Ezekiel 18

Nan Mumbahol hi Nomnomna di Munholtap

1Inalin goh Apo Dios ay ha"in di, 2“Hay gunyu hapiton an holag Israel ya alyonyuy,

Din o'ommod anuy nangan hidin umalinu an greyp,

mu din imbabaluyday nun'a'alinu.

3Mu Ha"in an matattagun na'abbagbatun Dios di mangali an mi'id mahkay di gunyu donglon enen gun mibagabagan da'yu. 4Ti Ha"in di okod hi an amin hi tagu an ta"on hi un nan o'ommod ya nan imbabaluyda. At nan tagun mumbahol di mamolta.

5Ya hay ma'alih maphod an tagu

ya nan nahamad di pangatna

6an adi mundayaw hi bulul an umat hinan nunhulbian nan i'ibbayun holag Israel.

Ya adi me"an hinan ne'nong hinan abulubulul,

ya adi umilugtap,

ya adina goh elo' nan babain waday matyamna.

7Ya mi'id ah ohah balbaliyana unu abohlana,

ya adi mangakaw,

ya bayadana nan way inutangna,

ya panganona nan munhinaang,

ya idatnay lubung nan mi'id di lubungna.

8Ya wa ay ta mumpa'utang ya adina ongolon di ipatakapna,

ya du'gona nan nun'appuhin ma'ma'at,

ya ma'andong di pamanuhnah nan way diklamu an mi'id di pangipangngilana.

9Ya adina ibahhaw an unudon nan Tugun'u,

ya atonan amin nan inyuldin'u.

Ya umat ay hinay pangatna ya waday lenggop di punnomnomna,

ya minaynayun di pi'taguana.

Ha"in an na'abbagbagtun Dios di nanapit ete.

10Mu adi umat hinay ma'at hinan imbaluynah un nappuhiy pangatna ti pumatoy, ya mangakaw, ya do'ol di nun'appuhih gunna aton

11ti gun me"an hinan ne'nong hi bulul hidih nan pundayawandah nan duntug,

ya umilugtap,

12ya abohlana nan nun'awotwot ya nan mumpabadang,

ya humod'ap,

ya adina ibangngad di namatang nan impa'utangana,

ya mi'dayaw hinan bulul,

ya umipabain di gunna aton,

13ya mumpatakap hi ongol hinan ipa'utangna.

Nan umat hinan tagu ya adi munnononnong di pi'taguana ti matoy ti din gun'u inali ya adiyu aton ya hiyanay ina'inatna. At hiyay ma'amuyuwan hi atayana.

14Mu gulat ta henen nappuhiy pangatna ya waday imbaluyna, mu adina aton nan gunna tinnig an nun'appuhin ina'inat amana,

15ya adi gun umuy me"an hinan ne'nong hi bulul hidih nan pundayawandah nan duntug,

ya adi mi'dayaw hinan bulul an dayawon nan i'ibbayun holag Israel,

ya adi umilugtap,

16ya adina paligaton di ibbanan tagu,

ya ipabangngadnay namatang nan impa'utangana,

ya adi humod'ap,

ya idatnay onon nan nun'awotwot,

ya idatna goh di lubung nan mid lubungna

17ti adina pohdon an mumbahol,

ya adi mumpatakap hi ongol hinan impa'utangna,

ya unudona nan Tugun'u ta ipa'annungna nan inyuldin'u

ya hiyay way lenggop di punnomnomna, ya munnonong di pi'taguana an bo'on hiyay mamoltah nan bahol amana. 18Mu hi amanay mapatoy an dumalat nan numbaholana ti layahanay i'ibbana, ya do'ol di ina'inatnah nappuhi.

19Mu alyonyu nin di anaad ta adi mi'molta nan imbaluy hi numbaholan amana! Manu ay adi ti maphod di ugalina, ya inunudna nan Tugun'u, ya inhamadnan nangat hinan Uldin'u, at hiya nongkay hi un waday lenggop di punnomnomana, ya minaynayun di pi'taguana. 20Ti nan tagun numbahol di hiyay matoy. Ya nan imbaluy ya adi mabalin hi un mamolta an dumalat di bahol di ommod, ya adi goh mabalin hi un mamolta nan ommod an dumalat di bahol nan imbaluyna. Ya nan tagun nahamad di hiyay way lagbuna, mu nan tagun mangat hi nappuhi ya hiyay mamolta.

21Mu gulat ta itutuyun nan taguy nun'appuhin ina'inatna, ya inunudnan amin nan Tugun'u, ya inatnan amin nan inyuldin'u, ya maphod di pangatna at adi mamolta. 22Ti an amin nan numbaholana ya ma'aliwan ti nahamad mahkay di pangatna.

23Ha"in an na'abbagbagtun Dios ya adi' pohdon ahan an matoy nan tatagun nun'abaholan ti hay pa'appohdo' ya itutuyudan amin nan numbaholanda ta way atondan mi'tagu.

24Mu gulat ta nan tagun maphod di pangatna, ya awni ya numbahol, ya innaynayunan mangat hinan ato'aton nan nun'appuhiy pangatnan tatagu at ta"on un hiya ya mamolta. Ya ma'aliwan an amin din maphod an ina'inatna. Ya mamolta ti din'ugnan mangat hi maphod ta nan pumbaholan di gunna inat.

25Mu ini ya wada goh di mangalin da'yuh nibahhaw di pangat'un Dios! Mu donglonyu ni' tun hapito' an da'yun holag Israel an makulug tun ato'ato' an da'yuy nibahhaw. 26Ti ta"on hi un maphod di pangat nan tagu mu awni ya numbaliang ta nan nun'appuhiy ato'atona, at hiyanan mamolta an dumalat di baholna. 27Mu nan tagun ta"on hi un na'abbaholan mu awni ya nuntutuyu ya din'ugna mahkay nan gunna pumbahbaholan ya hiyay mabaliwan hi amoltaana. 28Ti ininnilanay aat di anappuhin nan ina'inatna, at din'ugna. Ya gapu ta umat hinay inatna at umannung an hiya ya mi'tagu. 29Mu alyonyu damdaman holag Israel di un Ha"in an Dios di nibahhaw di pangatna. Mu hay makulug ya da'yuy nibahhaw!

30At hiyanan da'yun holag Israel ya humalyao' da'yu ta nan pummolta' ay da'yu ya miyunnudan hinan ina'inatyu. Mu idinongyu ni' nan gunyu pumbaholan ta bo'on hiyay dumalat hi a'ubahanyu. 31At hiyanan ipogpogyu ni' nongkay nan gunyu pumbahbaholan ta ete"ayu goh an mangat hinan makulug an pangat. Ti undan pohdonyu ahan tatagwan mamolta? 32Adi' ahan pohdon hi un way ohah matoy ay da'yu! At ipogpogyu ni' nongkay nan gunyu pumbahbaholan, at mi'tagu ayu. Ha"in an na'abbagbagtun Dios di nanapit ete.”

Currently Selected:

Ezekiel 18: NHAD

Highlight

Copy

Compare