KENESE, 30
30
O LE MATAUPU XXX.
Ua avatu e Rasela ma Lea a la auauna ia Iakopo.
1Ua iloa e Rasela e lei fanau ia ia Iakopo, ona mataua lea o Rasela i lona uso, ua fai mai ai ia Iakopo, Au mai ia ni tama ia te au, a leai ona ou oti ai lea. 2Ona ita tele ai lea o Iakopo ia Rasela, ua na fai atu ai, O a‘u ea le sui o le Atua, o le ua le avatu ia te oe ni fanau? 3Ona fai mai ai lea o ia, Faauta, o la‘u auauna o Pila, ia e alu atu ia te ia, ona ou fai tama ai lea ia te ia, ia ou maua ni fanau mai ia te ia. 4Ona au mai ai lea e ia o lana auauna fafine o Pila ia te ia e fai mana avā, ona alu atu ai lea o Iakopo ia te ia. 5Ona to ai lea o Pila, ua fanau ai ia Iakopo le tama tane. 6Ona faapea lea o Rasela, Ua faamasinoina a‘u e le Atua, ua ia faafofoga mai foi i lo‘u leo, ma na au mai ia te au le tama tane, o le mea lea ua ia faaigoa ai ia te ia o Tanu. 7Ua toe to foi Pila le auauna a Rasela, ua fanau ai ia Iakopo lona toalua o tama tane. 8Ona faapea lea o Rasela, O fagatuaga tetele ua ou fagatua ai ma lo‘u uso, ua ou manumalo ai foi; ua ia faaigoa ai foi ia te ia o Nafatali.
9Ua iloa e Lea ua pa o ia, ona ave ai lea e ia o Selepa lana auauna, ua avatu ia Iakopo e fai ma ana avā. 10Ona fanau ai lea e Selepa le auauna a Lea le tama tane ia Iakopo. 11Ona faapea lea o Lea, O loo sau le ‘au; ua na faaigoa ai ia te ia o Kato, 12Ua toe fanau foi e Selepa le auauna a Lea lona toalua o tama tane ia Iakopo. 13Ona faapea lea o Lea, Amuia a‘u auā e faaamuia mai fafine ia te au; ua na faaigoa ai ia te ia o Asera.
14O ona po e selesele ai saito na alu atu ai Reupena, ua maua foi tutaima i le vao, ua au mai ai i lona tinā o Lea. Ona fai atu ai lea o Rasela ia Lea, Se‘i au mai ia te au nai tutaima a lau tama. 15Ona fai mai ai lea o ia ia te ia, Se mea māmā ea ina ua e fao la‘u tane? A ē fao ea foi ma tutaima a la‘u tama? Ona fai atu ai lea o Rasela, O lea foi, lua te momoe ai ma ia i le po nanei, ona o tutaima a lau tama. 16Ua sau Iakopo ai le vao i le afiafi, ona alu atu ai lea o Lea e faafetaiai ia te ia, ua faapea atu, E te alu ane ia te au, auā ua ou faatauina lava oe i tutaima a la‘u tama. Ona la momoe ai lea ma ia i lea po. 17Ua faafofoga le Atua ia Lea, ona to ai lea o ia, ua fanau e ia ia Iakopo le tama tane, o lona toalima lea. 18Ona faapea lea o Lea, Ua foai mai e le Atua lo‘u taui, auā na ou avatu la‘u auauna i la‘u tane; ua na faaigoa ai ia te ia o Isakara. 19Ua toe to foi Lea, ua fanau ai le tama tane ia Iakopo, o le toaono lea. 20Ona faapea lea o Lea, Ua foaiina mai e le Atua ia te au le oloa lelei; o lenei, o le a ma mau ma la‘u tane auā ua ou fanau tama tane e toaono ia te ia; ua na faaigoa ai ia te ia o Sepulona. 21Ua muli ai fanau e ia se tama teine, ua faaigoa ia te ia o Tina.
22Ua manatua foi Rasela e le Atua, ua faafofoga le Atua ia te ia, ua faafanauina ia. 23Ona to ai lea o ia, ua fanau le tama tane, ua faapea ai, Ua aveeseina e le Atua lo‘u luma. 24Ua na faaigoa ia te ia o Iosefa, ua faapea, E faaopoopo mai e Ieova ia te au se tasi tama tane.
