มาโค 2
2
เยซู หฒ่อ หลง ปุ๊ด แป่ง-ไบ เญย เมี่ยน
(เป๊ย หมั่ง มัดทาย 9:1-8; ลูกา 5:17-26)
1เจี๋ย ลิ์ว อี เหฒีย ฮนอย, เยซู แอ๋ง หฑวน คาเปนาอุม มู้ง. หฒวัง เมี่ยน ไฮ์ ก๊อง เยซู เยียม เปย๊า เญย. 2เมี่ยน ธั้ม! ไห่ กั๊บ ฒุ้น ต้าย ฯฒฯ ปวั๊ง เปย๊า เหฑ่ง. เลี่ยม แก้ง ด่าง หย่า ไม้ ม่าย ต๋อง ขูง. เยซู ฒุ่น โต์ ปุน หฒวัง เมี่ยน หมวัง วั้ว หฒั่น, 3ม่าย เปยย เต้า เมี่ยน แกง เต้า ปุ๊ด แป่ง-ไบ เมี่ยน ต้าย ล์อ เยซู. 4มป่า เมี่ยน ธั้ม ไห่, ไม้ หน่อย ตุ๊ แป่ง เมี่ยน เถา เยซู เญย หฑะเฮมียน. นิ่น บัว ฯฒฯ แธะ ทง เปย๊า-ง่อ ต๋อย เหฒียง เยซู เยียม วั้ว นอม ต๋อง กู้ หงว่าย. แธะ ทง มี่ง, นิ่น บัว ฯฒฯ เฒาะ แป่ง เมี่ยน เปว๋ย เจี๊ยน จิ่ว ปู๋ง เหฌี่ย. 5เยซู ปวัด น้าย เต๋ย เมี่ยน เสียน ตุ๊ หลง, นิ่น ฯฒฯ บั๋ว ปุ๊ด แป่ง-ไบ เมี่ยน, “ตอน อ่า, เม่ย เญย ฒุ์ย ตุ๊ กวั่ง ลิ์ว อ๊ะ.”
6ม่าย เต๋ย หฌาว เล์ย เญย ฟิน-แซง เฒว์ย เจี๊ยน วั้ว, เยียม เฮญี้ยว ฮนั้ม, 7“น้าย เต้า เมี่ยน ฝู่ง ฮนั้ง น้าย นอ ก๊อง แล่? นิ่น ขูง ก๊อง คี ทิน-ฮู่ง ฮนั้ง. ธ้วด ลิ์ว ทิน-ฮู่ง, ไม้ ม่าย หาย เต้า กวั่ง ตุ๊ เมี่ยน เญย ฒุ์ย.”
8เยซู เลี่ยม เฒ่ย ฮิ้ว ตุ๊ นิ่น บัว ฮนั้ง หาย นอ ฮนั้ม, นิ่น ฯฒฯ บั๋ว นิ่น บัว, “เม่ย บัว เญย เฮญี้ยว เหว่ย หาย ติ่ว ฮนั้ง น้าย นอ ฮนั้ม? 9บั๋ว แป่ง-ไบ เมี่ยน, ‘เม่ย เญย ฒุ์ย ตุ๊ กวั่ง ลิ์ว อ๊ะ.’ ไฟ ‘เจี์ย ซิน ต้าย, ต้อ เจี๊ยน เม่ย เญย จิ่ว มี่ง อ๊ะ.’ น้าย เต๋ย อี โจ๋ว หว่า, หาย โจ๋ว เก้า เห่ ตุ๊ ก๊อง? 10มป่า เยีย อ๋อย ปุน เม่ย บัว ฮิ้ว ตุ๊ เยีย, ป้าม เมี่ยน เญย ตอน, เยียม น้าย ป้าม เกน ม่าย หัด ม์า กวั่ง ฒุ์ย.” นิ่น ฯฒฯ บั๋ว หน่าย เต้า ปุ๊ด แป่ง-ไบ เญย เมี่ยน, 11“เยีย บั๋ว เม่ย, เจี์ย ซิน ต้าย, ต้อ เจี๊ยน เม่ย เญย จิ่ว หฑวน เปย๊า อ๊ะ.”
