FAATAOTO, 28
28
O LE MATAUPU XVIII.
O le amio leaga; ma le faamaoni.
1E sosola ē amio leaga, a o leai sē tuliloa; a o e amiotonu, e pei o le leona taanoa i latou ona lē mata‘u. 2O le fouvale o le nuu e toatele ai ona alii; a o le tagata mafaufau ma le poto, e faaualoaina ai le malo. 3O le tagata mativa o le ua faasaua i e matitiva, o le timuga e palasi ifo lea, a e le tupu ai ni mea e ‘ai. 4O e tuulafoai le tulafono, latou te vivii i le ua amio leaga; a o e tausiusi i le tulafono, latou te tiga lava ia i latou. 5O tagata amio leaga latou te le lagona le faamasinoga; a o e saili ia Ieova ua latou lagona mea uma. 6E sili ona lelei o le tagata mativa ua savali i lana amiotonu, i le ua faapiopio ona ala, a o le mauoa ia. 7O le ua anaana i le tulafono, o le atalii mafaufau o ia; a o le ua aumea ma e ‘ai tetele, e mā ai lona tamā ona o ia. 8O le ua faatele ana oloa i se totogi faasili, po o se mea faasili, na te faaputuina ia mea mo le ua alofa i e matitiva. 9O le ua liliu ese ona taliga a e le faalogologo i le tulafono, e inosia lana lava tatalo. 10O le ua faasese i e amio sa‘o i le ala leaga, e paū o ia i lana lava lua; a o e ua sao ona lelei, e fai mo latou tofi mea lelei. 11O le tagata mauoa, e poto o ia i lona manatu; a o le tagata mativa le ua mafaufau, na te suesue ia te ia. 12A olioli ē amiotonu, e tele ai le manuia; a e a tulai mai ē amio leaga, ua lalafi ai tagata. 13O le ua ufiufi lona solitulafono, e le manuia o ia; a o le ua faaali ma lafoaiina, e alofagia o ia. 14Amuia le tagata ua le aunoa ona mata‘u o ia; a o le ua faamaaa lona loto, e paū o ia i le leaga. 15O le leona tagi ma le urosa fia ‘ai, o le alii amio leaga lea ua pule i le nuu mativa. 16O le alii ua leai sona mafaufau, ua tele ana sauaga; a o lē ‘ino‘ino i le matapeapea, e faalevalevaina ona aso. 17O le tagata ua faasaua ua fasioti ai le tasi, e sola atu lava ia, e oo i le lua; aua le taofia o ia. 18O le ua savali ma lana amio ua sao, e faaolaina o ia; a o le ua faapiopio i ala e lua, e paū o ia i se tasi o ia ala. 19O lē galue i lona fanua, e ma‘ona o ia i mea e ‘ai; a o lē mulimuli i tagata faatauvaa, e ma‘ona o ia i le mativa. 20O le tagata faamaoni, e tele mea e manuia ai o ia; a o le ua faataalise ona mauoa, e le faasaoina o ia. 21O le faailogaina o tagata, e le lelei lea; e solitulafono lea tagata ona o le fāsi areto. 22E faataalise i le fia mauoa le tagata mataoge; a e le iloa e ia e oo mai le mativa ia te ia. 23O le ua aoai i le tagata, e mulimuli ane e alofagia o ia e sili i le ua tautala faaoleole. 24O le na te faoa mea a lona tamā ma lona tinā, a e fai ane o ia, E le se solitulafono lea; e faatasia o ia ma le tagata na te faataumaoi mea. 25O le ua fefete lona loto, na te faatupuina le misa; a o lē faatuatua ia Ieova, e matuā ma‘ona lava ia. 26O le ua faatuatua i lona lava loto, o le vale ia; a o lē savali ma le poto, e laveaiina o ia. 27O le ua foai atu i le tagata mativa, e le mativa o ia; a o lē ‘alo ai ona fofoga e lāufetuuina o ia. 28A tulai mai ē amio leaga ua lalafi ai tagata; a e a fano i latou ua faatoateleina ē amiotonu.
Currently Selected:
FAATAOTO, 28: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
