มาโค 4
4
ฮ์า ญิม เญย หว่า-เป๊ย
(เป๊ย หมั่ง มัดทาย 13:1-9; ลูกา 8:4-8)
1แอ๋ง ม่าย หฑุ่น เยซู เยียม กาลิลี ค้อย-ตอน เฮลน เจี์ย กอน หฌาว เมี่ยน. เมี่ยน ธั้ม! ไห่ เว่ย เจี๊ยน นิ่น, นิ่น ฯฒฯ เปียะ โผว ฑั้ง เฒว์ย เจี๊ยน, แฑง เจี๋ย มี่ง เต๋ย. หฒวัง เมี่ยน เยียม วั้ว เบี๋ยน.#ลูกา 5:1-3 2นิ่น หล่ง หว่า-เป๊ย หฌาว ธั้ม-หญู่ง นิ่น บัว. หฌาว วั้ว หฒั่น นิ่น ก๊อง,
3“หมวัง โอ่, ม่าย ล่าน เมี่ยน ธ้วด มี่ง ฮ์า ญิม. 4ฮ์า เญย เฒี่ยง โห่, ม่าย เต๋ย ญิม ด๊อด หฒุ เจ๊า. เหนาะ ต้าย หญั่น เหฑ่ง หมี่ อ๊ะ. 5ม่าย เต๋ย ญิม ด๊อด หฒุ หละเปย๊ย-หล่ม, ไม้ ม่าย เนีย ธั้ม เญย ต๋อง. เนีย ไม้ โฮ์, ญิม ฯฒฯ กุ ญ่า เซี้ยบ. 6หญุด ธ้วด ต้าย โตะ ฯฒฯ พุย เหญา เหฑ่ง เหว่ย หฒุ ฑู่ง ไม้ โด. 7ม่าย เต๋ย ญิม ด๊อด หฒุ ฌิ้ม-หล่ม. ฌิ้ม โฮล ต้าย บย์อง เจี๊ยน, ไม้ ไฮ่ เฒี่ยง ญิม. 8ม่าย เต๋ย ญิม ด๊อด หฒุ เดา-หลง, ธ้วด ต้าย เฒี่ยง ตุ๊ กิ๊ด. ม่าย เต๋ย เหยียด โก๊ว ตุ๊ ฟ่า เหฒียบ โก๊ว, ม่าย เต๋ย ตุ๊ หลัวะ เหฒียบ โก๊ว, ม่าย เต๋ย ตุ๊ เหยียด แป๊ะ โก๊ว.”
9เยซู หย่า ก๊อง, “หาย เต้า ม่าย มน่อม อ๋อย หฒุ แปง มน่อม หมวัง หลง.”
เยซู เหว่ย หาย ติ่ว หล่ง หว่า-เป๊ย หฌาว
(เป๊ย หมั่ง มัดทาย 13:10-17; ลูกา 8:9-10)
10หฒวัง เมี่ยน หฑวน เหฑ่ง, วั้ว เต๋ย เหฒียบ เหญ่ย เต้า ไซ-ก๋อ เหธา เต๋ย กัน เยซู เญย เมี่ยน โท้ เยซู พ้อ เม่ง วั้ว ติ้ว หว่า-เป๊ย เญย เอ๋ย เล์ย. 11เยซู เตา, “ทิน-ฮู่ง โหฒว เฒี้ยว กุ๊น เมี่ยน วั้ว เต๋ย เกม เจี๊ยน เญย สี่ ทิน-ฮู่ง ปุน เม่ย บัว ฮิ้ว หมี่ อ๊ะ. มป่า กะเหญี่ย เญย เมี่ยน ขูง ไฮ์ น้าย เต๋ย เหยียด ฒู้ง สี่ เป๋น หว่า-เป๊ย ฮนั้ง. 12เหว่ย น้าย,
‘นิ่น บัว ด่ง หาย หมั่ง หย่า หมั่ง ไม้ ปวัด,
ด่ง หาย หมวัง หย่า หมวัง ไม้ เปียะ เฮญี้ยว.
