Arumi 9
9
Aiziraeli ndio atʼu otsagulwa ni Mulungu
1Enehu a chijeso, mimi ninagomba ujeri uphuphu tsʼilemba, kwakukala, náokolwa ni Kʼirisito. Na hata moyo wangu nao urio unalongozwa ni Roho wa Mulungu, unanamba tsʼilemba vivyo. 2-3Ujeri nigombao ni kwamba, mimi ninashononeka muno, na nina utsungu kwenda kwa atʼu angu, ario ni a chiryomo changu. Mimi ninahenza navize muno ao atʼu a chiryomo changu kwa atiye. Ndo hata kala yo njira ya kwaavizira, ni mimi mwenye nirichirwe chitai cha Mulungu, na nilaviwe Kʼirisito, mino ningari kukala razi vivyo. 4#Kul 4:22Atʼu angu ni Aiziraeli, ario átsagulwa ni Mulungu. Ao Mulungu waahenda akale anae, waangʼazira ubomuwe, waaikira malagano, waapʼa Shariya, waangʼazira vivyo ahenzwavyo amwabudu, na waalaga vilaganevye. 5Akare ao ni o atʼu a Mulungu amanyikanao, na Jeso Kʼirisito uchimutuwa upandewe wa chidamu, ni Mwiziraeli naye. Ela o upande unjine, ni Mulungu atawalaye osi, na naalikwe hata kare na kare! Amina.
6Ajeso asena, vivi vyodzigomba tsʼi kwamba neno ra Mulungu kʼarichimizire garatʼu golagwa Aiziraeli ni Mulungu, mana, tsʼi kwamba Aiziraeli osi ni atʼu a Mulungu jeri. 7#Mwa 21:12Na kʼaaidima kwihiwa ana a Mulungu tu kwa ni atʼu a mudzungu wa Burahemu. Itsʼiphokala, Mulungu wamwamba Burahemu vivi, “Atʼu a mudzunguo andalaa kwa mwanao Isaka.” 8Ndo vivyo ni kwamba, ana a Mulungu a jeri, ni aratʼu ana a Burahemu ovyalwa kulairirana na cho chilagane cholagwa ni Mulungu. Ela ovyalwa kulairirana na mahenzo ga mwiri, kʼaatarwa ni ana a Mulungu. 9#Mwa 18:10Maneno gaga ni ga jeri, kwakukala, Mulungu ariphomuulaga chilagane Burahemu, wamwamba vivi, “Mimi nindauya ukati dza uu, na mucheo Sara undakala wavyala mwanalume.”
10Na tsʼi gago hicheye tu, mana, utʼu dza uo wamulairira Rebeka yekala upata mimba na yiye mulumewe mumwenga, yaani mukare wehu Isaka. 11-12#Mwa 25:23Ela Rebeka phokala kʼadzangwe kwavyala anae airi a chilume, na kwa vivyo, ákala kʼaadzangwe kuhenda utʼu wowosi udzo hebu ui, Mulungu wamwamba vivi, “Yiye muvyere undamuhikirahikira yiye muvaha.” Mulungu waamba vivyo, kwa hata aonyese kukala, yiye watsagula mumwenga, na yiye munjine achimuricha kwakukala, vivyo ndivyokala udzila. Ndo yiye mumwenga waihiwa ni Mulungu kwakukala, wakala utsagulwa, ela tsʼi kwakukala, kahi wahenda madzo. 13#Mal 1:2, 3Vivyo vinagwa sawa na Maandiko ga Mulungu gaambago, “Námutsagula Jakobo, nichimuricha Esau.”
14Ndo vikale vivyo vinaimanisha Mulungu kʼalamula haki? Ngʼo! Vivyo tsʼivyo kamare. 15#Kul 33:19Maana, Mulungu wamwamba Musa vivi,
“Nindamonera mbazi mutʼu yeyosi
nihenzaye kumonera mbazi,
na nindamwajaliya yeyosi
nihenzaye kumwajaliya.”
16Ndo Mulungu utsagula mutʼu yiye amuhenzaye amonere mbazi, ela kʼatsagula mutʼu kwa vivyo ndivyo ahenzavyo yiye mutʼu, hebu kwa chadiche. 17#Kul 9:16Vivi vinagwa sawa na Maandiko ga Mulungu goambirwa Farao kukala, “Uwe nákwika mutawali kwa lengo riri: nikonyese widimi wangu, na chisha nguma yangu yigotʼe duniani kosi.” 18Ndo Mulungu amuhenzaye kumonera mbazi, unamonera. Na amuhenzaye kumuhenda atsowe akili, unamuhenda akale vivyo.
