Upfenuo wa Yohana 5
5
Huyu Mwana Mbuzi kafunguya hichi chuo
1Kisa niona hu mukono kuyume wa huyu akaiye kwa hichi kiti cha kihaju ugija chuo. Hichi chuo#5:1 Hichi chuo si dza hivi vyuo vyehu vya hizi hizi nsiku. Iwa ni aina ya karat̯asi modza yeya ambu nchingo iyoikitumika kwa kworea. Vikikutswa kwa kulingilwa pfantu pfa ndihi mbii, kisa vikafungwa na dzuu kwa kumat̯aniswa noma iḍausijweyo kisa ikangizwa muhuri wa huyu mwenye oreye. kiwa choregwa nze na kuzimu na kiwa kifungwa na mihuri mifungahe. 2Niona na malaika mwenye nguvu, akilalabva akyamba, “Ni ga eye na hachi ya kuivunza hi mihuri akifunguye hichi chuo?” 3Ela ntakwiwa na yuḍejwonse mbinguni, lumwenguni ambu kuyawa kwa lumwengu jwa wafu, eyekuwa na hachi ya kuchifunguya hichi chuo akiyowe. 4Nami kudzaona hivyo, ninjia kuiyani na tsungu muno, koro ntakwiwa na hat̯a mumodza eyekuwa na hachi ya kuchifunguya hichi chuo achisome. 5Ela mumodza jwa hawaḍe wazee miyongo miwii na wane kanyamba, “Yatsa kuiya! Huyu eyenahanwa Nsimba jwa kyeet̯i cha Yud̯a, eye kit̯ukut̯uku cha haju D̯aud̯i kashinda! Ndookomu jeje anaweza kuivunza hi mihuri akifunguye hichi chuo.”
6Kisa niona Mwana Mbuzi asumamiye hafufi na hiki kiti cha kihaju na akizunguukwa ni hivi viumbe vyoone na hawa wazee. Huyu Mwana Mbuzi kakaa dza kwamba ewa katsinzwa. Na ewa na mpembe mfungahe na matso mafungahe, ambayo ni hizi ruhu mfungahe za Muungu zizohumwa lumwengu yuzima. 7Huyu Mwana Mbuzi kenda kachihwaa hichi chuo kuyawa kwa hu mukono kuyume wa huyu akaiye hapfa pfa hichi kiti cha kihaju. 8Epfokihwaa, hiviḍe viumbe vyoone pfamodza na hawaḍe wazee miyongo miwii na wane wamugwiya maguuni. Kula mumodza jwao ewa na kinuḅi na ḅaakuli ya dhahaḅu. Haya maḅaakuli yewa yadzaa vumba t̯ipu ambaḍyo ni mayombo ya wadheru wa Muungu. 9Wamwimbia wiya mupfya wakyamba,
“Wewe unamala kuchihwaa hichi chuo,
uivunze hi mihuri yakwe.
Koro wewe kuyagwa,
na kwa mwaziwo, kumukombowea wantu Muungu.
Wewe kumukombowea wantu,
wa kuyawa kula nsi na kyeet̯i na lugha.
10Kuwahendeza wawe wantu wa Uhaju wa Muungu
na wakohani wa kumuhumikia Muungu jwehu.
Nao wanajut̯awala lumwengu.”
11Nikidzanikihea matso kawii, nisikia saut̯i za malaika wenji na wenji wasiot̯alika waringiyeo hiki kiti cha kihaju, na hivi viumbe vyoone na hawa wazee. 12Hawa malaika wekikwimba na saut̯i nkuu wakyamba,
“Huyu Mwana Mbuzi ayagijwe,
anamala kushad̯wa kwa dzambo ḍya uwezowe mukuu,
ujabvawe, mvidhyoye na nguvuze.
Jeje anamala kukuzwa na kuhilwa.”
13Kisa nisikia viumbe vyonse, vivyo mbinguni dzuu na lumwenguni na nsii ya gaga ḍya lumwengu na madzini kuzimu, vikikwimba wiya. Vikwimba vyamba,
“Huyu akaiye dzuu ya kiti cha kihaju,
pfamodza na huyu Mwana Mbuzi,
nawashad̯we na kukuzwa,
na kuhilwa na kuwa na nguvu maishi na maishi.”
14Na hiviḍe viumbe vyoone vyamba, “Amina.” Na hawaḍe wazee miyongo miwii na wane wamugwiya Muungu na huyu Mwana Mbuzi kuwayomba.
Currently Selected:
Upfenuo wa Yohana 5: pkb
Highlight
Copy
Compare
Share
Want to have your highlights saved across all your devices? Sign up or sign in
© 2004, Bible Translation and Literacy
