NAUMA, 1
1
O LE MATAUPU I.
E faaolaina e Ieova ona tagata, a e faasala i e ita ia te ia.
1O le avega ia Nineva. O le tusi o le faaaliga ia Nauma le Elekosi.
2O Ieova o le Atua fuā ia, o lē taui ma sui, o Ieova o lē taui ma sui ma lē matuā toasa; e taui ma sui Ieova i e ita ia te ia, o loo faamoemoe foi o ia i e ua fai o ia ma o latou fili. 3O Ieova e tele gese lona toasa, a e tele lona mana; na te le faasaoina lava e ua agasala; o Ieova o loo i ai lona ala i le asiosio ma le afā, o ao o le efuefu ia o ona aao. 4E aoai e ia i le sami, ma faamateina ai, na te faamamateina foi o vaitafe uma. E mamae Vasana ma Karamelu, e mamae foi fuga o Lepanona. 5E gatete mauga ia te ia, e liu suāvai mauga iti; e mafuie le eleele i ona luma, o le lalolagi foi atoa ma i latou uma o e nonofo ai. 6O ai se tu i luma o lona toasa? O ai foi se tu i luga pe a tupu lona maemaea? Ua sasaa atu lona toatamai e pei o le afi, ua fulisia papa e ia. 7O loo agalelei Ieova, o le ‘olo ia i le aso o le puapuaga; o loo silafia e ia e o faatuatua ia te ia. 8O le tafe e lofia ai na te faaumatia ai le mea o i ai le aai, e tuliloaina e le pouliuli e ua ita ia te ia.
9Se a ea se mea ua outou mafaufau ai ia Ieova? E faaumatia lava e ia; e le tupu faalua mai le puapuaga. 10E ui lava ina filia i latou e pei o laau talatala, ma latou matuā onā i le inugāuaina, a e faaumatia i latou pei o tagutugutu o saito e matuā magumagu lava. 11Ua sau mai ia te oe o ia o le ua mafaufau i mea leaga e faia ia Ieova, o le faipule amio leaga. 12O loo faapea mai Ieova, E ui lava ina atoatoa i latou, ma ua faapea ona toatele, a e faapea lava ona fāsia i latou, ona mavae atu ai lea o ia. Na a‘u faatigaina oe; a e ou te le toe faatigaina oe. 13Auā ou te gauia nei lana amo o ia te oe, ou te motusi foi ou noanoaga. 14Ua fetalai Ieova ia te oe, E le toe totōina nisi o lou igoa; ou te vavaeeseina le tupua ua ta ma le tupua uamea i le fale o ou atua; ou te fai ai lou tuugamau; auā ua leaga lava oe. 15Faauta ea, o i luga o mauga o vae o lē fai mai le tala lelei, o lē logologo mai i le manuia; Iuta e, ia e fai au tausamiga, ia e avatu mea na e tauto ai; auā e le toe ui atu lava ia te oe le tagata amio leaga; ua matuā fano o ia.
Currently Selected:
NAUMA, 1: SOV
Highlight
Share
Compare
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