Chitai na mbazi za Mulungu
19Enehu a chijeso, nikwenda mutʼu akaniuza akaamba, “Chikala yiye Mulungu vivyo ndivyo ahendavyo, wuyadze yiye akaona mutʼu ni mudambi, na kʼakuna aidimaye kuziza mahenzoge?” 20#Isa 29:16; 45:9Ndo ninamuhenza mumanye kamare kukala, riro hata tsʼi ra kuuza. Maana, mwimwi mu adamu tu, na mwanadamu, kʼana haki ya kulumbana na Mulungu. Hwalani mufano wa nyungu. Nyungu kʼayiidima kamare kumuuza yiye muumbiwe kukala, “Kwadze we waniumba vino?” 21Mwimwi munamanya kare kukala, muumbi wa nyungu achivuga ulongo, una haki ya kuumba utʼu auhenzao. Yiye phapho unaidima kwamula kuumba nyungu mbiri, mwenga akayihenda ya mahumizi ga chila tsʼiku, na yo yinjine akayihenda ya mahumizi ga ukati wa shuhuli.
22Ndo Mulungu una haki ya kuhenda vyakwe ahenzavyo. Yiye una haki yosi ya kwalamula atʼu, na kwangʼazira widimiwe. Na una haki vivyo ya kwavumirira o atʼu ario ápangirwa kutiywa akili, na kuyazwa. 23Na una haki vivyo ya kwangʼazira ubomuwe aratʼu atʼu okala udziapangira kwaonera mbazi. 24Ndo siswi ndiswi wahwiha, na tsʼi kulaa kwa Ayahudi hichiyao tu, ela hata kulaa kwa atʼu a makabila manjine. 25#Hos 2:23Gago ganagwa sawa na maneno ga Mulungu garigo chitabuni mwa Hosea dzulu ya atʼu a makabila manjine. Yiye waamba,
“Atʼu okala tsʼi angu,
nindaaiha ‘atʼu angu.’
Atʼu okala tsʼiaenzi,
nindaaiha ‘atʼu angu niahenzao.’
26 #
Hos 1:10
Na atʼu arioambwa ni Mulungu, ‘Mwimwi kʼamu atʼu angu,’
vivi andaihiwa ana a Mulungu ariye moyo.”
27 #
Isa 10:22, 23 Mugomvi wa Mulungu Isaya naye, waamba vivi dzulu ya Aiziraeli, “Aiziraeli ni anji jeri dza mitsanga ya pwʼani, ela ondativywa ni achache. 28Maana, Mwenyezi Mulungu undaalamula maruru ao atʼu phapha duniani, na agamale phapho kare.” 29#Isa 1:9Ndo maneno ganga dza vyogomba yiye Isaya vivyo pho pʼindi kukala, “Kakala yiye Mwenyezi Mulungu, Mulungu wa majeshi kʼahurichirire moyo atʼu a mudzungu wehu, hungari hwakala dza atʼu a Sodoma hebu atʼu a Gomora.”
Ayahudi anji árema kumukuluphira Jeso
30Ndo kufikira phapho hunaonani kukala, atʼu a makabila manjine ákala kʼaatsakula kukala enye haki, ela Mulungu waaphokera dza enye haki kwakukala, ámukuluphira Jeso. 31Ela ano Aiziraeli ákala anatsakula kukala enye haki kwa kutuwa Shariya, ela achishindwa. 32Ndo swali ni, kwadze áshindwa? Jibure ni kwamba, ao kʼaatsakulire kukala enye haki kwa njira ya kuluphiro, ela kuchirira kutuwa Shariya, na phapho achikwala riro dziwe riakwazaro atʼu. 33#Isa 28:16Dziwe riro ndiro rihadzwaro ni Mulungu mumo mwakwe Maandikoni. Yiye waamba,
“Sirikisani chividzo, mimi kuko Sayuni nindakwika mutʼu
yendakala dza dziwe rondaakwaza atʼu,
na mwamba ondaabitʼa.
Ela yendamukuluphira mutʼu yiye, kʼandaifyika.”
Currently Selected:
Arumi 9: CHIDUR
Highlight
Copy
Compare
Share
Want to have your highlights saved across all your devices? Sign up or sign in
