FAATAOTO, 22
22
O LE MATAUPU XXII.
1Ia sili le manao ina ia ta‘uleleia i le manao i le oloa e tele; ma le agalelei, ia sili le manao i lea i le ario ma le auro. 2O le mauoa ma le mativa la te fetaiai; na faia i laua uma e Ieova. 3O le ua faautauta, na te iloa atu le leaga, ma lafi ai; a o e ua faigofie, e o atu pea i latou, ona faasalaina ai lea. 4O le taui o le faamaulalo ma le mata‘u ia Ieova, o le oloa lea, ma le viiga, ma le ola. 5O mea matuitui ma mailei, o loo i ai ia i le ala o lē faapiopio; o lē tausi o ia ia te ia, e faamamao o ia i ia mea. 6A‘oa‘o ia i le tama e tusa ma lona ala; a oo ina toeaina lava o ia, e le te‘a ese ai. 7E pule le mauoa i e matitiva; e auauna foi lē no mea i le ua au mai ai ana mea. 8O le ua lulu le amio leaga, e selesele mai ai e ia le mala; e faaumatia foi le tootoo o lona ita. 9O le ua mataalofa e faamanuiaina o ia; auā e foai atu e ia ana mea e ‘ai i le ua mativa. 10Tuli ia le faatauemu, ona mavae atu ai lea o le finauga; e tuua foi le misa ma le faamāina. 11O le ua manao i le loto mamā, e matagofie ona laugutu; e fai o ia ma uo a le tupu. 12O fofoga o Ieova e leoleoina ai e ua popoto; a e faaiuvaleina e ia upu a e amioletonu. 13Ua fai ane le paie, O loo i fafō le leona; e fasiotia ai a‘u i malae. 14O le gutu o le fafine ese, o le lua maulalo lea; o le ua matuā itagia e Ieova e paū o ia i ai. 15Ua fusifusia le valea i le loto o le tama; a e faateaeseina ai ia te ia i le sasa e aoai a‘i. 16O le ua faasaua i le tagata mativa ina ia faatele ai ana oloa, ma le ua foai atu i le mauoa, e iu ai lava i le mativa.
17Uai mai ia ou taliga, ma e faalogo mai i upu a e popoto; ma ia e matuā mafaufau i lo‘u poto. 18Auā e matagofie pe afai e te tausia ai i lou loto; e faatatauina faatasi i ou laugutu. 19Ua ou a‘oa‘o ia te oe, o oe lava, i le aso nei, ina ia fai Ieova mou faatuatuaga. 20Ua ou le tusi atu ea ia te oe o mea sili i faatonuga ma le poto; 21ina ia ou faailoa ia te oe le faamaoni o upu moni; ina ia e tali atu ai upu moni i e aau mai ai nisi ia te oe?
22Aua e te faoa mea a le tagata mativa, ina ua mativa o ia; aua foi e te faasaua i le faitotoa le ua tiga. 23Auā o Ieova, o ia na te faia la latou finauga; na te fasiotia foi i latou o e faasaua ia i latou. 24Aua ne‘i fefaauoai ma le tagata itagofie; aua foi lua te o ma le tagata lotoa; 25ina ne‘i ē faaa‘oa‘o i ona ala; ona maua ai lea o lou agaga i le mailei. 26Aua ne‘i fai oe ma so latou o e fetagofi i lima; pe fai oe ma moni i mea ua aitalafu ai. 27Afai ua leai sau mea e taui a‘i, se a le mea na te ave ese ai lou moega o ē taoto ai? 28Aua ne‘i sii le tuaoi mai le vavau, na faia e ou mātua. 29Ua e iloa le tagata ua faataalise i ana galuega? e tu o ia i luma o tupu, a e le tu i luma o tagatānuu.
Currently Selected:
FAATAOTO, 22: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