12หฒวัง เมี่ยน หมั่ง เจี๊ยน วั้ว หฒั่น, น้าย เต้า เมี่ยน เลี่ยม เฒ่ย เจี์ย ซิน ต้าย ต้อ เจี๊ยน นิ่น เญย จิ่ว ธ้วด หมี่ อ๊ะ. นิ่น บัว เหยียด ฒู้ง บัวะ ฮ่อง ไห่ ฯฒฯ เธง ทิน-ฮู่ง. นิ่น บัว ก๊อง, “เยีย บัว เก้ง! ไม้ ปวัด เจี๋ย น้าย หญู่ง สี่.”
เยซู เห่ว เลวี ต้าย โหฒว ไซ-ก๋อ
(เป๊ย หมั่ง มัดทาย 9:9-13; ลูกา 5:27-32)
13เยซู แอ๋ง ธ้วด มี่ง วั้ว กาลิลี ค้อย-ตอน เฮลน. ม่าย เมี่ยน ธั้ม เญย มี่ง นิ่น วั้ว, เยซู ฯฒฯ หฌาว นิ่น บัว. 14เยซู แอ๋ง เจี๋ย มี่ง เต๋ย, ปวัด เต้า เซียว โฑว เมี่ยน, เซ อันเฟอัด เญย ตอน, เลวี,#2:14 เลวี แอ๋ง ม่าย นอม บั๋ว เห่ว มัดทาย. เป๊ย หมั่ง มัดทาย 9:9. เฒว์ย เจี๊ยน วั้ว เซียว โฑว หฒ่าม ฯฒฯ ก๊อง บั๋ว นิ่น, “ต้าย กัน เยีย โอ่.” เลวี ฯฒฯ เจี์ย ซิน กัน เจี๊ยน เยซู มี่ง อ๊ะ.
15เยซู เยียม เลวี เญย เปย๊า หญั่น หฮนาง วั้ว หฒั่น, ม่าย เถง โลมา ฮู่ง จา เซียว โฑว เญย เมี่ยน เหธา เม่ง เต้า หว่าย เญย เมี่ยน#2:15-17 เป๊ย หมั่ง มัดทาย 9:10. ธั้ม เญย กัน เยซู. ม่าย เต๋ย น้าย เต๋ย เมี่ยน หย่า ต้าย เหธา เยซู เหธา นิ่น เญย ไซ-ก๋อ บัว จวั่ง เตี้ย หญั่น หฮนาง. 16ม่าย เต๋ย ฟิน-แซง, ต้ง ฟาลิสี วั้ว เจ๊า เมี่ยน, ปวัด เยซู เหธา เม่ง เต้า หว่าย เหธา เซียว โฑว เญย เมี่ยน จวั่ง เตี้ย หญั่น หฮนาง. นิ่น บัว ฯฒฯ หน่าย นิ่น เญย ไซ-ก๋อ, “นิ่น เหว่ย หาย ติ่ว เหธา เซียว โฑว เญย เมี่ยน เหธา เม่ง เต้า หว่าย เญย เมี่ยน หญั่น หฮนาง?”
17เยซู ไฮ์ นิ่น บัว ฮนั้ง น้าย นอ ก๊อง, นิ่น ฯฒฯ เตา, “หวั่ง เสียง เญย เมี่ยน ไม้ เฉียม หฒุ เดีย-ไซ. ขูง ปุ๊ด-แป่ง เมี่ยน ฮนั้ง เฉียม หฒุ เดีย-ไซ. เยีย ไม้ เฒ์ย ต้าย เห่ว คู้ เมี่ยน. เยีย ต้าย เห่ว เม่ง เต้า หว่าย เญย เมี่ยน.”
เมี่ยน หน่าย เฒย ไม้ หญั่น หาย หญู่ง เญย เจ๊า
(เป๊ย หมั่ง มัดทาย 9:14-17; ลูกา 5:33-39)
18ม่าย หฑุ่น เถง เมี่ยน เจี๋ย ววม เญย เล์ย วั้ว เต้า โยฮัน เญย ไซ-ก๋อ เหธา ฟาลิสี เมี่ยน เฒย ไม้ หญั่น หาย หญู่ง. ม่าย เต๋ย เมี่ยน ต้าย หน่าย เยซู, “เถง เมี่ยน เจี๋ย ววม เญย เล์ย วั้ว เต้า โยฮัน เหธา ฟาลิสี เมี่ยน เญย ไซ-ก๋อ เฒย ไม้ หญั่น หาย หญู่ง. เม่ย เญย ไซ-ก๋อ เหว่ย หาย ติ่ว ไม้ เฒย?”