25Ua fanau e Rasela o Iosefa, ona fai atu ai lea o Iakopo ia Lapana, Tuu mai ia o a‘u, ina ia ou alu i lo‘u nuu ma lo‘u laueleele. 26Tuu mai ia o a‘u avā ma a‘u fanau, sa ou auauna ai ia te oe, a ou alu; auā ua e iloa la‘u galuega ua ou auauna ai ia te oe. 27Ona fai mai ai lea o Lapana ia te ia, Afai e te alofa ia te au, ia e nofo mai pea, auā ua ou matuā iloa ua faamanuia mai a‘u e Ieova ona o oe. 28Ua faapea mai foi o ia, Ia e ta‘utino mai ia te au sou totogi; ou te avatua lava ia te oe. 29Ona fai atu ai lea o ia ia te ia, Ua e iloa le uiga o la‘u auauna atu ia te oe, ma au mea ua ia te au. 30Auā sa itiiti mea ia te oe a ou te lei sau, a ua tupu, ua matuā tele, ua faamanuia oe e Ieova ona o a‘u; a o lenei, o afea ea ou te sauni ai mea ma lo‘u lava aiga? 31Ona fai mai ai lea o ia, Se a le mea ou te avatu ia te oe? Ona fai atu ai lea o Iakopo, Aua e te au mai se mea ia te au; afai e te fai le mea nei ma a‘u, ou te toe fafaga lou lafu ma leoleo ai; 32ou te fealualuai i lou lafu uma i le aso nei, e tuu ese ai o mamoe uma e ilaila solo ma pulepule; o mamoe efuefu uma i le lafu, ma ‘oti pulepule uma, ma e ilaila solo, e fai ia mo‘u totogi. 33O le mea lea e iloa ai la‘u amiotonu i se aso, pe a oo mai lo‘u totogi i ou luma; o ‘oti uma e le ilaila solo pe pulepule, ma mamoe uma e le efuefu, e ta‘ugaoia a‘u i lea mea. 34Ona fai mai ai lea o Lapana, Ou te manao ina ia faia le mea ua e fai mai ai. 35O lea aso foi na ia tuu ese ai o ‘oti poa sa tusitusi ma pulepule, ma ‘oti fafine uma sa ilaila solo ma pulepule, atoa ma ‘oti uma lava ua i ai se ila sinasina, ma mamoe uma ua efuefu, ona tuu atu ai lea i ona atalii. 36Ua ia tuu foi le va i ala e po tolu le savaliga i lo la va ma Iakopo; a e leoleoina e Iakopo le toe lafu o Lapana.
37Ona ave ai lea e Iakopo o tatupu o le lipene mata, ma le lusa, ma le aremoni, na ia fofoe ai le pa‘u ia pulepule sisina laau. 38Ua ia faatutuina laau na na fofoe i mea faaliu, o mea ia e inu ai vai, i luma o le lafu, ina ua o atu le lafu e feinu ai, ina ia ofi ai le lafu pe a o atu e inu. 39Ona ofi ai lea o le lafu i luma o laau, ua fananau ai o manu tusitusi, ma ilaila solo, atoa ma e pulepule. 40Ua tuu ese e Iakopo tamai mamoe, ua na faasaga atu foi mata o le lafu i manu tusitusi, ma manu efuefu uma i le lafu o Lapana; ona tuu ese ai lea e ia lona lava lafu, a e lei tuu faatasi ma le lafu o Lapana. 41Ua oo ina a ofi manu malolosi ona tuu ai lea e Iakopo o laau i mea e inu ai i luma o manu, ina ia ofi ai i luma o laau. 42A e peitai o manu ua vaivai, ua ia le tuu ai laau, ona fai ai lea o manu vaivai ma Lapana, a o e malolosi ua fai ia mā Iakopo. 43Ua matuā faateleina lava mea a lea tagata, na ia te ia mamoe e tele, ma auauna fafine, ma auauna tane, ma kamela, atoa ma asini.
Currently Selected:
KENESE, 30: SOV
Highlight
Share
Compare
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
