1 ซามูเอน 14
14
โยนาทาน เบ๊าะ ฟีลิสะเตีย เมี่ยน
1ม่าย ฮนอย เซาโล เญย ตอน, โยนาทาน, ก๊อง บั๋ว เถง นิ่น ต้อ เบ๊าะ จ๋า เญย หวัวะ กิ่น วั้ว เต้า เมี่ยน หลุน เมี่ยน, “ต้าย ม่าะ! บัว เจี๋ย วั้ว หง่าน ฟีลิสะเตีย เมี่ยน เญย เธี้ยง.” มป่า นิ่น ไม้ บั๋ว นิ่น เญย เตีย.
2วั้ว หฒั่น เซาโล เยียม กิเบอา ฒี่ง เฮลน, มิโกน เต่ย เญย เหยียด ฒู่ง หฒิ เลี่ยว เดี๋ยง#14:2 น้าย หญู่ง เดี๋ยง เญย เปี๊ยว จั๋น-ไท้ เห่ว ทับทิม. กะเดี๊ย. กัน นิ่น เญย เมี่ยน ม่าย เล่ย ไม้ โก หลัวะ แป๊ะ เต้า. 3เยียม วั้ว เต๋ย เมี่ยน กะญั์ว ม่าย อาหิยา ฒุ เจี๊ยน เอโฟ้ด. อาหิยา เซ อีคาโบด เญย ก๋อ, อาหิทู้บ เญย ตอน, ฟีเนหัด เญย ฟุน, เอลี ไซ เมี่ยน เญย ฟะ. ฒิ่น ด่าง เอลี เยียม ซีโล โหฒว เฒี้ยว เญย ไซ เมี่ยน. วั้ว เต๋ย เมี่ยน ฒู้ง ไม้ ฮิ้ว ตุ๊ โยนาทาน มี่ง หมี่ อ๊ะ.
4โยนาทาน อ๋อย ยั่ง เจี๋ย บง-ฉัง วั้ว ติ้ว เจ๊า มี่ง เถา ฟีลิสะเตีย เมี่ยน เญย แปง เญย เธี้ยง. วั้ว ติ้ว เจ๊า อี ปูง เจ๊า-เฮลน, เหยียด ปูง ม่าย นอม ต้ม แบ๋ง-ธิด. ม่าย นอม เห่ว โบเซ้ด, ม่าย นอม เห่ว เสเน. 5เหยียด นอม แบ๋ง-ธิด เยียม ป๊ะ ปูง นิด มิกม้าด. ม่าย นอม เยียม น่าม ปูง นิด เกบา วั้ว ปูง.
6โยนาทาน ก๊อง บั๋ว เถง นิ่น ต้อ เบ๊าะ จ๋า เญย หวัวะ กิ่น วั้ว เต้า เมี่ยน หลุน เมี่ยน, “ต้าย ม่าะ! บัว เจี๋ย มี่ง ล์อ ต้ง ไม้ เจี๋ย ก๊าด เญย เล์ย วั้ว เต๋ย แปง เญย เธี้ยง. เหฑีย เฒี้ยว อ๋อย เถง บัว, เหว่ย หฒุ ไม้ ม่าย หาย หญู่ง ไฮ่ ตั๊ง ตุ๊ เจี๊ยน เฒี้ยว. ไม้ กุ๊น เมี่ยน ธั้ม ไฟ โหฒะ นิ่น ฒู้ง ไฮ่ เถง บัว ฮี่ง.”
7เถง นิ่น ต้อ หวัวะ กิ่น วั้ว เต้า ก๊อง บั๋ว นิ่น, “หฒิว เม่ย เญย เฮญี้ยว ปวัด หอบ หฒุ โหฒว เญย, กุ๊น โหฒว อ๊ะ. เยีย กัน เม่ย. เม่ย เญย เฮญี้ยว ฮนั้ง หาย นอ, เยีย หย่า ฮนั้ง วั้ว นอ.”
