Upfenuo wa Yohana 6

Kuvunzwa kwa hi mihuri mihandahu ya d̯ura

1Kisa nimuona huyu Mwana Mbuzi akiuvunza hu muhuri wa d̯ura kahi ya hiḍe mihuri myofungahe. Na nisikia kiumbe kimodza kahi ya hiviḍe viumbe vyoone kikinena na saut̯i nkuu dza ḅaḅat̯u, kikyamba, “Nzoo huku!” 2Nami nikidzanikihea matso, niona farasi dzeupe. Na huyu aḍipfaiye ewa kagija uha na ewa kabigwa kiyemba cha kihaju. Jeje ewa ni mushindi na kayawa kwenda akaheke na wangine zaid̯i.

3Huyu Mwana Mbuzi epfouvunza hu muhuri wa pfii, nikisikia hiki kiumbe cha pfii kikyamba, “Nzoo huku!” 4Na pfapfo kut̯upuka farasi ḍya ranji ya moho. Huyu aḍipfaiye ewa kapfegwa yupfanga yukuu na uwezo wa kujumuya viha lumwenguni, ili awahendeze wantu wayagane wao na wao.

5Huyu Mwana Mbuzi epfouvunza hu muhuri wa hahu, nikisikia hiki kiumbe cha hahu kikyamba, “Nzoo huku!” Na pfapfo kudzayowa, niona farasi dzeusi. Huyu aḍipfaiye ewa kagija mizani mukononi. 6Kisa nisikia dza saut̯i iyoikiyawa kahi ya hiviḍe viumbe vyoone, ikyamba, “Mufuto mumodza wa nganu kwa maipfo ya kiḅaruwa cha nsiku nzima! Na mifuto mihahu ya muhama kwa maipfo ya kiḅaruwa cha nsiku nzima. Ela haya mafuha ya mizeituni na hi mvinyo, sivinange!”

7Huyu Mwana Mbuzi epfouvunza hu muhuri wa ne, nikisikia hiki kiumbe chane kikyamba, “Nzoo huku!” 8Na pfapfo kudzayowa, niona farasi ḍya ranji ya ivuivu. Na huyu aḍipfaiye ekihanwa Kufwa, na Lumwengu jwa Wafu jwikimuuḅa na nyuma. Wao wewa wapfegwa mamulaka ya kuyaga roḅo ya wantu wa huju lumwengu kwa njia ya viha, nzaa, vipfupfu na binensa.

9Huyu Mwana Mbuzi epfouvunza hu muhuri wa tsano, niona *madhabahu. Na hapfa nsi ya haya madhabahu, niona ruhu za hawa wayagijweo kwa dzambo ḍya chuuwo cha Muungu na ushuhuḍa wao. 10Wekinena na saut̯i nkuu wakyamba, “E Ḅwana Mwenye nguvu, wewe u Mudheru na u Muhikizika! Unainda hat̯a ari kuipfa halo kwa kuwahukumu awa wantu wa lumwengu wahuyagiyeo?” 11Kisa kula mumodza jwao kapfegwa nkanzu nyeupe pee. Na wambigwa wasohe kwa muḍa kachuchu, mumpaka hi hesaḅu ya hawa wandugu zao na wahumisi wenzao wadzeoyagwa dzao it̯imiye.

12Kisa huyu Mwana Mbuzi kauvunza hu muhuri wa handahu. Na nikidzanikihea matso, niona kugunga muhehemo mukuu wa nsi. Hiḍi dzuwa ḍihenda kiza na ḍigala dzeusi si, dza sinzi. Hu mwezi uperuka ranji ya moho dza mwazi. 13Na hizi nyoha zigwa lumwenguni dza hiviḍe vya kiyuwa kivyonaharachaa kwipfonabiga vut̯o. 14Hizi mbingu zikutswa-kutswa#6:14 Haya matsoro ya Kiyunani yana maana ya kwamba, hizi mbingu zikutswa-kutswa dza hiviḍe vya musala wivyonalingilwa. dza karat̯asi zinujwa. Kula murima na kula kilulu vyaara na hapfaḍe vipfokuwa. 15Kisa mahaju ya lumwengu, wakuu wa sirikali, wakuu wa maḍyeshi, majabva na wantu wa maana maana wangine pfamodza na wantu wangine wonse, hangu wahumwa na weo huru, wadzifitsa mampangoni na myambani huku mirimani. 16Wayambia hi mirima ne myamba, “Hugwiyeni muhufitse, hutseonwa ni huyu akaiye hapfa pfa hichi kiti cha kihaju na muhuchinge na ngoro ya huyu Mwana Mbuzi. 17Koro nsiku yao ya kuhuhukumu ifika. Ni ga adzeyepfona?”

Currently Selected:

Upfenuo wa Yohana 6: pkb

Highlight

Copy

Compare