19เยซู เตา, “เซียง-ล่าง หธ่อ เยียม เจี๊ยน ธีง-จา-ยิ่น เญย เฒี่ยง โห่, เซียง-ล่าง เญย แคะ เมี่ยน ไฮ่ เฒย ไม้ หญั่น หาย หญู่ง ไฟ? ตะฟ่าน เซียง-ล่าง หธ่อ เหธา นิ่น บัว เยียม, แคะ เมี่ยน ฯฒฯ ไม้ เฒย อ๊ะ. 20มป่า ฮนอย-เหญียะ อ๋อย เถา, เซียง-ล่าง หฒุ ต้อ มี่ง หมี่ อ๊ะ. เถา วั้ว หฒั่น แคะ เมี่ยน หธีง ต้าย เฒย ไม้ หญั่น หาย หญู่ง.
21“ไม้ ม่าย หาย เต้า หล่ง เซียง-เดีย เบี๊ย โล์-ลุย. หล่ง เซียง-เดีย นอ, เซียง-เดีย ไฮ่ โซะ, เป๊ด โล์-เดีย ปุน เบี๊ย เญย ต๋อง จา ฮู้ โฮล. 22หย่า ไม้ ม่าย หาย เต้า เฒาะ เซียง-อะหงุ่น ติ๊ว ตั๊บ โล์-ด๊บ-บัวะ. ตั๊บ โล์-บัวะ นอ, ติ๊ว ไฮ่ หฒูง ด๊บ-บัวะ บ๋าย, เฒียง หน่าย ธ้วด เหฑ่ง. บัวะ หย่า ฮู้ หมี่ อ๊ะ. เซียง-อะหงุ่น ติ๊ว อ๋อย หฒุ ตั๊บ เซียง-ด๊บ-บัวะ.”
เมี่ยน แฑง ตี้ง กง ฮนอย เญย เล์ย
(เป๊ย หมั่ง มัดทาย 12:1-8; ลูกา 6:1-5)
23ม่าย นอม ตี้ง กง ฮนอย, เยซู เจี๋ย เมี่ยน เญย เบย้า เด่ย. กัน เจ๊า มี่ง วั้ว หฒั่น, นิ่น เญย ไซ-ก๋อ เนี้ยด เบย้า ต๊อ.#หฑั่ม เล์ย-หลัด 23:25 24ฟาลิสี เมี่ยน ฯฒฯ บั๋ว เยซู, “หมั่ง ก๋า, เอย บัว เญย เล์ย, ตี้ง กง ฮนอย ไม้ หอบ หฒุ ฮนั้ง น้าย นอ โหฒว. เม่ย เญย ไซ-ก๋อ เหว่ย หาย ติ่ว โหฒว?”
25เยซู เตา, “เม่ย บัว ไม้ โตะ เจี๋ย น้าย เต๋ย เจ๊า ไฟ? ดาวิด ฮู่ง เหธา กัน นิ่น วั้ว เต๋ย เมี่ยน เฮญี้ยว เซีย, เฉียม หฒุ หญั่น เญย เฒี่ยง โห่, นิ่น บัว ฮนั้ง หาย นอ โหฒว?#1 ซามูเอน 21:1-6 26ต้ง อาบียาทา โหฒว ต้ม ไซ เมี่ยน เญย เฒี่ยง โห่, ดาวิด เปียะ หฒั่ง ทิน-ฮู่ง เญย ด๊บ-ลิ่ว เฒาะ เก๋ง ทิน-ฮู่ง เญย ฌั้ว หญั่น. ขูง ไซ เมี่ยน กั้น ม่าย เล์ย หญั่น ฮนั้ง.#เลวี 24:9 มป่า ดาวิด หญั่น หย่า ปุน กัน นิ่น วั้ว เต๋ย เมี่ยน เหธา เจี๊ยน หญั่น.”
27เยซู บั๋ว นิ่น บัว, “ทิน-ฮู่ง เหลียบ ตี้ง กง ฮนอย ต้าย เถง เมี่ยน, ไม้ เฒ์ย เหฒย เมี่ยน ต้าย เหว่ย ตี้ง กง ฮนอย. 28เหว่ย น้าย, เยีย, ป้าม เมี่ยน เญย ตอน, โหฒว ตี้ง กง ฮนอย เญย เฒี้ยว.”
Currently Selected:
มาโค 2: IuMiTH
Highlight
Copy
Compare
Share
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