8โยนาทาน ก๊อง, “บัว เจี๋ย เถา วั้ว เต๋ย เมี่ยน วั้ว หย่า ปุน นิ่น บัว ตุ๊ ปวัด บัว. 9สี ก๊อง นิ่น บัว ก๊อง บั๋ว บัว, ‘ฒั้ว เยีย บัว มี่ง เม่ย บัว หน่าย,’ บัว ฯฒฯ โซ้ว ตี่ง บัว เยียม เญย ต๋อง, ไม้ มี่ง นิ่น บัว วั้ว. 10มป่า สี ก๊อง นิ่น บัว ก๊อง, ‘กุ๊น ฝาว ต้าย เยีย บัว น้าย ม่าะ!’ บัว ฯฒฯ มี่ง วั้ว อ๊ะ, เหว่ย หฒุ เฒี้ยว เฒาะ นิ่น บัว จิว ปุน เยียม บัว เญย ปั์ว-เดี๊ย หมี่ อ๊ะ. น้าย เต๋ย สี่ ฯฒฯ เหว่ย บัว โหฒว จั๋ง-โห่.”
11นิ่น บัว อี เต้า ฯฒฯ ธ้วด ต้าย ปุน ฟีลิสะเตีย แปง เญย เธี้ยง วั้ว เต๋ย แปง ปวัด. ฟีลิสะเตีย เมี่ยน ก๊อง, “หมั่ง ม่าะ! ฮิบลู เมี่ยน เยียม นิ่น บัว ปี๋ง เญย ค้วด ธ้วด ต้าย อ๊ะ.” 12เยียม หฒ่าม เญย แปง ฯฒฯ เห่ว โยนาทาน เหธา เถง นิ่น ต้อ หวัวะ กิ่น วั้ว เต้า ตอน. นิ่น บัว ก๊อง, “ฝาว เยีย บัว น้าย ต้าย ม่าะ! เยีย บัว ม่าย หว่า อ๋อย บั๋ว เม่ย บัว.”#14:12 ไฟ “เยีย บัว ม่าย หญู่ง อ๋อย ปุน เม่ย บัว หมั่ง”.
โยนาทาน ฯฒฯ ก๊อง บั๋ว เถง นิ่น ต้อ หวัวะ กิ่น วั้ว เต้า ตอน, “เม่ย กัน เยีย ฝาว ม่าะ! เหว่ย หฒุ เฒี้ยว เฒาะ นิ่น บัว จิว ปุน เยียม อิสะลาเอน เมี่ยน เญย ปั์ว-เดี๊ย หมี่ อ๊ะ.”
13โยนาทาน ฯฒฯ ญอง เจี๊ยน ฝาว มี่ง. เถง นิ่น ต้อ หวัวะ กิ่น วั้ว เต้า หย่า กัน เจี๊ยน นิ่น มี่ง. โยนาทาน ไต๋ ฟีลิสะเตีย เมี่ยน เยียม นิ่น เญย หฑะเฮมียน คีง เหฌี่ย. เถง โยนาทาน ต้อ หวัวะ กิ่น วั้ว เต้า ตอน หย่า เถง เจี๊ยน นิ่น ไต๋. 14โยนาทาน เหธา เถง นิ่น ต้อ หวัวะ กิ่น วั้ว เต้า เมี่ยน ไต๋ ต้าว หฑุ่น ฟีลิสะเตีย เมี่ยน ม่าย เล่ย ไม้ โก หญี่ เหฒียบ เต้า เมี่ยน เยียม ด่ง เหยียด ต๋อย ง่ง ไล่ เหยียด อ๋าน เญย เดา จั๊ง กะญั์ว.
15เยียม เธี้ยง กะญั์ว, เยียม เด่ย, เยียม หฒวัง เมี่ยน บุด๋ง หลุ่น เหฑ่ง. เยียม โก๋ว เต่ย-ปูง แปง เญย หฒ่าม, เลี่ยม หฒะ แปง กวั้น ซิน หฒิน เหฑ่ง. เดา หย่า ต์ง ตุ๊ เสย ไห่. หาย หญู่ง หย่า หฒะเก้ง หลุ่น เหฑ่ง.#14:15 ไฟ “ทิน-ฮู่ง ปุน หญู่งๆ หลุ่น เหฑ่ง”.
ฟีลิสะเตีย เมี่ยน หฒุ เซวย
16เยียม เบนยามิน เต่ย เญย กิเบอา ฒี่ง, เซาโล เญย เซี้ยว แกง เมี่ยน หมั่ง ปวัด แปง ฟ้าด หฑาน เญย เจี๋ย มี่ง เจี๋ย ต้าย เญย. 17เซาโล ฯฒฯ ก๊อง บั๋ว กัน นิ่น วั้ว เต๋ย เมี่ยน, “ซ้าว หมั่ง ก๋า, ม่าย หาย เต้า เยียม บัว น้าย ธ้วด มี่ง?” นิ่น บัว ซ้าว ฯฒฯ ฮิ้ว ตุ๊ โยนาทาน เหธา เถง นิ่น ต้อ หวัวะ กิ่น วั้ว เต้า ตอน ไม้ เยียม หน่าย.