สี ก๊อง นิ่น บัว เม่ง แปะ นอ,
เหฑีย นิ่น บัว ไฮ่ ก๊อย เฮญี้ยว ล์อ ทิน-ฮู่ง.
ทิน-ฮู่ง ฯฒฯ กวั่ง นิ่น บัว เญย ฒุ์ย.’”#อิสะยา 6:9-10
เยซู ก๊อง เม่ง ฮ์า ญิม เญย หว่า-เป๊ย
(เป๊ย หมั่ง มัดทาย 13:18-23; ลูกา 8:11-15)
13เยซู แอ๋ง หน่าย นิ่น บัว, “เม่ย บัว ไม้ เม่ง แปะ น้าย ติ้ว หว่า-เป๊ย ไฟ? วั้ว หญู่ง, เม่ย บัว ฮนั้ง หาย นอ ไฮ่ เม่ง แปะ กั้น ติ้ว? 14ฮ์า ญิม เญย เมี่ยน ฮ์า เญย ญิม เซ ทิน-ฮู่ง เญย คู้ เฝียน.#4:14 ไฟ ทิน-ฮู่ง เญย โต์ ไฟ ทิน-ฮู่ง เญย หว่า. 15ม่าย เต๋ย เมี่ยน เซ ฮนั้ง ด๊อด หฒุ เจ๊า วั้ว เต๋ย ญิม นอ. เมี่ยน ไฮ์ ลิ์ว คู้ เฝียน, ซาตาน เลี่ยม เฒ่ย ต้าย เฒาะ เยียม เฮญี้ยว วั้ว เต๋ย คู้ เฝียน ธ้วด หมี่ อ๊ะ. 16แอ๋ง ม่าย เต๋ย เมี่ยน เซ ฮนั้ง ด๊อด หฒุ หละเปย๊ย-หล่ม เญย ญิม. เยี้ยด ไฮ์ ทิน-ฮู่ง เญย คู้ เฝียน ฯฒฯ อะเฮน้ย ฒิบ. 17มป่า เซ ฮนั้ง คู้ เฝียน เหฌี่ย ฑู่ง ไม้ โด, เสียน ไม้ เล่า. นิ่น บัว หลาย คู้ เฝียน ปวั้ง หฒุ สี่ ไฟ หฒุ เมี่ยน โหฒว โตะ, นิ่น บัว ฯฒฯ ธ้วด หมี่ อ๊ะ. 18ม่าย เต๋ย เมี่ยน หย่า ฮนั้ง ฮ์า ด๊อด หฒุ ฌิ้ม-หล่ม วั้ว เต๋ย ญิม. นิ่น บัว ไฮ์ ทิน-ฮู่ง เญย หว่า, 19มป่า หลาย เสย หฒั่ง เญย เจ๊า ขวน เฮญี้ยว ไฟ หลาย ฮนั้ม ฒิ่น ญ่าน, ไฟ หลาย เม้า อ๋อย ตุ๊ หญู่งๆ กะน้าย, บย์อง เจี๊ยน ทิน-ฮู่ง เญย หว่า, ญิม ฯฒฯ ไม้ ไฮ่ เจ้า อ๊ะ. 20มป่า ม่าย เต๋ย เมี่ยน ฮนั้ง ด๊อด หฒุ เดา-หลง วั้ว เต๋ย ญิม. นิ่น บัว ไฮ์ ทิน-ฮู่ง เญย หว่า ฯฒฯ ฒิบ ต้าย, หย่า เฒี่ยง ตุ๊ กิ๊ด. ม่าย เต๋ย เหยียด โก๊ว ตุ๊ ฟ่า เหฒียบ โก๊ว, ม่าย เต๋ย ตุ๊ หลัวะ เหฒียบ โก๊ว, ม่าย เต๋ย ตุ๊ เหยียด แป๊ะ โก๊ว.”
เตี๊ยม ตัง เฒาะ ท้ง ฆบ เจี๊ยน ไฟ?
