu. Mu nepto' nan nibalin hitu ti kulugon nan iYadyang an hay nomnom di awadana. di tatagu ya nan pohdondan aton.

At hiyanan hay idat'uh lagbun nan hinohhan tagu

ya nan miyunnudan hinan pangatna.

11Ya nan tatagun immadangyan an dumalat di kuluk

ya umatdah nan hamuti an mangobob hinan bo'on itlogna.

At hay umangunuh ya mami'id heden inadangyanda,

ya unda mahkay innilaon an mi'id di nomnomda.”

Hay Himmapitan Jeremiah

12Ya inali' di,

“Maphod ta wah tu'ah nan Timplum an awadan di nabagtun pumpapto'am

an nete"a tuwalih din hopapna!

13He"a, Apo Dios, di hahalimidonmin bumadang ay da'min holag Israel,

at an aminda nan manginganuy ay He"a ya nidugah an mabainanda.

Ya nan man'ug ay He"a ya hay pumbalinanda ya umat hinan nitudo' di ngadandah nan hupu' ya anggay an ma'utawda

ti din'ug da'an Dios an alpuwan di itaguan.

14At odowo' an ipaphoda' ni' ahan ay He"a, Apo Dios,

ti He"a ya anggay di mamaliw ay ha"in,

ya He"a ya anggay di daydayawo'.

15Nan tatagu ya nidugah di ngohoydan alyondan ha"in di,

Uggoh mah din gunmu inalin hinapit Apo Dios hi ma'at?

Uggoh mah ta ipa'annungna?

16Apo Dios, agguy'u ingnganuy nan tamu' an mangipapto' hinan tatagum,

ya agguy'u inyal'alu' ay He"a nan punligatanda.

Ti nan inalim ay ha"in di hiyay gun'u impa'innila.

17At adia' ni' ahan pata'ton

ti He"ay pange'koda' hi mangibaliw ay ha"in hi un madatngan di a'ubahanmi.

18At tigom ni' ahan ta nan mangipaligligat ay ha"in di pata'tom ya bainom ta bo'on ha"in,

ya diday ubahom ta mipa'annung ay dida nan ta'tandan ma'at!”

Nan Ngilin an Habadu

19Palpaliwan ya inalin goh Apo Dios ay ha"in di, “Umuy'ah nan pantaw di allup an gun pange'wan nan tatagu ya nan a'alid Judah ta tuma'dog'ah di. Ya immuy'a goh hinan udum an pantaw di allup hi ad Jerusalem. 20Ta alyom ay diday, Ihamadyun donglon heten hinapit Apo Dios an ta"on un da'yun a'alid Judah ya da'yun amin an tatagun gun mange'wan ten pantaw di allup. 21Ti inalinay, Ipogpogyun mungkumilduh nan way pantaw di allup ad Jerusalem hinan Habadun ngilin. 22Ya mahapul an mi'id di ilahunyuh kalgah nan abungyu, ya mi'id di muntamu enen algaw ta ngilinonyu ti hiyah te tuwali din intugun'uh din o'ommodyu. 23Mu agguyda inunud ti ma'angohhoyda an adida umunud ya mituduwan! 24Mu gulat ta unudona' ay da'yu ta mi'id di mangita'in hi kalgayun maluh hinan pantaw di allup ad Jerusalem hinan Habadun ngilin ta unyuat ngilinon nongkay henen algaw 25ya minaynayun di pun'ap'apuwan nan aliyun holag David hitud Jerusalem. At hiyanan mitakayda nan ap'apuyu ya da'yun iJudah hi kabayu ya nan kalesa. Ya makulug an mamapnuh tataguh tun ad Jerusalem hi enggana. 26Ti umaliday tatagun malpuh nan abablubabluy ad Judah, ya ad Benjamin, ya nan nun'eheggon hi ad Jerusalem an kapitulyuda. Ya mi'yalida goh nan tatagun numpunhituh nan dudunduntug an wah immapit hi alimuhan di algaw ya ad Negev. Ta pun'iyalidah nan Timplu' di e'nongdan Onong an Moghob di udum, ya nan Onong an Ma'an, ya nan Onong hi Pangidawatan, ya nan udum an e'nongda, ya wada goh di incense hi e'nongdan Ha"in an Dios. 27Mu gulat ta adia' nongkay unudon ta adiyu e'gonan nan Habadun ngilin, ya gun ayu mun'odon hi kalgayuh nan aluhanyuh nan pantaw di allup ad Jerusalem at gohbo' ad Jerusalem hi engganay mapu an ta"on un nan allupna. Ti mi'id di way olognan mangdop hinan apuy.”

Currently Selected:

Jeremiah 17: NHAD

Highlight

Copy

Compare