18เซาโล ก๊อง บั๋ว อาหิยา, “ต้อ ทิน-ฮู่ง เญย ฟาง ต้าย น้าย,” (เหว่ย หฒุ วั้ว หฒั่น ทิน-ฮู่ง เญย ฟาง เหธา อิสะลาเอน เมี่ยน เยียม.) 19เซาโล เหธา อาหิยา ไซ เมี่ยน ก๊อง หว่า วั้ว หฒั่น, เยียม ฟีลิสะเตีย เมี่ยน เญย เธี้ยง หลุ่น เญย เฉีย กุ๊น โหฒว กุ๊น บุย. เซาโล ฯฒฯ ก๊อง บั๋ว ไซ เมี่ยน, “ฮล้วด ปั์ว เหฌี่ย ม่าะ!”
20เซาโล เหธา กัน นิ่น เญย แปง ฯฒฯ กั๊บ ฒุ้น มี่ง วั้ว เบ๊าะ จ๋า เธี้ยง. หมั่ง ม่าะ! ฟีลิสะเตีย เมี่ยน กั้น หล่ง หฑุ ด๊าว ล่าน ไต๋ ล่าน. หฒะเก้ง หลุ่น เถา เดี๊ย อ๊ะ. 21ต้ง ฒิ่น ด่าง เหธา ฟีลิสะเตีย เมี่ยน เยียม หย่า เหธา นิ่น บัว เปียะ นิ่น บัว เญย เธี้ยง, วั้ว เต๋ย ฮิบลู เมี่ยน, ต๋าว หฑวน ต้าย เปียะ ต้ง กัน เซาโล เหธา โยนาทาน เญย อิสะลาเอน เมี่ยน. 22ต้ง ปี๋ง เจี๊ยน เอฟาอิม บง-ไอ๊ ต๋อง วั้ว เต๋ย อิสะลาเอน เมี่ยน ไฮ์ เฝียน ก๊อง ฟีลิสะเตีย เมี่ยน เปย๋า, นิ่น บัว ฯฒฯ ธ้วด ต้าย หฒุ่น เจี๊ยน เบ๊าะ เจี๊ยน นิ่น บัว มี่ง. 23วั้ว ฮนอย เฒี้ยว เหฌียว อิสะลาเอน เมี่ยน. เบ๊าะ จ๋า เญย เจ๊า ฒู้ง เจี๋ย ด่าง เบดอาเวน เต่ย วั้ว ปูง.
เบ๊าะ ลิ์ว จ๋า, ฆะฮ้า ธ้วด เญย สี่
24วั้ว ฮนอย อิสะลาเอน เมี่ยน หฒะเก้ง โค้ว ไห่, เหว่ย หฒุ เซาโล เห่ว แปะ ฝีง โฮ้ว หว่า ก๊อง, “อี้ ฮนอย ไม้ แก้ง หฮมวัง หย่า ไม้ แก้ง ตุ๊ จ๊าว วิน ปุน เยีย เญย วิน-วั้ง นอ, ตะฟ่าน หาย เต้า หญั่น หาย หญู่ง กะน้าย, วั้ว เต้า อ๋อย หฒุ เหฒียว อ๊ะ.” เหว่ย น้าย เฒี่ยง ฮนอย ไม้ ม่าย หาย เต้า ตุ๊ หญั่น หาย หญู่ง.
