KENESE, 31
31
O LE MATAUPU XXXI.
Ua tuua e Iakopo le aiga o Lapana e toe foi atu i Kanana.
1Ua faalogo foi o ia i upu a atalii o Lapana, ua faapea ane, Ua aveesea e Iakopo o mea uma na i lo tatou tamā; o mea foi sa i lo tatou tamā ua maua ai e ia lena tamaoaiga uma. 2Ua ilo atu foi e Iakopo mata o Lapana, faauta foi, ua le fiafia mai ia te ia pei o anamua. 3Ua fetalai mai foi Ieova ia Iakopo, Ina toe foi atu ia i le nuu o ou tamā, ma lou aiga, ou te i ai foi ia te oe. 4Ua aami foi e Iakopo Rasela ma Lea, la te o mai ia te ia i le vao i lona lafu. 5Ua faapea atu foi o ia ia te i laua, Ua ou iloa nei o mata o lo oulua tamā, ua le fiafia mai ia te au pei o anamua; a o le Atua o lo‘u tamā ua ia te au ia. 6Ua oulua iloa foi ua ou auauna i lo oulua tamā i lo‘u malosi uma lava. 7Ua faa‘ole‘ole mai foi lo oulua tamā ia te au, ua faasefulu ona feliuai e ia o lo‘u totogi; a ua le tuuina atu e le Atua ia leaga ai a‘u ia te ia. 8A faapea mai o ia, O manu ilaila solo o lou totogi lea, ona fananau mai lea o manu uma i e ilaila solo; a faapea mai o ia, O e tusitusi o lou totogi lea, ona fananau mai lea o manu uma i e tusitusi. 9O lea ua aveeseina ai e le Atua o manu a lo oulua tamā, ma ua foaiina mai ia te au. 10Na oo foi i ona po e ofi ai manu, na ou vaai atu i la‘u miti, faauta foi, o manu poa e na feosofi i luga o manu, ua tusitusi, ma ilaila solo, ma pulepule i latou. 11Ua faapea mai foi le agelu a le Atua ia te au i la‘u miti, Iakopo e; ona ou tali atu lea, O a‘u lenei. 12Ona faapea mai lea o ia, Ina vaai atu ia, ma e iloa atu, o manu poa uma e feosofi i luga o manu e tusitusi, ma ilaila solo, ma pulepule i latou; auā ua ou vaai i mea uma lava ua faia e Lapana ia te oe. 13O a‘u o le Atua o Peteli, o le mea na e uuina ai le maa e fai ma faailoga, o le mea na e tauto ai le tautoga ia te au; o lenei, ina tulai ia, ina e tuua ia o lenei nuu, a e foi atu i le nuu o lou aiga. 14Ona tali mai lea o Rasela ma Lea, ua faapea mai ia te ia, E ai ea se toe vaegāoloa po o se tofi mo i maua i le aiga o lo maua nei tamā? 15E le ua avea ea i maua ma tagata ese ia te ia? Auā ua faatauina i maua e ia, ua matuā faaumatia foi e ia a maua ario. 16O le oloa uma foi ua aveeseina e le Atua na i lo maua tamā, o a maua ia, ma a maua fanau; o lenei, o mea uma ua fetalaia mai e le Atua ia te oe, ina faia ia o lea.
17Ona tulai lea o Iakopo, ua ia faatietie foi ona atalii ma ana avā i luga o kamela; 18ua ia aveesea foi ana manu uma, ma ana oloa uma ua na maua, o manu na maua e ia, na na maua i Patanarama, o le a alu i lona tamā o Isaako i le nuu o Kanana. 19Ua alu foi Lapana e sele fulufulu o ana mamoe; ua gaoi foi e Rasela o tupua o lona tamā. 20Ua sola faagaoi Iakopo ia Lapana le Suria, auā na ia le ta‘u atu ia te ia o le a sola ia. 21Ua sola lava ia, ma ana mea uma; ua ia tulai, ma laasia i le vaitafe, ma aga‘i atu i le mauga o Kiliata. 22Ua oo i le aso tolu ona ta‘u atu ai lea ia Lapana, ua sola Iakopo. 23Ona latou o lea ma ona uso, ua tuliloa ia te ia i aso e fitu; ona maua atu lea ia te ia i le mauga o Kiliata. 24Na afio ane foi le Atua ia Lapana le Suria i le miti i le po, ua faapea mai ai ia te ia, Ia oe, ne‘i e tautala ia Iakopo i se lelei po o se leaga.
