2 TIMOTEORI SARRERA
SARRERA
Nork eta norentzat idatzia
Gutun honen igorlea eta hartzailea, Timoteori egindako lehen gutuneko berak dira, baina bien egoera eta giroa ez dira berdinak; oraingo honetan, idazlea kartzelan dago Erroman (1,8.16-17) eta hurbil sumatzen du heriotza; Timoteori egiten dizkion aholku eta erreguak estuagoak eta premiazkoagoak dira: idazlearen testamentu-antza dute.
Gutunaren hari nagusiak
Gaiaren aldetik 1 Timoteori gutunaren berdintsua bada ere, 2 Timoteoren hizkera askoz ere pertsonalagoa da; luzeago ematen du idazlearen egoeraren berri: Paulo kartzelatua dago, denek utzia (4,16), baina nahigabe guztien artean Jaunak bizkortzen du (1,12); hurbil sumatzen du jadanik bere azken askapena (4,17-18), bere biziaren eskaintzaz lortuko duena (4,6); esker onez aipatzen du Timoteo, beren arteko adiskidetasun mina eta apostolutzan nahiz erasoaldietan beti bat eginik egon zaion bere seme eta ikaslearen elkartasuna gogora ekartzen dituelarik (1,2-5).
«Horregatik gogorarazten dizut indarberri dezazula nik eskuak ezartzean Jainkoak eman zizun dohaina» (1,6). Dohain honek, aldi berean, berri ona, Jainkoaren onginahi salbatzailea (1,9-10) eta apostolu-ministerioa (1,11-12) adierazten ditu. Lehenik, Paulorengandik hartu duen gordailua Espirituaren laguntzaz zaintzeko eskatzen dio Timoteori (1,14), berarengandik ikasi eta onartu duen hartan tinko iraunez (3,14), Liburu Santuak oinarritzat harturik (3,15-16) eta eztabaida zoroak alde batera utziz, horiek sesioak sortzeko (2,23) eta sinesmena hondatzeko (2,14-18) bestetarako ez baitira. Bigarren, bere burua berri onaren zerbitzura emateko eskatzen dio, eragozpenen aurrean atzera egin gabe (2,1-3), lotsarik gabe, idazlearen beraren antzera (1,8-12), aurka jartzen direnak zentzaraziz (2,25), garaia denean eta ez denean berri ona hots eginez (4,2-5).
Aipagarria da atal berezi bezala 2,11-13ko gorazarrea.
Eskema
—Agurra, esker ona eta leialtasunerako deia (1,1-18).
—Jesu Kristoren soldadu on bezala jokatu (2,1-13).
—Artzain arduratsu eta frogatua (2,14—4,5).
—Pauloren egoeraz berriak eta Timoteori aginduak (4,6-18).
—Azken agurrak (4,19-22).
Currently Selected:
2 TIMOTEORI SARRERA: EABD
Highlight
Share
Copy
Want to have your highlights saved across all your devices? Sign up or sign in
Elizen Arteko Biblia (EAB) Biblia en Euskara, Traducción Interconfesional) Copyright © Sociedad Bíblica de España, 2008 Utilizada con permiso