25หฒวัง แปะ ฝีง#14:25 ม่าย เต๋ย โซว ฟาน ก๊อง หฒวัง แปง. เปียะ กะญั์ว หล่ม มี่ง, ปวัด ม่าย เมว์ย-ต้อง เยียม วั้ว เดา. 26นิ่น บัว เปียะ หล่ม วั้ว หฒั่น, ปวัด ม่าย เมว์ย-ต้อง เหลี่ยว ธ้วด มป่า ไม้ ม่าย หาย เต้า หล่ง ปั์ว เฒาะ ต้าย หญั่น, เหว่ย หฒุ นิ่น บัว กั้ม เหฑีย วั้ว เต๋ย โฮ้ว เญย หว่า. 27มป่า โยนาทาน ไม้ ตุ๊ ไฮ์ นิ่น เญย เตีย เห่ว แปะ ฝีง โฮ้ว หว่า, นิ่น ฯฒฯ ซูง นิ่น นั้น เญย ปย๊า ป๊ะ เมว์ย-เผง หย่า หล่ง ปั์ว เฒาะ ต้าย ตั๊บ ฑุ่ย. นิ่น เญย มฒีง ฯฒฯ ฌัง ต้าย อ๊ะ. 28เยียม วั้ว เญย เมี่ยน ม่าย เต้า ก๊อง บั๋ว โยนาทาน, “เม่ย เญย เตีย หัด หฒวัง เมี่ยน โฮ้ว เจี๊ยน ก๊อง, ‘อี้ ฮนอย หาย เต้า หญั่น หาย หญู่ง, วั้ว เต้า อ๋อย หฒุ เหฒียว อ๊ะ.’” เหว่ย น้าย หฒวัง เมี่ยน หฒะเก้ง เมา ไห่.
29โยนาทาน ก๊อง, “เยีย เญย เตีย โหฒว ปุน เต่ย-ปูง หฒุ โค้ว ฮนั้ง. หมั่ง ก๋า, เยีย เสย ลิ์ว ติ๊ เตียน น้าย เต๋ย เมว์ย-ต้อง, เยีย เญย มฒีง ฯฒฯ ด่ง หาย ฌัง. 30สี ก๊อง อี้ ฮนอย แปะ ฝีง ตุ๊ เซว่ย เอ๋ย หญั่น เยียม วิน-วั้ง ธ้าง ต้าย เญย กะน้าย นอ, เก้า หลง ตุ๊ ธั้ม. เหว่ย หฒุ ไต๋ ไต่ ฟีลิสะเตีย เมี่ยน ไม้ ตุ๊ ด่ง หาย ธั้ม อ๊ะ.”
31วั้ว ฮนอย อิสะลาเอน เมี่ยน ไต๋ ฟีลิสะเตีย เมี่ยน เยียม มิกม้าด ไต๋ เจี๊ยน มี่ง เถา ไอยาโลน. หฒวัง แปง หฒะเก้ง เมา ตุ๊ โค้ว ไห่. 32หฒวัง เมี่ยน ฯฒฯ ฮวางๆ ฒางๆ เญย ถิว เปียะ มี่ง ล์อ ธ้าง ตุ๊ ต้าย เญย กะน้าย, เฒาะ ปะกี ยู่ง, ง่ง เหธา ง่ง ตอน เยียม วั้ว เดา ไต๋ ต้าย ฯฒฯ หญั่น อ๊อ หฒอบ เจี๊ยน ฑย้าม. 33ม่าย เมี่ยน บั๋ว เซาโล, “หมั่ง ม่าะ! หฒวัง แปะ ฝีง ป์าม ฒุ์ย ต่อง เฒี้ยว เหว่ย หฒุ นิ่น บัว หญั่น อ๊อ หฒอบ เจี๊ยน ฑย้าม.”#ทิน เต่ย โต้ว 9:4; เลวี 7:26-27; 17:10-14; 19:26; หฑั่ม เล์ย-หลัด 12:16,23; 15:23
เซาโล ฯฒฯ ก๊อง, “เม่ย บัว โหฒว เบี๊ยน เฮญี้ยว เญย สี่ อ๊ะ. เฒาะ นอม ต้ม หละเปย๊ย หฌัง เถา เยีย น้าย.” 34เซาโล แอ๋ง ก๊อง, “ก๊าน มี่ง หฒวัง เมี่ยน บุด๋ง บั๋ว นิ่น บัว, ‘เก๊าะ-เมี่ยน ต้อ กั้น เญย ง่ง ไฟ ปะกี ยู่ง ต้าย เยียม น้าย ไต๋, เยียม น้าย หญั่น. ไม้ ตู๋ง หญั่น อ๊อ หฒอบ เจี๊ยน ฑย้าม ฯฒฯ ป์าม ฒุ์ย ต่อง เฒี้ยว. ’”
วั้ว ม์วน เต้าๆ เมี่ยน ฯฒฯ ต้อ นิ่น บัว เญย ง่ง ต้าย เยียม วั้ว ไต๋. 35เซาโล เหว่ย เฒี้ยว เหธย นอม เหฒี่ย-ต้อง. น้าย เซ นิ่น เหว่ย เฒี้ยว เหธย เญย ต้าว นอม เหฒี่ย-ต้อง.