25Ua maua atu foi e Lapana o Iakopo. Sa faatuina foi e Iakopo lona fale ie i le mauga; ua faatuina foi e Lapana ma ona uso o latou fale i le mauga o Kiliata. 26Ua fai atu Lapana ia Iakopo, Se a lena mea ua e faia, ina ua e sola faagaoi ia te au, ma ua e au mai o‘u afafine faatagataotaua? 27Se a le mea na e sola faalilolilo ai, ma e alu faagaoi ai ia te au; ma e le ta‘u mai ia te au, ia ou tuuina atu foi oe ma le olioli, ma pese, ma le topa, ma le kitara; 28ma e le tuu mai ia te au se‘i matou taufeasogi ma o‘u atalii ma o‘u afafine? O lenei, ua e faavalea ina ua e faia lenei mea. 29E mafai ia te au ona faaoo ia te outou se leaga; a ua fetalai mai le Atua o lo outou tamā ia te au i le po anapo, ua faapea mai, Ia oe, ne‘i e tautala ia Iakopo i se lelei po o se leaga. 30O lenei foi, ua e fia alu lava, auā ua e matuā manao i le aiga o lou tamā; a o le a le mea ua e gaoi ai i o‘u atua? 31Ona tali mai lea o Iakopo ia Lapana, ua faapea mai, Na ou sola ina ua ou fefe; auā na ou faapea, ina ne‘i e fao ou afafine ia te au. 32O le e te maua ua i ai ou atua, aua le ola ia; ia e silasila i luma o tatou uso nei i āu mea ua i te au, ma e ave e oe. Auā ua le iloa e Iakopo ua gaoia e Rasela. 33Ona ulufale atu lea o Lapana i le fale ie o Iakopo, ma le fale foi o Lea, atoa ma fale o auauna fafine e toalua, a ua le maua e ia. Ona sau lea o ia nai le fale o Lea, ma ulufale atu i le fale o Rasela. 34Na ave foi e Rasela tupua, ma tuu ai i le nofoa o le kamela, ua ia nofo ai foi i o latou luga. Ua suesue foi e Lapana i le fale uma, a ua le maua. 35Ua fai mai foi o ia i lona tamā, Aua ne‘i toatamai lo‘u alii iua ua le mafai ona ou tulai i ou luma; auā o loo ia te au le uiga o fafine. Ua ia sailiili lava, a ua le maua tupua.
36Ona ita lea o Iakopo, ua ia finau atu ia Lapana; ua fai atu Iakopo ia Lapana, ua faapea atu, Se a lo‘u leaga? Se a la‘u agasala ina ua e matuā tulituliloa mai ai ia te au? 37O lenei, ua uma ona e suesue i a‘u mea uma, o ifea se mea o mea uma a lou aiga ua e maua? Tuu mai ia iinei i luma o o‘u uso ma ou uso, ina ia latou faamasino mai ia te i taua. 38E luafulu tausaga na ou i ai ia te oe; ua le papā au mamoe fafine ma au ‘oti fafine, ua ou le ‘ai foi i mamoe poa o lou lafu. 39O le na saeia ou te lei avatua ia te oe; na ou tauia lava; o le na gaoia i le ao po ua gaoia i le po na e sue mai ia te au. 40Na faapea ai a‘u; na puapuagatia a‘u i le vevela i le ao, ma le maalili i le po; na le iloa foi sina moe e o‘u mata. 41Ua faapea ona i ai a‘u i lou aiga i ona tausaga e luafulu; na ou auauna ia te oe i tausaga e sefulu ma le fa mo ou afafine e toalua, a e ono foi tausaga mo au manu ia; ua faasefulu foi ona e feliuai lo‘u totogi. 42Ana le ia te au le Atua o lo‘u tamā, o le Atua o Aperaamo, ma le ua mata‘u i ai Isaako, po ua e aufuaina mai lava a‘u. Ua silafia e le Atua lo‘u puapuaga ma le galuega a o‘u lima, i le ua ia aoai atu ia te oe i le po anapo. 43Ona tali mai lea o Lapana ia Iakopo, ua faapea mai, O fafine nei o o‘u afafine ia, o tama nei foi o o‘u atalii ia, o manu nei foi o a‘u manu ia, o mea uma foi ua e iloa atu nei o a‘u lava ia mea; o o‘u afafine nei foi, se a se mea ou te faia ia te i laua i le aso nei, po o a la fanau ua fananau ai i laua? 44O lenei, sau ia, ina fai ia sa ta mavaega; ia fai foi lea ma molimau ia te i taua. 45Ona tago lea o Iakopo i le maa, ma faatu ai e fai ma faailoga. 46Ua fai atu foi Iakopo i ona uso, Ina faapotopoto mai ia o maa; ona au mai lea e i latou o maa, ma fai ai le faupuega; ona latou aai ai lea i luga o le faupuega. 47Ua faaigoa ai e Lapana o Ikasetuta; a ua faaigoa ai e Iakopo o Kaleta. 48Ua fai atu foi e Lapana, E fai lenei faupuega ma molimau ia te i taua i le aso nei; o le mea lea na faaigoa ai lona igoa o Kaleta; 49ma Mesepa, auā na faapea ana, Ia silasila mai Ieova ia te i taua, pe a ta te‘a eseese o oe ma a‘u. 50Afai e te agaleaga atu i o‘u afafine, pe faaopoopo i o‘u afafine nisi au ava, ua leai se tagata ia te i taua, faauta mai ea, o le Atua e sisila ia ia te i taua ma oe. 51Ua faapea atu foi Lapana ia Iakopo, Faauta mai, o lenei faupuega, faauta mai foi, o lenei faailoga, ua ou faatuina ia te i taua; 52ia fai lenei faupuega ma molimau, ia fai foi lenei faailoga ma molimau, ou te le laasia atu lenei faupuega ia te oe, e te le laasia mai foi lenei faupuega ma lenei faailoga ia te au, e fai ai se mea leaga. 53O le Atua o Aperaamo, o le Atua foi o Nakori, o le Atua o lo laua tamā, ia faamasino mai o ia ia te i taua. Ona tauto ai lea o Iakopo i lē ua mata‘u i ai lona tamā o Isaako. 54Ona fasi lea e Iakopo ni manu i le mauga, ua fai atu foi i ona uso e o mai e aai; ona latou aai ai lea, ua latou nonofo pea foi i le mauga i lea po. 55Ona tulai lea o Lapana i le taeao lava, ma taufeasogi ma ona atalii ma ona afafine, ua ia faamanuia atu foi ia te i latou; ona alu lea o Lapana ma toe foi atu i lona nuu.
Currently Selected:
KENESE, 31: SOV
Highlight
Share
Compare
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