(เป๊ย หมั่ง ลูกา 8:16-18)
21เยซู แอ๋ง บั๋ว นิ่น บัว, “ม่าย หาย เต้า เตี๊ยม เหฒียะ ตัง เฒาะ ท้ง ฆบ เจี๊ยน ไฟ ตน โหธว-เดี๊ย? นิ่น ไม้ เฒ์ย เฒาะ ตัง ตน เจี๊ยน ตัง เญย ป้าย ไฟ?#มัดทาย 5:15; ลูกา 11:33 22ไม้ กุ๊น ม่าย หาย หญู่ง ปี๋ง เจี๊ยน มป่า อ๋อย ธ้วด ต้าย. ไม้ กุ๊น ม่าย หาย หญู่ง เกม เจี๊ยน มป่า อ๋อย บย๋าง ย่าง ธ้วด ต้าย.#มัดทาย 10:26; ลูกา 12:2 23หาย เต้า ม่าย มน่อม อ๋อย หฒุ แปง มน่อม หมวัง หลง โอ่.”
24นิ่น หย่า บั๋ว นิ่น บัว, “เม่ย บัว อ๋อย หฒุ หล่ง เฮญี้ยว หมวัง หลง. เม่ย บัว หล่ง หาย หญู่ง ฮลาว ปุน เมี่ยน, ทิน-ฮู่ง หย่า หล่ง วั้ว หญู่ง ฮลาว ปุน เม่ย บัว, ฒู้ง จา เก้า ธั้ม เต๋ย.#มัดทาย 7:2; ลูกา 6:38 25เหว่ย หฒุ หาย เต้า ม่าย เญย, นิ่น อ๋อย จา ตุ๊ เก้า ธั้ม. หาย เต้า ไม้ ม่าย, เลี่ยม นิ่น ม่าย ติ๊ เตียน, ฒู้ง อ๋อย หฒุ เฒาะ มี่ง.”#มัดทาย 13:12; 25:29; ลูกา 19:26
ญิม กุ ญ่า เญย หว่า-เป๊ย
26เยซู ก๊อง เจี๊ยน มี่ง. “ทิน-ฮู่ง โหฒว เฒี้ยว กุ๊น เมี่ยน เซ ฮนั้ง ล่าน เมี่ยน มี่ง ฮ์า ญิม วั้ว เด่ย.#4:26 เป๊ย หมั่ง มัดทาย 13:24. 27ลู่ง ม์วน หฒั่น นิ่น เปว๋ย มฌ่อม. ลู่ง ฮนอย หฒั่น เจี์ย ซิน โหฒว กง, มป่า ญิม กั้น กุ ญ่า โฮล ต้าย. วั้ว ล่าน เมี่ยน หย่า ไม้ ฮิ้ว ตุ๊ ญิม ฮนั้ง หาย นอ ไฮ่ โฮล. 28เดา กั้น ปุน ญิม ธ้วด, ปุน กะน้าย โฮล ต้าย เฒี่ยง ญิม. ตะเยี้ยด ปวัด ธ้วด มิ่ว, โฮล ต้าย ฯฒฯ เปา, แอ๋ง ธ้วด เบย้า ต๊อ เจ้า เญย. 29เบย้า หฒัวะ เญย เฒี่ยง โห่, วั้ว ล่าน เมี่ยน ฯฒฯ หล่ง นิ่น เญย ลิ่ม เงา มี่ง ก๊าด, เหว่ย หฒุ เซียว เบย้า เญย เฒี่ยง โห่ เถา อ๊ะ.”#โยเอน 3:13
ไล-จ๋าย ญิม เญย หว่า-เป๊ย
(เป๊ย หมั่ง มัดทาย 13:31-32,34; ลูกา 13:18-19)
30เยซู หน่าย, “ทิน-ฮู่ง โหฒว เฒี้ยว กุ๊น เมี่ยน เซ ฮนั้ง หาย นอ? บัว อ๋อย หฒุ หล่ง หาย หญู่ง หว่า-เป๊ย หธีง ต้าย เป๊ย ตุ๊ หฒุ? 31เซ เป๊ย นอม ไล-จ๋าย ญิม หฒวัง เหฌี่ย เดา. เยียม ลู่ง เดี๊ย, ไล-จ๋าย ญิม เก้า ไฝ เจี๋ย. 32หฒวัง เหฌี่ย เดา หฒุน ธ้วด โฮล ต้าย, เก้า โฮล เจี๋ย หญู่งๆ ไล.#4:32 เป๊ย หมั่ง มัดทาย 13:32. ฆว่า หย่า โฮล, เหนาะ ฒู้ง ต้าย โหฒว เล์า ปี๋ง ล่าง.”