36เซาโล ก๊อง, “บัว ลู่ง ม์วน หฒั่น เหฌี่ย มี่ง หฒุ่น ฟีลิสะเตีย เมี่ยน, ธ้าง นิ่น บัว เญย กะน้าย เถา ลู่ง ฌัง. บัว ฒู้ง ไม้ เลี่ยว นิ่น บัว เหยียด เต้า.”
แปะ ฝีง เตา, “หฒิว เม่ย ปวัด หอบ หฒุ โหฒว เญย กุ๊น โหฒว อ๊ะ.”
มป่า ไซ เมี่ยน ก๊อง, “บัว อ๋อย หฒุ เยียม น้าย, หน่าย เฒี้ยว ด่าง.”
37เซาโล ฯฒฯ หน่าย ทิน-ฮู่ง, “เยีย มี่ง หฒุ่น ฟีลิสะเตีย เมี่ยน เซ หอบ ไฟ ไม้ หอบ? เม่ย อ๋อย เฒาะ นิ่น บัว จิว ปุน เยียม อิสะลาเอน เมี่ยน เญย ปั์ว-เดี๊ย เญย ไฟ?” มป่า วั้ว ฮนอย ทิน-ฮู่ง ไม้ เตา นิ่น.
38เซาโล ฯฒฯ ก๊อง, “แปะ ฝีง เญย หฒวัง เปย๊ย เฒ้ย ต้าย น้าย ม่าะ! เม่ย บัว อ๋อย หฒุ ฮิ้ว หย่า อ๋อย หฒุ ปวัด อี้ ฮนอย น้าย เต๋ย ฒุ์ย ฮนั้ง หาย นอ ธ้วด ต้าย. 39เยีย เฒี้ยง เจี๊ยน เฒี่ยง เจี๊ยน เญย เฒี้ยว, ต้ง เหฌียว อิสะลาเอน เมี่ยน วั้ว เต้า, แล์ง หว่า, ไม้ กุ๊น เยีย เญย ตอน, โยนาทาน, โหฒว ต่อง, นิ่น ด่ง หาย ฒู้ง อ๋อย หฒุ ไต่.” มป่า เยียม วั้ว เต๋ย หฒวัง เมี่ยน บุด๋ง ไม้ ม่าย เหยียด เต้า เตา นิ่น.
40ฮู่ง เตี๋ย ฯฒฯ ก๊อง บั๋ว อิสะลาเอน เญย หฒวัง เมี่ยน, “เม่ย บัว เหยียด ฒู้ง เยียม เหยียด ปูง. เยีย เหธา เยีย เญย ตอน, โยนาทาน, กั้น เยียม เหยียด ปูง.”
แปะ ฝีง ฯฒฯ เตา เซาโล, “หฒิว ฮู่ง เตี๋ย ปวัด หอบ หฒุ โหฒว เญย กุ๊น โหฒว อ๊ะ.”
41ฮนั้ง น้าย เซาโล ฯฒฯ เต๋า เก๋า หน่าย เฒี้ยว, อิสะลาเอน เญย ทิน-ฮู่ง, “โท้ ปุน ธีง หาย ปูง หอบ.” ด๊อด หฒุ เซาโล เหธา โยนาทาน วั้ว ปูง, มป่า ปุน ธีง แปะ ฝีง ไม้ ต่อง.#ซ้าว เมี่ยน 27:21; 1 ซามูเอน 28:6 42เซาโล ก๊อง, “แอ๋ง ตี่ง หฑุ่น หมั่ง ก๋า เยีย ไฟ เยีย เญย ตอน, โยนาทาน.” ฯฒฯ ด๊อด หฒุ โยนาทาน.
43เซาโล ฯฒฯ หน่าย โยนาทาน, “เม่ย โหฒว หาย หญู่ง? บั๋ว เยีย ม่าะ!”
