FAATAOTO, 23
23
O LE MATAUPU XXIII.
1Afai lua te nonofo ma se alii e taumafa se ‘ava, seia e matuā mafaufau i mea ua i ou luma; 2ma e tuu atu se polo i lou ua, pe afai e te se tagata ‘ai tele; 3aua e te naunau i ana mea suamalie; auā o mea e ‘ai pepelo lava ia. 4Aua e te galue faapuapuaga ia mauoloa ai; tuu ia o lou lava taofi. 5E te tulimatai atu ea i le mea ua leai? auā e faia lava e ia ona apaau; e pei o le aeto ona lele atu o ia i le lagi. 6Aua e te ‘ai i le mea e ‘ai a le mataoge; aua foi e te naunau i ana mea suamalie. 7Auā e pei ona manatu o ia i lona loto, ua faapea lava o ia; e fai mai o ia ia te oe, ‘Ai ia ma inu; a e le ia te oe lona loto. 8E te toe puai mai le fasī mea ua uma ona ‘ai, ma e faamāumau au upu mālie. 9Aua e te tautala atu i taliga o le vale; auā e ‘ino‘ino o ia i le poto o au upu. 10Aua ne‘i sii le tuaoi o le vavau; aua foi ne‘i e uia fanua o e mātuaoti. 11Auā e malosi lava lo latou Faaola; o ia lava na te faia la latou finauga ma oe. 12Uai mai lou loto i mea e a‘oa‘oina, ma ou taliga i upu e poto ai. 13Aua ne‘i taofia le aoaiga i le tama; auā afai e te sasa ia te ia i se laau, e le oti o ia; 14e te sasa ia te ia i se laau, ona e laveaiina lea o lona agaga ai seoli.
15Lo‘u atalii e, afai e poto lou loto, ona fiafia ai lea o lo‘u nei lava loto; 16e olioli foi lo‘u manatu, pe a tautala ou laugutu i mea ua tonu. 17Aua le losilosi lou loto i e agasala; a ia e mata‘u ia Ieova i le aso atoa; 18auā afai o i ai le iuga, ona le iuvale lea o lou faamoemoe. 19Ia e faalogo mai, lo‘u atalii e, ma ia e poto; ma e ta‘ita‘i tonu lou loto i le ala. 20Aua ne‘i fai oe ma so latou o e inu tele i uaina; ma e ua aai tetele i manu; 21auā o lē inu tele ma ‘ai tele e faamativaina o ia; ma lē fia moe pea e ofu o ia i ofu masaesae. 22Ia e faalogo i lou tamā, o le na fanaua oe; aua foi e te ‘ino‘ino i lou tinā pe a loomatua o ia. 23Ia e faatau mai le mea moni, aua lava le faatau atu; atoa foi ma le poto, ma le a‘oa‘oina, ma le atamai. 24E matua olioli lava le tamā o le ua amiotonu; o le na fanaua le atalii poto e fiafia o ia ia te ia; 25e fiafia lou tamā ma lou tinā; e olioli lava le na fanau mai oe. 26Lo‘u atalii e, au mai ia lou loto ia te au; ma ia fiafia ou mata i o‘u ala. 27Auā o le fafine talitane, o le lua maulalo lea; o le fafine ese, o le vaieli pu itiiti lea; 28o ia foi nate saunia mailei, e tusa ma le ua fao mea, na te faatoateleina foi tagata amioletonu.
29E ia te ai ea le aue? e ia te ai ea mala? e ia te ai misa? e ia te ai le atuatuvale? e o ai ea manunua fua? e ia te ai ea mata mūmū? 30O e ua faatuai i le uaina; o e o atu e saili i le uaina filogia. 31Aua e te vaai i le uaina pe a mūmū mai; pe a pupula mai i le ipu, e alualu sa‘o ifo ia. 32E mulimuli ane e feū ia, pei se gata; e pei o le gata uogo lona tui; 33e vaai ou mata i fafine ese; e tautala foi lou loto i mea faapiopio. 34E tusa lava oe ma le ua taoto i totonu o le sami; e tusa foi ma le ua taoto i le tumutumu o le fanā. 35E te faapea, Na latou fasia a‘u, a ou te lei tiga ai; na latou tu‘ia a‘u, a ou te lei lagona; pe a a‘u ala, ona ou toe sailia lea.
Currently Selected:
FAATAOTO, 23: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