33เยซู แอ๋ง หล่ง น้าย หญู่ง หว่า-เป๊ย ฒุ่น โต์ ปุน หฒวัง เมี่ยน หมวัง. หฒิว เมี่ยน ไฮ่ เม่ง แปะ เญย, นิ่น ก๊อง ปุน นิ่น บัว หมวัง. 34นิ่น ขูง หล่ง หว่า-เป๊ย หฌาว นิ่น บัว ฮนั้ง. กั้น หญู่ง หว่า นิ่น ไม้ หล่ง. มป่า ขูง นิ่น กั้น เหธา นิ่น เญย ไซ-ก๋อ บัว เยียม เญย เฒี่ยง โห่, นิ่น พ้อ เม่ง หญู่งๆ ปุน นิ่น บัว หมวัง.
เยซู หัด ต้ม หฑยาว ตี้ง
(เป๊ย หมั่ง มัดทาย 8:23-27; ลูกา 8:22-25)
35ต้ง วั้ว ฮนอย ลู่ง ม์าน-หฮมวัง, เยซู บั๋ว ไซ-ก๋อ, “บัว มี่ง วั้ว หง่าน หฒิ ค้อย-ตอน เอาะ?” 36นิ่น บัว ฯฒฯ เล่ย ฆอย หฒวัง เมี่ยน, เปียะ เยซู เฒว์ย เจี๊ยน วั้ว โผว ฑั้ง, ต้อ นิ่น มี่ง หมี่ อ๊ะ. แอ๋ง ม่าย เต๋ย ฑั้ง กัน เจี๊ยน มี่ง. 37มี่ง เกา, เลี่ยม เฒ่ย ป์อง กอง ต้ม หฑยาว, ป่วน ววม เจี์ย หล่าง ฆ์ม เปียะ ฑั้ง. ววม อ๊า ลั่ม ปวั๊ง ฑั้ง อ๊ะ. 38มป่า เยซู เยียม ฑั้ง-เตว๊ย ฑ์ม เจี๊ยน ฑ์ม-เต้า มฌ่อม. ไซ-ก๋อ มี่ง เห่ว นิ่น เญีย หย่า ก๊อง, “ไซ-เตี๋ย อ้า! ไซ-เตี๋ย! บัว ด๊อด ววม ไต่ เหฑ่ง อ๊ะโล่ะ! เม่ย ไม้ เฑ่า ไฟ?” 39เยซู เจี์ย ซิน ต้าย หัด หฑยาว หย่า หัด ววม-หล่าง, “ตี้ง อ๊ะ!” หฑยาว ฯฒฯ เสี่ยน หมี่ อ๊ะ. ววม-หล่าง หย่า ตี้ง. เซ้ก เหฑ่ง หมี่ อ๊ะ. 40เยซู หน่าย ไซ-ก๋อ, “เม่ย บัว เหว่ย หาย ติ่ว กั้ม เหฑีย? เม่ย บัว หธ่อ ไม้ เสียน เขา เยีย?”
41ไซ-ก๋อ บัว เก้ง! กั้ม เหฑีย ไห่. ล่าน ฯฒฯ หน่าย ล่าน, “น้าย ล่าน เมี่ยน หาย เต้า เอ้าะ? เลี่ยม หฑยาว เหธา ววม-หล่าง หย่า หมวัง นิ่น เญย หว่า.”
Currently Selected:
มาโค 4: IuMiTH
Highlight
Copy
Compare
Share
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