โยนาทาน เตา, “เยีย ตุ๊ เสย ติ๊ เตียน กั๊วะ เจี๊ยน เยีย นั้น เญย ปย๊า เตว๊ย-เมว์ย เญย เมว์ย-ต้อง ฮนั้ง. เยีย เยียม น้าย, เยีย อ๋อย หฒุ ไต่ อ๊ะ.”
44เซาโล ก๊อง, “โยนาทาน อ้า! เม่ย ด่ง หาย ฒู้ง อ๋อย หฒุ ไต่ อ๊ะ. สี ก๊อง เม่ย ไม้ ไต่ โท้ ทิน-ฮู่ง เฮนี้ยๆ เญย โหฒว ปุน เยีย.”
45แปะ ฝีง หน่าย เซาโล, “โยนาทาน หฒะเก้ง อ๋อย หฒุ ไต่ ไฟ? นิ่น เยียม อิสะลาเอน เมี่ยน บุด๋ง เถง บัว ตุ๊ ฮี่ง เจี๋ย. เยีย บัว เฒี้ยง เจี๊ยน เฒี่ยง เจี๊ยน เญย เฒี้ยว แล์ง หว่า, โยนาทาน เญย เหยียด ติ้ว บะเปยย ฒู้ง ไม้ หฒุ ด๊อด เหฌี่ย เดา, เหว่ย หฒุ นิ่น อี้ ฮนอย เหธา ทิน-ฮู่ง จวั่ง เจี๊ยน เบ๊าะ จ๋า.” แปะ ฝีง เสีย ธ้วด โยนาทาน เญย แหม่ง, นิ่น ฯฒฯ ไม้ หฒุ ไต๋ ไต่.
46เซาโล ฯฒฯ ตี้ง เหฌี่ย, ไม้ หฒุ่น ฟีลิสะเตีย เมี่ยน. ฟีลิสะเตีย เมี่ยน ฯฒฯ หฑวน นิ่น บัว กั้น เญย เต่ย-ปูง หมี่ อ๊ะ.
47เซาโล กุ๊น อิสะลาเอน กั๊วะ วั้ว หฒั่น, นิ่น ตุ๊ เบ๊าะ เว่ย ก๋อม นิ่น วั้ว เต๋ย วิน-วั้ง. นิ่น เบ๊าะ โมอับ เมี่ยน, อัมโมน เมี่ยน, เอโดม เมี่ยน เหธา เยียม โสบา เญย ฮู่ง เตี๋ย เหธา ฟีลิสะเตีย เมี่ยน. ไม้ กุ๊น นิ่น ฮวิน มี่ง หาย ปูง, นิ่น ฯฒฯ เบ๊าะ ตุ๊ ฮี่ง วิน-วั้ง. 48ฮู่ง เตี๋ย เบ๊าะ จ๋า เฮ้น, หย่า เบ๊าะ อามาเล้ก เมี่ยน, เหฌียว อิสะลาเอน เมี่ยน เปย๋า ดุ๊ด ลู้ นิ่น บัว วั้ว เต๋ย เมี่ยน เญย ปั์ว-เดี๊ย.
เซาโล เญย ฮมวั้ง ต่อย
49เซาโล เญย ตอน ม่าย โยนาทาน, อิดวี เหธา มันคีซูวา. นิ่น แอ๋ง ม่าย อี เต้า เซียะ. เซียะ-โฮล เญย บั๋ว เห่ว เมล้าบ, เซียะ-ไฝ เห่ว มีคาน. 50เซาโล เญย เอ๊า, บั๋ว เห่ว อาหิโนอัม, เซ อาหิมาอัด เญย เซียะ. เซาโล เญย ต้ม แปง-เปย๊ย เญย บั๋ว เห่ว อับเน, เซ เน เญย ตอน. เน เซ เซาโล เญย แป๊ะ. 51เซาโล เญย เตีย, คี้ด, เหธา อับเน เญย เตีย, เน, โหฒว อาบีเอน เญย ตอน.
52เยียม เซาโล เญย เสย เฒ้ย หฒั่นๆ เหธา ฟีลิสะเตีย เมี่ยน ม่าย เบ๊าะ ต้ม จ๋า เญย สี่. เซาโล ปวัด หาย เต้า เฒี่ยง ตุ๊ เฮ้น, ม่าย ชะ, ฯฒฯ ต้อ ต้าย กัน นิ่น.
Currently Selected:
1 ซามูเอน 14: IuMiTH
Highlight
Copy
Compare
Share
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
